Read Banggai YEREMIA 40 Bible Online

YEREMIA 40 - Banggai bible

YEREMIA 40

¹TEMENENO basilingan doi yaku sambuno lapa Nebuzaradan, kapala pasukan doo, sodiiyo yaku doi Rama. Yaku daanon doi binoboian lalomo binabamo dombalaa polaing-laing saibino mian bailon moluwedoi Yerusalem tukon Yehuda moinakut salaku mian moilako doi Babel.

²Kapala pasukan doo uange yaku susunggu tukon bantil, “TEMENENO mu Mian Bisa lapamo otokutio tuuk momanase natano nia.

³Diabudodoo langge doo lapamo ilakukanggon, sabab mubangsa kabaiyo kolalim tukon akimo nataat doi Yana.

⁴Diabudodoo kuliate poboy nia doi botokomu tukon kusodiiyo ikoo. Kalu ikoo yase, ikoo moola malaing doi Babel, tukon yaku naikon dagaiyo ikoo. Bai kalu ikoo aki muyase, aki nabulaa. Doi Posaapon tano nia ikoo sinodii taus doi yando komu mongiasan.”

⁵Akiyon nataus, Nebuzaradan bantil, “Kalu ikoo, yase ikoo moola abali doi Gedalya Ahikam napau tukon Safan tumbuno molapamo tomundo Babel, oduke teali gubernur kota-kota Yehuda. Ikoo moola dungol tukon yana doi antara rayat kabai taus doi yando mololoi komuinias.” Maka yana beena mandu kinaan tukon palasen doi yaku, tukon sodiiyo yaku taus.

⁶Yaku taus doi Gedalya doi Mizpa, tukon tanaang tukon yana doi rayat tanga-tangano motinggalo doi tano Yehuda.

⁷ Tomundo Babel lapamo oduke Gedalya teali Gubernur doi Yehuda tuuk maparentah doi saibino komian modaano dungol doi Yehuda, doiyamo mian dango motalais tuuno. Semeleng luwedoi saibino koletnan tukon suludadu Yehuda moaki nataluuk doi Babel, lengele Gedalya doo nainodukan kaliangano.

⁸Maka Ismael Netanya napau, Yohanan Kareah napau, Seraya Tanhumet napau, tukon Efai napau-pau doi Netofa; tukon Yezanya doi Maakha taus tukon mian daango yanila doi Gedalya doi Mizpa.

⁹Gedalya bantil doi yanila, “Komuyu aki moola matakut tuuk motaluuk doi Babel miano. Dungolo tolong doi ndatano nia, tukon tealimo ata doi tomundo Babel. Yaku toiyo komuyu naikon salamat.

¹⁰Dungolo komuyu doi kota-kota poinias, tukon pototongi kenemo tukon mangabos anggur, sao-saono tukon zaitun lisosono. Yaku susunggu naikon dungol doi Mizpa tukon wakilio korayat kalukai Babel miano daango lubat dosumai.”

¹¹Daanon saibino Israel miano doo modaano doi tano Moab, Amon, Edom, tukon tano-tano bailon; lengele baikon tomundo Babel lapamo pataikene songobos ko Israel miano dungol doi Yehuda, tukon tano-tano baikon yana lapamo oduke Gedalya teali Gubernur.

¹²Sabab doiya yanila tinggalemo tampat-tampat doiyaa yani yanila lapamo pinoalaason, maka abali doi Yehuda. Yanila lubat doi Gedalya doi Mizpa, tukon potongikene badaang tuuno koanggur tukon sao-saowan.

¹³Sambuno lapa doiya, Yohanan tukon saibino koletnan moaki nataluk doi namusuh lubat doi Gedalya doi Mizpa

¹⁴tukon bantil, “Toiyomo ikoo baikon Baalis tomundo Amon lapamo sumboliyo Ismael akateo ikoo?” Bai Gedalya aki namaanga doi yanila nabantilan.

¹⁵Maka tukon tanang-tanang Yohanan doi Gedalya, “Mondoko yaku taus akateo Ismael; akiyo komeeng komiankai naikon motoiyo inde komo lalukene. Bulaando yana mosinodiikon moakateo ikoo? Doiya naikon koakibato saibino ko Yehuda miaano mo lapamo pototongi dimbaa tukon ikoo, polason koidan, tukon langgedoo naikon manasemo saibino korayat modaanon kolabino doi Yehuda.”

¹⁶Bai Gedalya timbiliyo, “Inai! Ikoo mobantile kaliangano Ismael doo aki nabisa!”