Read Banggai YEREMIA 48 Bible Online

YEREMIA 48 - Banggai bible

YEREMIA 48

¹ Naiyamo ko TEMENENO Mobabasal Konakuasa nabantilan, Mian Bisa Israel kaliangano Moab, “Silakamo modungoliyo ko Nebo, kona kota tolubango! Kiryataim inalamo, tukon nabenteng momonggol minanaso, tobikon modungoliyo teali mamaa;

²Moab namonondokan kiono. Hesybon musuh rebutemo tukon imbali yanila baniatene tuuk mokabuso saibino kobangsa Moab. Lalo-lalo doi kota Madmen naikon tinadekon, sabab kota doo naikon suludadu lobosio.

³Ndongolio! Modungoliyo ko Horonaim wookon, ‘Kosilakaan! Komanasan!’

⁴Manaso ko Moab! Napau-pau pauno wookon linongol sampe doi Zoar.

⁵Ndongolio kolalo kokil doi lolon motolibo doi Luhit, tukon lalo mandaung doi loloon motokolu doi Horonaim.

⁶Yanila bantile, ‘Mosobit! Salamatene kobutomu! Obulengoo buno kaladai mbosolot doi padang!’

⁷Moab! Ikoo balanggene kopandoian tukon mukaasan. Bai diabudodoo ikoo susumu naikon linungguimo. Kamos mutemeneno, polaing saibino koimam tukon saibino kona sambu naikon inakut doi masakukonan.

⁸Saibino kota naikon manas, akiyo komeeng naikon mololos. Pepelakon tukon buta molata naikon saibino kabus. Yaku, TEMENENO, lapamo basilingan.

⁹Paasemo batu kibul tuuk Moab, sabab akimo namalumbit koidan tano naikon minanaso tuuno. Nakota-kota naikon manas tukon akiyo komeeng komian kai naikon modungol imbali.”

¹⁰Kinutuko komian moaki nalimange kona limang luwedoi TEMENENO tukon tutuu. Kinutuko yana moakinabubute kona sabel tukon mangakate.

¹¹TEMENENO bantil, “Tambuno loluk Moab tubo sanaang. Akion naidan yana inakut doi masakukonan. Yana buno anggur paisuno mosinoodikon natanang tukon akimo binatun doi tampat anggur bailon. Kona anggur daanon mobabangi tukon maamis.

¹²Bai, naikon lubat kotempono Yaku sombolio sulano Moab binatun buno anggur, tukon natampat-tampat kinumesi tukon pinapason.

¹³Moab naikon manasal terhadap Kamos yanila natemeneno pokakana buno Israel miano manasal terhadap Betel yanila doo mobalanggene.

¹⁴Bulaando kai malaat mala-malane Moab barani bantil, ‘Kami barani, suludadu barani molapamo inudi doi polobosian lalomo.’

¹⁵Moab tukon nakota-kota lapamo mianan, tukon mian daango motabokon pomondoki kabus inakate. Yaku lapamo basilingan. Yaku tomundo, TEMENENO Mobabasal Konakuasa.

¹⁶Kosilakaan tuuk Moab anomo doi tataapono salaano, akimo namalumbit koidan yana manaso.

¹⁷He komuyu negara-negara pokolano ko Moab komo toiyo kona totoian kaliangano, poloongene tuuk yana! Bantile, ‘Moab akimo kai nabalakuasa, nakinabasalan tukon nabukunanan kabuso!’

¹⁸He modungoliyo ko Dibon, obuluso luwedoi mutampat mohilomati osulang doi buta tukon doi ambata bunggono. Sabab komolusake ko Moab mutano mulubato, tukon naikon manasemo saibino komu benteng.

¹⁹Komuyu modungol doi Aroer, kokondongo doi loloon bibilo tukon palatikanggene! Masadikene doi yanila modampasene kobutongo, tukon lolos, ‘Oilano komo teali?’

²⁰Yanila naikon timbiliyo, ‘Moab otuwongo tukon tealimo totulai, sabab doiya kokiilo yana. Popitoikene popusoon doi Arnon Paisuno batango baikon Moab manaso.’ ”

²¹“Ukuman inutowongo doi kota-kota bunggono doi lipu motandak molata: doi Holon, Yahas, Mefaat,

²²Dibon, Nebo, Bet-Diblataim,

²³Kiryataim, Bet-Gamul, Bet-Meon,

²⁴Keriot, tukon Bozra. Saibino kota Moab, modoon tukon lolani, lapamo inukum.

²⁵Moab nabukuanan lapamo iloto, nabalakuasaan minanaso. Yaku, TEMENENO lapamo basilingan.”

