Read Banggai YEREMIA 44 Bible Online

YEREMIA 44 - Banggai bible

YEREMIA 44

¹TEMENENO basilingan doi yaku saibino ko Israel miano modungol doi Mesir kaliangano, doiyamo doi kota Migdol, Tahpanhes, Memfis, tukon doi lipu salatan.

²Naiyamo koteteba TEMENENO Mobabasal Konakuasa, Mian Bisa Israel, doi yanila, “Komuyu susungo lapamo sakisii silakaan mo Yaku lubatene doi Yerusalem bunggono tukon saibino kokota bailon doi Yehuda. Polong diabudodoo kai kota-kota doo daanon doi ndandondong lalomo momanas akiyo komo dungoliyo.

³Langge doo teali sabab komodungoliyo makabai lalim, tobikon kabaiyo Yaku nggimal. Yanila mososubakon-sosubakon tukon bakaleda doi tomundo-tomundo moakiyon idan, yanila susungo sosubaiyo, kai komuyu kabai mbumbu.

⁴Yaku banggadudul kapatuwo doi komuyu Daku ata-ata, saibino konabii-nabii momapantanggene yanila molakukene ko Kulokisan Kuminisikiton.

⁵Bai komuyu aki poiyase mondongolio tukon aki poiyase palaatikanggene. Komuyu aki poiyase tade lakukene komolokisan doiyamo mososubakon sosubakon doi dewa-dewa.

⁶Doiyando kosababpo Yaku sumbetene ko nggimalan tukon Kunggimalan doi Yehuda nakota-kota bunggono tukon loloon-loloon doi Yerusalem. Saibino Kusuayo tobikon teali bakas-bakas tukon akioomo komotubo bunomo momoola kinita diabudodoo nia.

⁷Tukon diabudodoo Yaku, TEMENENO Mobabasal Konakuasa, Mian Bisa Israel, masadai bulaando komuyu lakukene kolangge molubatene kosilakaan mobabasal doo telhadap butomu. Oila kai komuyu yase magakate mian saibino-malane, boine pau-pau, pauno tobikon akiyo komeeng komian kai luwedoi mubangsa mototinggal?

⁸Bulaando komuyu lakukene kolangge-langge mokabaiyo Yaku nggimal? Komuyu lubat tukon dunggol doi Mesir, tanomo akiyon popobiasakon, maka komuyu sosubaiyo kopilogot tukon mososubakon-sosubakon doi tano doo nailah-ilah! Oilakai komuyu yase momanase kobutomiu susungo sulano komuyu saibino kobangsa doi dunia totulaiyo tukon sambumiu pinake salaku totopi?

⁹Naikon lapamo komuyu toliminggene saibino kokulokisan mumbumbu moilakukene doi Yehuda butano tukon doi loloon-loloon kota Yerusalem, tomundo-tomundo Yehuda tukon yanila nabolo-boloki, maka komuyu tukon yanila nabolo-boloki?

¹⁰Bai polong doi oloyo nia komuyu aki poiyase tinotulai kobutongmiu. Komuyu aki poodotio Yaku tukon aki potubo loloiyo koukum Yaku mobekene doi komuyu tukon mumbumbu.

¹¹Sabab doiya Yaku, TEMENENO Mobabasal Konakuasa, Mian Bisa Israel, naikon lawane komuyu tukon manase posaapon ko Yehuda.

¹²Tukon kalu luwedoi Yehuda miano labino daanon motataap yase doi Mesir tuuk dunggol imbali, yanila naikon silaka saibino. Yanila saibino, babasal popoisik, naikon mate doi Mesir polobosian lalomo kabai malalaan. Mian naikon lasayo nggingging kitayo yanila tukon naikon totulaiyo yanila. Yanila sambuno naikon pinake salaku totopi.

¹³Buno Yaku hukume ko Yerusalem bunomo koidan naikon Yaku ukume yanila modunggol doi Mesir. Yanila naikon mate doi polobosian lalomo, sabab malaal komai panakit mobiol-biol.

¹⁴Luwedoi Yehuda miano labino motauso doi Mesir tuuk dunggol imbali, akiyo komeeng komian mololos kabai tubo. Akiyo komeeng komian doi yanila naikon abali doi Yehuda, maukai langgedoo yanila yase tuuno. Bisa, akiyono naikon komo abali baimokai bubula komo biol.”

