Read Banggai YEREMIA 49 Bible Online

YEREMIA 49 - Banggai bible

YEREMIA 49

¹ Naiyamo ko TEMENENO nabinantil kokaliango Amon, “Bulaando Gad benseno nabuta inala tukon dinungoli mian daango mososubaiyo Dewa Milkom? Oila kai akiyonoko Israel miano koidan momoola belayo kona lipu doo?

²Bai naikon lubat kotempono Yaku kabaiyo modungoliyo ko Raba, pusat tano Amon doo, molongol kilisonan-kilisonan polobosian. Kota doo naikon teali manas tukon kampung-kampung potikunggon kabus tosua. Maka Israel naikon alayo koidan nabuta mian daango doi loluko moalayo.

³He Hesybon miano, pokokilio sabab Ai manaso! He boi-boine kota Raba, mandaungo! Pakemo toik kalung susaan palosano. Poobuleng dombalaa dosumai sabab binguno. Milkom mutemeneno naikon inakuto doi masakukonan polaing koimam-imam tukon saibino kosambu parentah!

⁴He komuyu moaki nasatia! Bulaando komuyu banggakene komu pepelakon-pepelakon momolumbang? Oila kosabapo komuyu mobalaanggene komu kaasaan? Bulanandokai kona molaan komuyu laate bantil baikon akiyo komeeng komian kai mobarani lobosio komuyu?

⁵Komuyu naikon kanakon kulokisan Yaku molubatene luwedoi saibino kopihak. Komuyu naikon obulen, suwe-suwele balausaha salamatene kobutongo susungo, tukon akiyono komo pototongikene komuyu koidan.

⁶Bai oloyo doibundu, bangsa Amon nandondong Kukindeke. Yaku, TEMENENO, lapamo basilingan.”

⁷ Naiyamo TEMENENO Mobabasal Konakuasa konabinatil kaliangano Edom, “Oilakai Edom miano aki napinikikon doi cara napandoian? Oilakai saibino kona pongotinau aki nabeena otinau doi yanila? Lapusokai yanila napandoian!

⁸He modungoliyo ko Dedan, poabali tukon obuleno! Potauso sapit. Yaku naikon akabuse katulunan Esau, sabab tempono Yaku ukume yanila.

⁹Kalu mian bapupui anggur saono sidutu daano kolabino, tukon kalu pondikuk lubat doi popook oloyo, yana tolongo oila kona minooton.

¹⁰Bai Yaku sapuwo bilisii katulunan Esau namilik tukon bukayo kolaasia tampat yanila nasapitan; yanila akimo namoola koidan sekeene kobutongo. Edom miano polaing utus-utus tukon yanila napokolanian-pokolanian, saibino inakatemo, akiyo komeeng komian mololos.

¹¹He Edom! Tinggalemo komu pau-pau tuboon doiya-Ku, Yaku naikon pialayo yanila. Sodiiyomo saibino komu bauntal daanon maangga doiya-Ku.

¹²Mian moaki namoola inukum doo, kanakon ukuman koidan, baimokai komuyu aki? Tantu komuyu sio moinukum!

¹³Yaku patotopi Kosambunggu susungo kosaksi baikon kota Bozra mian motinggalemo naikon tealimo tampat mominatakukon. Mian naikon kokumbite tukon pakeo kosambuno salaku totopi. Saibino kokampung potikungon naikon teali manas tuuk sidutu posidutukon. Yaku, TEMENENO, lapamo basilingan.”

¹⁴Yaku Yeremia, bantil, “He Edom, yaku matalima meeng kobil ita luwedoi TEMENENO. Yana kapatuwo kona bobitokon doi bangsa-bangsa tuuk sumboliyo yanila potongikene kosuludadu tukon basa-basadiamo tuuk lobosio ikoo.

¹⁵TEMENENO kabaiyo ikoo teali miuk tukon mian totulaiyo.

¹⁶Mubabanggalan oboliyomo ikoo. Akiyo kai komo matakutene komuyu buno musangkaan. Ikoo dungol doi batu anga-angato, modoon doi bunggul popuuto. Bai, maukai kukabaiyo mubonua doi tamapat motatandak tuuno, pokana kona katandak tomisi rajawali nabateleakonan, TEMENENO naikon manase ikoo luwedoi idoo. TEMENENO komo bantile saibino doo.”

¹⁷TEMENENO bantil, “Edom kamakono silakan naikon hebat tuuno tobikon sanba komian moalo idoo naikon nggingging tukon matakut.

¹⁸ Bunomokai Sodom tukon Gomora mominanas polaing kokampung-kampung potikunggon, bunomo koidan Edom. Akiyono komeeng komian kai naikon dungol koidan indaa. Yaku, TEMENENO, lapamo basilingan.

