Read Banggai YEREMIA 46 Bible Online

YEREMIA 46 - Banggai bible

YEREMIA 46

¹TEMENENO basilingan doi yaku bangsa-bangsa kaliangano,

² tambun tukon Mesir. Yana popitoikene doi yaku kokaliangano suludadu Nekho tomundo Mesir, moilungguimo doi Karkemis lolani ko Efrat Paisunobatango luwe Nebukadnezar tomundo Babel doi taun kosangggapo Yoyakim maparentaan, tomundo Yehuda. Naiyamo ko TEMENENO nabinantil langge doo kaliangano,

³“Letnan-letnan Mesir wokonikene wookonan bulungan doi napasukan nasiap, ‘Kamangane kona pandong! Sadiayo kotombide tukon usoko doi balisan lalomo! Komuyu, pasukan adalan, paasemo kona pangalas! Lokitio muadalan majumo polobosi!’

⁵Bai Yaku, TEMENENO, kitayo yanila mundul matakut. Yanila nasuludadu-suludadu linungguimo, tukon dampas matakutene aki nabalenge kotonggulungo.

⁶Mopandoi aki tendenge dampasene kobutongo, tukon motambongan barani aki nalolos doi musuh. Yanila takait tukon otuwong doi utala, doi Efrat Paisunobatango doo bibilo.

⁷Indekai yana moliba buno Nil Paisunobatango, buno paisu batango moeba doi bibi-bibilo? Doiyamo tano Mesir. Nabantile, ‘Yaku naikon tuba tukon kuasayo kadunia. Naikon kumanase kota-kota maka modungoliyo.

⁹Bakulebemo, he adalan! Pobagelamo he kaleta! Majumo, he mian mobarani pakanggi tombide luwedoi Sudan tukon Libia. Koidan komuyu, he mopandoi bapanah-panah luwedoi tano Lidia.’ ”

¹⁰Bai yaku Yeremia bantil baikon naiyamo oloyo TEMENENO Mian Bisa Moinakatandak Tuuno tukon Mobabasal Konakuasa naoloyo; doi oloyo doo Yana balasemo doi saibino Kona musuh-musuh. Kona sabel naikon kaane yanila sampe bobosol, tukon inume yanila sauhno sampe biai. Oloyo nia TEMENENO Mobabasal Konakuasa, tembele Kona sosubakon-sosubakon doi lembet, doi Efrat Paisunobatango bibilo doo.

¹¹He modungoliyo ko Mesir, potauso doi Gilead tuuk mounggolio pakuli! Bai, idanokai nabunodoiya Gilead akiyo kopakuli momoola aline komuyu.

¹²Komundondong mookimayo lapamo tinoi luwedoi bangsa-bangsa. Lalo muwookonan linangalo doi posaapon kodunia. Suludadu momeeng tasangkut doi bailon; polaing-laing yanila otuwong tanggalaup doi buta bunggono.

¹³ Salataa Nebukadnezar tomundo Babel lubat lobosio ko Mesir, TEMENENO basilingan doi yaku, bantile.

¹⁴“Yeremia, pelenggene bilita motundu nia doi kota-kota Mesir, doiyamo doi Memfis, Migdol tukon Tahpanhes, ‘Balasadiamo tuuk palaatianggene kobutong sabab komuyu koona saibino naikon, minanaso doi polobosian lalomo!

¹⁵Bulaando Apis, mutemeneno mobukuandoo dampasenemo kobutongo? Sabab TEMENENO lapamo lungguiyo yana!’

¹⁶Badang kosuludadu mo takait tukon otuwong. Yanila bantil meeng doi bailon, ‘Maimo nda mule doi nda bangsa sulano kita moola lolos luwedoi silakaan musuh nasabel.’

¹⁷Beenamo sambu boolu doi tomundo Mesir: ‘Mokabaiyo kopelekan moalokene kokasampatan.’

¹⁸Yaku Mian Bisa motubo; Yaku tomundo TEMENENO Mobabasal Konakuasa. Buno Tabor Bunggulo motatandak tuuno antara bunggul-bunggul, tukon Karmel Bunggulo motatandak doi tobun bunggono, bunomokai yana nabukuan molubat lobosio ikoo.

¹⁹Basa-basadiamo, modungoliyo ko Mesir, tuuk tinaan tukon binaba taus! Memfis naikon teali bakas — tampat mokiis sabab aki nadinongoli.

²⁰Mesir buno saapi napau momalanak, bai pos babasal luwedoi lembet moganguwe.

²¹Ode suludadu-suludadu sinabol akiyo kona doiya buno saapi napau momalanak tuuno. Yanila aki namoola taanggene. Saibino abali tukon dampas sulano salamat. Oloyo ukuman tuuk doi yanila lubato; laatemo kotempo yanila kanakon silakaan.

²²Mesir dampasene kobutongo tukon tolondok buno bindana sabab suludadu musuh lolanimo tuuno. Yanila lobosio yana tukon oloang buno mian mobatape kayung

²³tukon mopulunge kobonggulung moaki namoola ilunggui. Suludadu musuh aki natangait, lobian badaang luwedoi betek. Yaku TEMENENO bantil.

²⁴Modungoliyo ko Mesir naikon kinubai mamaa, sabab kobangsa moluwedoi utara lungguiyomo. Yaku, TEMENENO, lapamo basilingan.”

²⁵TEMENENO Mobabasal Konakuasa, Mian Bisa Israel, bantil, “Yaku naikon ukume Amon, dewa luwedoi Tebe, posaapon ko Mesir dewa-dewa tukon tomundo-tomundo. Tomundo Mesir tukon saibino komian mobalanggene yana

²⁶naikon Kubeekene doi Nebukadnezar tomundo Babel tukon nasuludadu moiyase akateo yanila. Bai doibundu, Mesir naikon dinungoli buno lolukoo. Yaku, TEMENENO, lapamo basilingan.”

²⁷ “Kuumat, Israel, ianai momatakut! Kuata Yakub, inai mbombokon! Komuyu tukon mukatulunan naikon Kusalamatene luwedoi tano moodon, doi tampat komuyu tinaan. Komuyu naikon mule tukon dungol doi mutano tukon aman. Komuyu naikon tubo tukon monondok; akiyono kai kopominatakuton.

²⁸Jadi inaimo pomatakut he Kuumat, Yaku naikon lubat tuuk salamatene komuyu. Bangsa-bangsa, Kupolaasene komuyu natampat, saibino naikon Kumanase, bai komuyu aki Kubunokene doiya. Bisa komuyu aki naikon lolos doi ukuman bai ukuman Yaku doi komuyu daanon moadil pokonoi tukon motinantukono. Yaku, TEMENENO, lapamo basilingan.”