Read Banggai YEREMIA 50 Bible Online

YEREMIA 50 - Banggai bible

YEREMIA 50

¹Naiyamo ko TEMENENO nateteba doi yaku kokaliangano kota Babel tukon modungoliyo,

²“Obosiomo palosan tukon pobabontilanggene langge nia! Merodakh natemeneno lapamo minanas, tukon natimbalang-timbalang mobaloa pomapasaimo tukon napilogot-pilogot tinotulaimo tuuno.

³Meeng kobangsa luwedoi lembet naikon lubat molobosiyo Babel tukon kabaiyo tano doo teali padang lalomo. Bangkapi tukon iyayon naikon obulen, tukon akiyono koidan moyase dungol indaa.”

⁴TEMENENO bantil, “Doi tempodoo Israel miano tukon Yehuda naikon lubat polaing-laing tukon kokiil, unggoliyo Yaku, yanila na Mian Bisa.

⁵Yanila naikon masadaikene kololoon dombalaa Sion, maka ampakono loloiyo julusan doo. Yanila naikon makabai perjanjian mobisa tukon Yaku, tukon naikon tataap yana tanio.

⁶Daku umat andean domba napadagai-padagai mosodiomo nalapus doi bunggul bailon tukon akimio toiyo koidan yando yanila nabonua.

⁷Yanila ilobosi tukon sinakisaa saibino moposenggene tukon yanila. Daku umat kona musuh-musuh bantil, ‘Oila konda kinubai, aki nasalah, sabab mian daango doo lapamo makabai lalim doi TEMENENO. Yanila nambumbu mangangga doi TEMENENO, jadi siokai yanila doo tataap setia doiya-Na.’

⁸ He umat Israel, obulemo luwedoi Babel! Komuyu, kotumbu-tumbeno sio potaus sulano kobailon naikon matundu.

⁹Yaku naikon salakanggene kona kadaang bangsa mo buku-bukuan luwedoi lembet sulano yanila lobosio ko Babel. Yanila naikon atule kona balisan tuuk yanila polobosi lawane ko Babel tukon nalulungguiyo. Yanila daanon pandoi bapanah-panah kona panah akiyo komo salah.

¹⁰Babel naikon ilampas, tukon molampase naikon mangala saibino tukon noano namongiasan. Yaku, TEMENENO, lapamo basilingan.”

¹¹TEMENENO bantil, “He Babel miano, komuyu ndikuke Daku umat. Komuyu sanang osuut-osuut buno adalan monggedek tukon buno saapi modaano baputi bulung.

¹²Bai komuyu naikon teali bangsa moakiyo tuuno koalatino doi antara saibino kobangsa. Mukota susumu mobabasal doo naikon tinotulai tukon inokimaa. Mutano naikon teali padang lalomo moakiyo komo tubo tukon motuul.

¹³Sabab Yaku nggimal, maka Babel teali manas tukon akiyono komo dungoliyo. Saibino komo alo idoo naikon nggingging tukon matakut.

¹⁴He komuyu pamanah-pamanah! Atulemo komu balisan tuuk boilingiyo tukon lobosio ko Babel. Lapasemo saibino komu panah matano dombalaa Babel, sabab yana lapamo makabai lalim doi Yaku.

¹⁵Wokenggene pokilisanio polobosian potikunggon nakota nia! Diabudodoo Babel menyeramo. Kona beton-beton lapamo linusak tukon tolubango. Yaku daanon kabaiyo kopabalaso terhadap Babel. Sabab doiya lakukenemo yanila buno yanila molakukanggene doi mian badaang bailon.

¹⁶Inai mosodiikene komian mobasakakon kabai bapupui doi tano doo. Saibino komian lubat modungol idoo naikon mule doi tano, sabab yanila matakutene kosuludadu momolobosi.”

¹⁷TEMENENO bantil, “Israel miano buno meeng kotambuno kodomba singa molelenggene tukon poalasene. Tumbe-tumbeno yanila tomundo Asyur lobosiyo, Nebukadnezar tomundo Babel kokoliyo yanila buku-bukuno.

¹⁸Tobikon doiya, Yaku, TEMENENO Mobabasal Konakuasa, Mian Bisa Israel, naikon ukume Tomundo Nebukadnezar tukon naminatakuton pokakana buno Daku ukuman tomundo Asyur.

¹⁹Yaku naikon abalinggene Israel miano doi yanila natano. Yanila naikon kaan luwedoi hasil tano Karmel Bunggulo butano tukon lipu Basan. Yanila naikon kinobosuli hasil lipu Efraim tukon Gilead butano.

²⁰Doi tempodoo Israel tukon Yehuda naikon bilisih luwedoi lalim, sabab Yaku naikon ompunio mian daango molapamo Yaku salamatene. Yaku, TEMENENO lapamo basilingan.”

²¹TEMENENO bantil doi meeng kobangsa moluwedoi lembet, “Lobosiyomo modongoliyo ko Merataim tukon Pekod. Akateo tukon lusayo yanila. Lakukene Daku parentah. Yaku, TEMENENO lapamo basilingan.”

²²Polobosian bulungan buno gulug doi tano, tukon tealimo babasal kona manasan.

²³Posaapon kodunia Babel takulio sampe manas, bai diabudodoo patakulidoo molotomo! Posaapon kobangsa sosibong molongol oila komo lapamo teali tukon tano doo.

²⁴TEMENENO bantil, “Babel, ikoo lawane Yaku, sabab doiya ikoo kanamo doi talong lalomo Yaku mopasange tuuk ikoo, bai ikoo aki nasadaliyo.

