Read Banggai YEREMIA 41 Bible Online

YEREMIA 41 - Banggai bible

YEREMIA 41

¹ Doi bituwon kopituno taun doo Ismael Netanya napau tukon Elisama natumbu taus polaing songulo komian doi Mizpa tuuk pososuung tukon Gedalya (Ismael daanon meeng komian katulunan tomundo, salah komeeng komian letnan moakiyo komamaasi). Daanon yanila saibino mokaan posinggat-singgat,

²Ismael tukon miano mosongulodoo yanila kibute kopasabel tukon akateo Gedalya, Babel miano doo mooduke Gubernur.

³Ismael kataeo koidan saibino ko Yehuda miano modaano polaing Gedalya doi Mizpa, tukon saibino ko suludadu Babel mososinggat daanon idoo.

⁴Oloyo potunduno, akiyon Gedalya nainakate komian toiyomo,

⁵lubato alu kolono komian luwedoi Sikhem, Silo tukon Samaria. Yanila lapamo badali janggut, mabending pakean, tukon solit-solitio yanila butongo. Yanila mababa gandum tukon kamangian tuuk mosinosubakon doi TEMENENO Na Bonua.

⁶Maka sumbuto Ismael luwedoi Mizpa tukon taus posunggikene yanila. Tukon kikiil yana bantil, “Mai nda taus kitayo Gedalya.”

⁷Mosobit sambuno lapa yanila polong doi kota tanga-tangano, Ismael tukon namian daango tambuno akateo yanila. Bai songulo doi antara yanila bantil doi Ismael, “Inai mokateo kami! Kami daanon kolua kolupano kogandum, koidan zaitun lisosono, tukon dokat. Saibino kami seekene doi kota tongulungo.” Sabab doiya Ismael aki naakateo yanila bai mo bailon naakateo tukon bajano yanila sakukene doi bubung lalomo.

⁹Bubung doo daano bubung babasal Tomundo Asa mokaibaiyo doi tempo yana Baesa tomundo Israel lobosio.

¹⁰Lapa doo Ismael lakoyo saibino kotomundo naboine tukon saibino komian modaano doi Mizpa molapamo Nebuzaradan doi badagaian Gedalya. Ismael tawane yanila maka barangkat tukon yanila taikon doi lipu Amon.

¹¹Yohanan Kareah napau tukon saibino koletnan polaing-laing tukon yana lenggele Ismael nalokisan kaliangano.

¹²Maka yanila polaing yanila napau taus lelenggene yana, tukon laate yana doi Gibeon nakolom babasal.

¹³Kitayo Yohanan polaing kona letnan-letnan doo lubat, saibino Ismael natinaan tedes tuuno,

¹⁴maka abali tukon dampas lolobotio Yohanan nalombongan.

¹⁵Bai Ismael tukon alu kona suludadu lolos tukon dampasene kobutongo doi lipu Amon.

¹⁶Lapadoo Yohanan tukon naletnan-letnan potongikene sa saibino kona suludadu, boine pau-pau, tukon saibino kopagawe kamali Ismael taane lapamo akateo Gedalya.

¹⁷Yanila saibino teali matakut doi Babel miano, sabab Ismael lapamo akateo Gedalya tomundo Babel mooduke teali Gubernur doi tano doo. Jadi, dampasene kobutongo doi Mesir. Doi loloon tangano, yanila tade doi Kimham lolani ko Betlehem.