Read Banggai YEREMIA 5 Bible Online

YEREMIA 5 - Banggai bible

YEREMIA 5

¹He modungoliyo ko Yerusalem, palesayo kololoon-loloon doi mukota! Unggoliyo doi yayaa, tukon sakisiiyo susuumu. Palesayo doi kota doo lalomo oilakai daano komeeng mian mojujur moberusaha setia doi Mian Bisa. Kalu daano, maka TEMENENO naikon ompunio ko Yerusalem.

²Komuyu bantil baikon komuyu sosubaiyo TEMENENO, banggokai komuyu akiyo komakisuddoo buno doiya.

³Konatutuan TEMENENO motuntute doi yamo satian. TEMENENO bobokiyo komuyu, bai komuyu aki popadulio. Yana manase komuyu, bai komuyu aki naiyase inotunggul. Konoamuyu motikas, tukon aki nayase babolii luwedoi mulalim-lalim.

⁴Yaku pikikene, “Ah yanila tolongokai rayat moaki natoiyo ko oila-oila. Yanila natindakan longas, sabab aki natoiyo oila komo minooton tukon TEMENENO Mian Bisa natinuntut luwedoi yanila.

⁵Monondok yaku taus doi saibino kopambasal, tukon basilingan tukon yanila. Tantumo yanila toiyo oila ko TEMENENO Mian Bisa naminooton tukon natinuntut luwedoi yanila.” Bai, yanila saibino koidan aki nayase TEMENENO moparentayo; yanila aki nayase taat doi Yana.

⁶Doiyamo kosababpo yanila naikon singa akateo luwedoi mosolot, tukon asu lobo luwedoi padang bone mobendi-bendinge. Harimau naikon malapaso unggoliyo konamusuh lolani doi yanila nakota-kota, tukon samba komian mosumbut naikon sokuwo. Saibino doo teali sabab yanila badaango momakabai lalim, tukon sidutu totonggulunge ko Mian Bisa.

⁷TEMENENO bantil, “Bulaando sio Yaku ompunio Daku mian nalalim-lalim? Yanila tinggalemo Yaku tukon sosubayo mobolikon Mian Bisa. Yaku mebee kinaan doi yanila sampe yanila bobosul, bai yanila baloloa, tukon idan dutio komo baloloa-baloloa.

⁸Yanila buno adalan langgilo momalanak tukon bukuan konanapusu; suwe-suwele memetene kotulano naboloki.

⁹Oilakai aki namoolakene Yaku ukume kobangsa mobuno doiya doo tukon abalinggene oila yanila molapamo lakukene?

¹⁰Yaku naikon mobitokon musuh tuuk molusake yanila naanggur asino, bai tuuk bolikon momanase. Yaku naikon sumboliyo musuh doo napatolio yanila naanggur langano doibata-batango, sabab langa-langano doo bolikon koonggu.

¹¹Israel Naumat tukon Yehuda tutuu lapamo hianatio Yaku. Yaku, TEMENENO, lapamo basilingan.”

¹²TEMENENO Naumat bantilemo aki nabisa kaliangano TEMENENO. Yanila bantil, “Ah, Yana aki naikon namakabai oila-oila. Kita naikon aki nakana silaka tukon akimo koidan naikon namangalami polobosian kabai malaalan.

¹³Anggenemo nabi-nabi doo mombuul tolong, sabab TEMENENO nateteba akiyo doi yanila.”

¹⁴Maka TEMENENO Mobabasal Konakuasa bantil doiyaku, “Yeremia, sabab mian badaango basilingan buno doiya, maka yanila naikon kanakono silakaan mololoi yanila aki naikon nateali. Yaku naikon tealikene Daku bantilan-bantilan buno aung doi suumu lalomo. Bangsa nia naikon buno kayung sinua, tukon aung doo naikon suayo yanila sampe kabus.”

¹⁵He umat Israel, TEMENENO daanon molubaton meeng ko bangsa luwedoi lipu moddoon tuuk molobosiyo komuyu. Bangsa doo tambuuno doi lolukoo konasilingan aki potingonio. Yanila bukuan tuuno,

¹⁶tukon yanila natolopanah-tolopanah tambongan barani; yanila mangakate akiyo konaseang.

¹⁷Yanila naikon akabuse kona buta hasilo tukon mukinaan maka akateo kumu pau-pau. Saapi piniala tukon mudomba-domba yanila naikon tembele, tukon anggur asi-asino maka muara naikon batang-batango yanila manase. Kota-kota moano konabenteng komuyu mobalanggene naikon yanila manase.

¹⁸TEMENENO bantil, “Maukai buno doiya doi tempodoo kai Kuumat aki naikon Kulopuwo.

¹⁹Bai kalu yanila masadai bulaando Yaku lakukene saibino doo doi yanila, bontiikene he Yeremia, baikon bulaando yanila tinggale Yaku doi yanila nalipu susuungo tuuk mangangga doi bangsa bailon nailah-ilah, bunomo koidan yanila naikon teali ata mian badaang molubat doi lipu bailon.”

²⁰TEMENENO sumboliyo yaku pelenggene Kona teteba nia doi Yakub nakaturunan modungol doi Yehuda.

²¹ “Ndongolio, he komuyu mian longas tukon donggang! Komuyu daano komatano bai aki namokita, daano kotolingaino bai aki namolongol!

²² Yakumo ko TEMENENO bulaando komuyu aki namatakutene doi Yaku? Siokai komuyu mbombokon sabab doi Yaku! Yakumo komo kubaiyo kotobun bibilo teali kotubon kalatano moaki namoola nalisiyo tuuk sidutu-posidutukon. Tobun moola liabokan tukon bobokolan laate kona makasangan, bai akinamoola nalisiyo kokalalatan doo.

²³Bai komuyu motikas konoamiu tukon yase momalawan komuyu lapamo tasalah tukon tinggale Yaku.

²⁴Aki naidan komuyu neneeke tuuk moodotio Yaku, banggokai Yakumo molubatene koudan, mau doi tumbeno maukai doi bundu tempo udan. Yakumo koidan mobeena doi komuyu tempo bapupuian samba kotaun.

²⁵Bai komu lalim-lalim doiyamo mohalangiyo saibino komonondok tobikon komuyu aki pomarasakan.

²⁶He Daku umat doi antara komuyu daano komian-mian molokis. Bunokai mian mottiili tolong mopinasang tuuk malako tomisi, bunomo doya yanila pasange kotalong tuuk palako banggapi.

²⁷Buno mounggoliyo kotomisi obosiyo kona telea tukon tomisi, bunomo koidan yanila otokiyo yanila nabonua tukon barang-barang moinokoli. Bunomodoya yanila teali balakuasa tukon kaasa,

²⁸maka malanak tukon monondoko. Yanila nakulokisan akiyo kona kallatan. Yanila aki nalakukene kokaadilan doi Pau-pau tuboan naurusan lalomo tukon aki nabelayo komian-mian mopinipik kona hak.

²⁹Bai, Yaku, TEMENENO naikon ukume yanila sabab saibino doo; Yaku naikon komobalase bangsa nia nakakabai-kakabai:

³⁰Meeng kolobo mohebat tuuno tukon mominatakuton lapamo teali doi lipu nia:

³¹nabi-nabi bakakala, imam-imam leleaniyo mololoi nakamauan susungo tukon komuyu Daku umat naikon yase langge doo. Bai oila naikon komuyu lakukene kalu laatemo kooloyo doi bunduno?”