²⁵Daku gudang sinapang lapamo Kubukayo tukon nggimal-nggimal Kukaluale sinapang-sinapang doo, sabab Yaku TEMENENO Moinakatandak Tuuno tukon Mobabasal Konakuasa sio nalakukene meeng kolimang doi Babel.

²⁶Lobosiyomo ko Babel luwedoi saibino kotampat, tukon lusayo kogandum nagudang-gudang! Potongikene kobarang-barang moi lambas buno komuyu potongikene kogandum! Manasemo tano doo! Inai daano kolabino!

²⁷Akateomo saibino kona suludadu! Kateomo yanila! Silakamo bangsa Babel! Lubato kotempono yanila inukum!” (

²⁸Mian daango moobuleng doi Yerusalem luwedoi Babel mosalitayo bulaando ko TEMENENO nda Mian Bisa mobalase ko Babel miano napalabuatan telhadap TEMENENO Na Bonua.)

²⁹ TEMENENO bantil, “Sumboliyo saibino tolopanah lobosio ko Babel. Bitekene samba komian mopandoi bapanah. Boilingio kota doo tukon inai mosobiiyo meeng komian doo motongosodii. Balase saibino kona palabuatan tukon yana nailakukon pokakana tukon nakalakuan, sabab yana makabaimo kulanggajal terhadap Yaku, Momoliyous, Mian Bisa Israel.

³⁰Doi oloyo doo kona tabo-tabo naikon mate doi nakota doi loloon loloon, tukon saibino kona suludadu ilopu. Yaku, TEMENENO, lapamo basilingan.

³¹Babel, ikoo todulo babanggaal! Tobikon doiya Yaku, TEMENENO Moinakatandak Tuuno, Mian Bisa Mobabasal Konakuasa, lawane ikoo. Laatemo kotempono Daku ukumano ikoo.

³²Mubangsa mobabanggaal doo naikon motulunge ikoo tuuk kokondong, Mukota-kota naikon kusuayo tukon saibino doi napokolanian naikon nakabus.”

³³TEMENENO Mobabasal Konakuasa bantil, “Israel miano tukon Yehuda miano todokon. Saibino motawane yanila dagaiyo yanila kalas-kalas tukon aki naiyase sodiiyo yanila.

³⁴Bai Yaku mosalamatene yanila doo bukuan, Kosambunggu TEMENENO Mobabasal Konakuasa. Yaku susuungu naikon mobaladuanggene yanila napalakala tukon babayo kodamai doi dunia bungguno. Bai doi Babel miano naikon Kulubatene konggabutan tukon matakutan.”

³⁵TEMENENO bantil, “Silakamo ko Babel polaing korayat tukon sambu pamarentah tukon yanila namian mopandoi tuuno!

³⁶Silakamo konabi-nabii Babel! Yanila balaka-kala tukon longas. Silakamo kosuludadu Babel mobarani! Bukamaen yanila namatakutan!

³⁷Manasemo konaadalan tukon kona kereta polobosian! Silakamo kona suludadu-suludadu tinambo. Bukamaen yanila namiukan! Manasemo ko Babel nakasaan! Lambasemo kona buat!

³⁸Kotuulemo saibino kopaisu batango tukon naasi! Sabab, Babel momoonoh tukon pilogot-pilogot mominatakuton, mokabaiyo saibino mososubaiyo teali tindo.

³⁹ Tobikon doiya ko Babel naikon teali tampat setan-setan tukon roh-roh molokis tukon tomisi-tomisi unta. Tuuk sidutu posidutukon akiyo naikon komian moyase dungol koidan indaa.

⁴⁰ Bunomokai Yaku manase ko Sodom tukon Gomora polaing kokampung-kampung mololani, buno koidan Yaku naikon manasemo ko Babel. Akiyono komeeng komian doo naikon dungol koidan indaa. Yaku, TEMENENO lapamo basilingan.

⁴¹Meeng kobangsa mobukuan daanon molobosi luwedoi tano modoon doi lembet. Yanila lubat polaing kotomundo badaang tuuk polobosi.

⁴²Yanila kona sandata panah tukon pandong; yanila tolonggimolong tukon aki natingonio koampun. Buno tobun lalo bulungan, bunomokai adalan lakonan nalalo yanila daano mosinusunggan tuuk mamaju lobosio ko Babel.

⁴³Lengele bilita doo, tomundo Babel teali akimo nabukuan. Yana kona palasaan matakut, tukon mandarita buno boine moyase mosuung.

⁴⁴Buno singa sumbut luwedoi bonggulung lolani ko Yordan Paisunobatango tukon lubotio kopadang domba natampat kaanan, bunolakon Yaku, TEMENENO, naikon lubat tukon kabaiyo Babel miano obulen luwedoi yanila nakota tukon sosi-sosinggat. Maka Yaku naikon lilike komeeng kokatua tuuk moparentayo bangsa doo. Indekai komo moola pinokanakon tukon Yaku? Indekai kobarani makabai palakala tukon Yaku? Oilakai daano kokatua momoola lawane Yaku?

⁴⁵Tobikon doiya, pondongoli oila komo lapamo Kubaniatene telhadap kota Babel, tukon oila komo tadukai Kulakukene telhadap modungoliyo. Yanila napau-pau doo naikon sinika taus, tukon saibino komian naikon matakuto.

⁴⁶Kalukai Babel otuwong, naikon tollongo kalibutan mohebat tuuno tukon tobikon unggoto posaapon kodunia; modungoliyo nawokonan-wookonan naikon bangsa-bangsa bailon lengelemo.”