²⁶TEMENENO bantil, “Kubaiyo ko Moab teali malangu, sabab yana babanggakene kobutongo doi Yaku. Yana naikon tonggoling-nggoling doi natuluean lalomo, tukon mian kokumbite.

²⁷Bolikonno lolukoo Moab mokokumbite ko Israel miano tukon basalitakene kabi-kabi yanila ilako polaing kopondikuk-pondikuk?

²⁸Komuyu modungoliyo ko Moab, tinggalemo kai kota-kota tukon dungolo doi bunggo batu buno tomisi malapi kaibaiyo kona telea doi buta motombing.

²⁹Komuyu babanggal tuuno! Yaku lapamo lengele komu babaggalan noano lokis, babanggal, tukon nalongasan komuyu!

³⁰Yaku, TEMENENO, toiyo komu babaggalan. Mubasilingan akiyo kotakoso, tukon mukakabai akiyo koalatino.

³¹Sabab doiya naikon Yaku kokiil kokobukuan tuuk komuyu saibino tuuk tukon mian daango doi Kir-Heres, mukota mobabasal.

³²Yaku naikon kokiiliyo tuuno modungoliyo ko Sibma baimokai modungoliyo ko Yaezer. Kota Sibma buno anggur mosinakakon kolanga-langano tuboi polong doi sembeleng Tobun Molino podonggon ko Yaezer. Bai diabudodoo kosaoh-saoh tempo pintal tukon naanggur saono lapamo minanas.

³³Sanangan mowokon-wookon kiyono luwedoi tano Moab momolumbang. Yaku makabai anggur paisuno tademo molomba luwedoi pakakas mopiise koanggur; akiyono koidan komian makabai anggur tukon sanaang wokoon.

³⁴Mian doi Hesybon tukon Eleale kokiil tukon nakokiilan ilongol polong doi Yahas, tukon koidan mian daango luwedoi Zoar lengele polong doi Horonaim, tukon Eglat-Selisia. Yanila kokiil sabab paisu doi Nimrim Paisu batango pangano doo mootimo.

³⁵Yaku naikon kubaiyo ko Moab miano natade mosua sosubakon doi tampat-tampat yanila sosubakon tukon tade mososubakon sosubakon doi yanila natemeneno. Yaku, TEMENENO, lapamo basilingan.

³⁶Saibino ko Kir-Heres nakasaan tukon saibino Moab saono minanas. Yaku susah akitoyo posaapon nandondong doo; Yaku buno mian mopuke kolagu doi suling.

³⁷Yanila saibino lapamo daluwo kona buuk doi oluno tukon najanggut, pokolonio kobotokono, tukon mapake toik kalung palosano susah.

³⁸Doi saibino kobonua kopapako bunggono tukon doi tano-tano lapang tolongol kokiilan. Sabab Moab lapamo Kupasayo buno gumbang moaki nainias.

³⁹Moab manaso tuuno! Buka maen namamana ko Moab! Yana kokiil sabab lapamo tinotulai tukon tinawan doi bangsa-bangsa pobikunggon. Yaku, TEMENENO, lapamo basilingan.”

⁴⁰TEMENENO bantil, “Buno tomisi Rajawali sambale tukon kapilo motebeleka, buno mo doiya meeng kobangsa naikon molubat tukon sambale ko Moab.

⁴¹Kota-kota tukon nabenteng-benteng naikon inalamo tukon nasuludadu naikon matakut buno boine moyase mosuung.

⁴²Moab naikon manas tukon akimo koidan nabuno meeng kobangsa, sabab yanila babangakene kobutongo doi Yaku.

⁴³Yanila pinosalanggon tukon buang tukon talong.

⁴⁴Mian modampasene kobutongo luwedoi naikon otuwong doi buang lalomo, tukon mosumbut luwedoi buangoo naikon tatalonggamo doi talong lalomo. Saibino doiya naikon teali doi tempo molapamo Kutataapkanggene tuuk momanase ko Moab.

⁴⁵Mian mobiol moakimo nabukuan taus mounggoli soopan doi Hesybon, bai kota doo sinuamo tukon kamali Tomundo Sihon doo kona konoaung. Lipu kallatano tukon Moab bunggulo lapamo aung manase, tano mian daango moiyase polobosi.

⁴⁶Silakamo ko Moab! Komodungoliyo sosubaiyo ko Dewa Kamos lapamo inakate tukon yanila napau-pau inakut salaku tawanan.

⁴⁷Bai oloyo doibundu Yaku naikon kindedeke kotano Moab nandondong. Yaku, TEMENENO, lapamo basilingan!” Doiyamo naikon ko TEMENENO nailakukon telhadap Moab.