Read Banggai YEREMIA 42 Bible Online

YEREMIA 42 - Banggai bible

YEREMIA 42

¹Lapa doiya saibino komian, babasal popoisik, polaing koletnan-letnan, tousokon Yohanan Kareah napau tukon Azarya Hosaya napau lubat

²doi yaku tukon bantil, “Tama bunomo tama mokitayo susungo, kami nia loluk badaang, doibudodoo soisik tolong komo dungol. Kami kabiyo Tama yase sambeang tuuk kami doi TEMENENO Mian Bisa Tama mosusobaiyo. Sambeanggene kami mobaiyo labino nia,

³sulano TEMENENO Mian Bisa tudoikene kami yando komai tausan tukon oila mosio kamo lakukene.”

⁴Yaku timbiliyo, “Monondoko kalu buno doiya. Yaku talimayo mukakabi doo. Yaku naikon sambeang doi TEMENENO nda Mian Bisa, tukon oilamo Napotimbi, naikon kubontiikene saibino; akiyo komeeng kai naikon kuseekene doi komuyu.”

⁵Yanila bantil doi yaku, “Kami kabiyo Tama sambeang doi TEMENENO nda Mian Bisa sabab kami yase taat doi Yana, sulano komai ndondong teali monondok. Jadi monondok kabai kolokis TEMENENO doo Nateteba, kami naikon talimayo. Sodiikenemo TEMENENO teali sakisii mo jujul tukon satia doi kami, kalukai kami aki natulutiyo saibino ko TEMENENO Naparentah binekon doi kami mololo doi Tama.”

⁷Sungulo kooloyo molapadoo TEMENENO basilingan doi yaku.

⁸Maka yaku uange Yohanan tukon naletnan-letnan tukon saibino komian bailon molubat polaing tukon yana.

⁹Yaku bantil doi yanila, “Komuyu sumboliyo yaku pelenggene komu kakabai doi TEMENENO, Mian Bisa Israel. Nah TEMENENO, bantil,

¹⁰‘Kalu komuyu tataap dungol naitano nia, Yaku naikon bingkate komuyu, bolikon otuengene; Yaku naikon kenggele komuyu, bolikon molusayo. Yaku susah tuuno sabab lapamo lubatene ko silakaan doi ikoo.

¹¹Inaimo koidan momatakut doi tomundo Babel doo. Yaku daano doi komuyu tanga-tangano tuuk motulungio tukon sodiiyo komuyu luwedoi nakakuasan.

¹²Sabab Yaku mamasikene komuyu Yaku naikon sumboliyo tomundo Babel namama sikene komuyu tukon napataikene komuyu mule. Yaku, TEMENENO, lapamo basilingan.’ ”

¹³Bai komuyu modaano dungol doi Yehuda inaikai mopalentan doi mu TEMENENO Mian Bisa tukon inai bantil, “Kami aki naiyase dungol doi tano doo. Imabali akimo naalamio koidan kopolobosian, aki namolongol kolompet nalalo momonguang tuuk molobosiyo, tukon aki koidan namandarita nalalan.” Kalu komuyu okotikas konoamiu tuuk motaus doi Mesir tukon dungol imabali, naiya TEMENENO Mobabasal Konakuasa nateteba, Mian Bisa Israel, tuuk komuyu:

¹⁶“Polobosian tukon malalaan komuyu momatakutene doo naikon lelenggene komuyu polong doi Mesir, tukon komuyu naikon mate doi tano doo.

¹⁷Saibino komian aki naiyase taus doi Mesir tukon dungol indaa naikon mate doi polobosian lalomo, kabai mate sabab malaal kabai panakit mobiol-biol. Akiyo komeeng komian naikon luput luwedoi silakaan naikon Kulubatene doi yanila bunggono saibino naikon mate.

¹⁸Bunomokai Yaku, TEMENENO Mian Bisa Israel mookitakenemo konggimalan tukon Daku nggimalan tuuno doi modungoliyo ko Yerusalem, bunomo koidan naikon Kukundongikene Daku nggimalan doi komuyu; komuyu naikon motaus doi Mesir. Komian naikon taus kitayo komuyu; komuyu naikon tinutulai tukon sambumu naikon pinake salaku totopi. Komuyu aki naikon kitayo tano mutuboan nia koidan.”

¹⁹Maka yaku bantil koidan, “TEMENENO lapamo maparentakene sulano komuyu modaano kosinano doi Yehuda aki nataus doi Mesir. Sabab doiya yaku ingotikene komuyu diabudodoo

²⁰baikon komuyu lapamo makabai meeng kokasalahan babasal. Komuyu kabiyo sulano yaku sambeng doi nda TEMENENO Mian Bisa tuuk komuyu, tukon komuyu perjanjian tuuk laksanakene saibino ko TEMENENO nabinantil.

²¹Diabudodoo yaku lapamo pelenggene nda TEMENENO Mian Bisa nateteba doi komuyu bai komuyu aki poiyase tulutiyo teteba doo.

²²Sabab doiya, neeke: doi tano komuyu moiyase lubotio tuuk motataap idoo, komuyu naikon mate polobosian lalomo, kabai sabab malalaan kabai panakit mobiol-biol.”