¹⁹Buno singa sumbut luwedoi bonggulung lalomo lolani ko Yordan Paisunobatango tukon lubat doi padang tampat domba nakanan, bunomo doiya Yaku na ikon lubat tukon kabaiyo Edom miano sosi-sosinggat obulen luwedoi yanila tano. Maka Yaku naikon lilike meeng komian mokatuaiyo parentayo bangsa doo. Inde kai moola pinokanakon tukon Yaku? Indekai mobarani makabai palakala tukon Yaku? Oilakai daano kokatua moola lawane Yaku?

²⁰Tobikon doiya, dongoliyo oila komo lapamo Kubaniatene doi Edom miano, tukon oila motadukai Kulakukene terhadap modungoliyo kota Teman. Yanila napau-pau doi naikon sinumboli taus, tukon saibino komian naikon matakut.

²¹Kalukai Edom modoono, naikon tolongo kokalibutan mobunodoiya kona hebatan tobikon saibino kodunia nggabut; komo dungoliyo wookon-wokon naikon tolongo polong doi Tobun Gelagah.

²²Buno tomisi rajawali sambale tukon kapilo motobuka, bunodoiya komusuh naikon lubat tukon sambale Bozra. Doi oloyo doo suludadu Edom naikon matakuto buno boine moyase mosuung.”

²³ Naiamo ko TEMENENO nabinantil kaliangano Damsyik. “Modungoliyo kota Hamat tukon Arpad ngginggi tukon susah sabab molongol bilita lokis. Yanila noano aki namondok tukon unggot-unggot buno bokol doi tobun.

²⁴Modungoiliyo ko Damsyik teali miuk, tukon obulen matakut. Yanila nggolosokiton tukon mandarita buno boine moyase mo suung.

²⁵Kota monondok tukon sanaang doo diabudodoo kiis akiyono modungoliyo.

²⁶Doi oloyo doo tabo-tabono naikon mate doi nakota loloon-loloonno, tukon saibino kona suludadu nakatemo.

²⁷Beton-beton Damsyik naikon Kusuayo tukon kamali-kamali Tomundo Benhadad Kukopule. Yaku, TEMENENO Mobabasal Konakuasa, lapamo basilingan.”

²⁸Naiyamo ko TEMENENO nabinantil kaliangano Kedar benseno tukon lipu-lipu Hazor nakinuasai, molapamo tomundo Babel Nebukadnezar laate, “He Nebukadnezar, lobosiomo Kedar benseno tukon lopuomo komian daango doi tolopot sembeleng!

²⁹Lampaseno kona domba piniala, unta, tukon yanila nasandung-sandung tukon saibino koantoko, tukon wokonio doi yanila, ‘Teror mobilingiyomo komuyu!’

³⁰He komuyu Hazor miano! Yaku, TEMENENO, bantil: Mosobit potaus biol, tukon posapit. Nebukadnezar tomundo Babel baniatenemo tuuk molobosiyo komuyu. Yana bantil,

³¹‘Ayo maju! Maimo nda lobosio mian daango molasayo sanaang tukon aman doo. Yanila nakota aki natolindungi sabab akiyo kotataapon babasal tukon akiyo koposembango.’ ”

³²TEMENENO bantil koidan doi Nebukadnezar, “Lampasemo kounta-unta tukon sasaibino yanila naiyayon piniala! Mian daango doo nabuuk pinatol palus naikon Kusakukene doi yaa-yaa. Yaku naikon lubatenemo kosilakaan doi yanila luwedoi saibino kopihak.

³³Hazor naikon tampat totinggal tuuk sidutu-posidutukon tukon teali tampat asu mosolot nasapitan. Akiyo komeeng komian kai naikon modungol indaa koidan. Yaku, TEMENENO, lapamo basilingan.”

³⁴Aki namalumbit Zedekia teali tomundo Yehuda, TEMENENO Mobabasal Konakuasa basilingan doi yaku tano Elam kaliangano.

³⁵TEMENENO bantil, “Yaku naikon akateo saibino komo pandoi bapanah mokabaiyo ko Elam bukuan tuuno.

³⁶Yaku naikon mopuukene mombuul doi Elam luwedoi saibino kojulusan, tukon poalasene komo dungoliyo doi yaa-yaa sulano akiyo komeeng kotano moaki nailuboti mian mobiol-biol luwedoi Elam doo.

³⁷Yaku naikon kabaiyo ko Elam miano matakutene komusuh moiyase akateo yanila. Yaku naikon nggimalo tuuno yanila tukon naikon mulutake yanila. Naikon Kukapatuwo tukon naikon kosuludadu molobosiyo yanila sampe yanila kabus tuuno saibino.

³⁸Tomundo-tomundo tukon sambu-sambu yanila naikon Kulutake, tukon doi yanila natano naikon Kukendenge Daku dungolan.

³⁹Bai oloyo doibundu, Elam nanondong naikon Kukinendeke. Yaku, TEMENENO, lapamo basilingan.”