¹⁵Maka badaang tuuno komian molubat doi yaku, doiyamo saibino komala-malane motoiyo baikon kona boloki mososubakon sosubakon doi dewa, tukon saibino koboine modaano kokondong idoo, tongusokon Israel miano modungol doi Patros, taikon doi salatan Mesir. Yanila bantil doi yaku,

¹⁶“Kami aki naiyase molongol oila ikoo mobantile doi kami mangatasene TEMENENO sambuno.

¹⁷Saibino molapamo kami perjanjikene, naikon kami lakukene koidan. Kami tataap naikon mososubakon sosubakon doi Tomundo Surgaa, tukon mokundang anggur paisuno salaku mosusobakon doi yana bunomobiasamo komai mbumbu nailako doi kota-kota Yehuda tukon doi loloon-loloon doi Yerusalem, luwedoi tomundo-tomundo tukon komai sambu-sambu pamarentah, tukon saibino susungo. Doi tempodoo kami daanon mosukup kokinaan, kami monondok, tukon akiyo kooila-oila.

¹⁸Bai tambun kami tade mososubakon-sosubakon doi Tomundo Surgaa, tukon akimo namokundang anggur salaku sosubakon doi yana, kami kakulangan saibino; komai mian daango mate doi polobosian lalomo kabai sabab malalaan.”

¹⁹Lapadoo boi-boine doo bantil, “Komai lakai satujuiyo baikon kami makabai roti kosusunano buno Tomundo Surgaa tukon sinua sosubakon maka mosusobakon anggur tuuk komai Dewa doo.”

²⁰Doi sasaibino komalane tukon boine momotimbili bunodoiya, yaku bantil,

²¹“Oilakai komuyu anggene TEMENENO aki natoiyo kabai toliminggenemo sosubakon-sosubakon mosinosubakon doi kota-kota Yehuda tukon doi loloon-loloon Yerusalem luwedoi mumbumbu, luwedoi tomundo-tomundo tukon musambu-sambu, maka rayat nai tano nia tukon luwedoi komuyu susungo?

²²TEMENENO akimo nataane koidan mokita komuyu mososubakene sosubakon doi temeneno-temeneno bailon. Mukakabai doo lokis tukon totulai. Komuyu lapamo makabai lalim doi TEMENENO tukon aki natulutiyo Kona pamarentah-parentah. Tobikon doiya diabudodoo nia koidan mutano manaso kosambuno salaku batotopian. Mian momokita lasayo nggingging.”

²⁴Maka yaku popitoikene doi saibino miandoo, utamano doi sasaibino koboineno, baikon TEMENENO Mobabasal Konakuasa bantil bunonia doi Yehuda miano daango modungol doi Mesir, “Komuyu tukon mubolo-boloki lapamo batotopi doi Tomundo Surgaa baikon komuyu naikon mosua sosubakon tukon mososubakon anggur paisuno doi yana. Muperjanjian doo oila lapamo komuyu tapatio. Jadi, mondoko! Lakukenemo tolong oila komuyu pinaladandikon doo!

²⁶Bai diabudodoo ndongolio oila Daku binantil doi komuyu, he Israel miano doi Mesir: Yaku, TEMENENO, batotopi kosakiisi Kosambunggu mobabasal baikon komuyu akimo Kupataikene koidan mopakeo Kosambunggu tuuk makabai meeng koperjanjian. Komuyu aki namoola bantil, ‘Yaku batotopi daku sakiisi Mian Bisa motubo!’

²⁷Yaku naikon balausaha sulano komuyu silaka tukon aki nasaang, sampe komuyu mate saibino, mau doi polobosian lalomo maukai sabab panakit mobiol-biol.

²⁸Tolongo bubula komian tolong naikon mosalamat tukon abali doi Yehuda luwedoi Mesir. Maka saibino Yehuda miano modaano doi Mesir naikon kitayo oilano yanila nabantilan kabaikon Kubantilan moteali natokitaan.

²⁹Yaku naikon lubatene kosilakaan doi komuyu naitampat nia tuuk okitaikene doi komuyu baikon Daku binaniaton ukuman motuuk doi komuyu, tutuu-tutuumo naikon teali.

³⁰ Hofra tomundo Mesir naikon Kusalakanggene doi musuh-musuh moiyase akateo, pokakana buno Yaku mosalakanggene Zedekia tomundo Yehuda doi Nebukadnezar tomundo Babel, namusuh moiyase akateo yana doo.”