Read Banggai YEREMIA 51 Bible Online

YEREMIA 51 - Banggai bible

YEREMIA 51

¹TEMENENO bantil, “Yaku naikon kapatuwo komombuul mopuul molusayo taikon Babel tukon taikon doi modungoliyo.

²Naikon Kusumboliyo mian daango molulubaton naikon momanase ko Babel buno mombuul mobengakene kogandum kulito. Doi oloyo doo silakaan yanila naikon lobosio tano doo luwedoi saibino kopihak tukon sapuwo bilisih.

³Inaimo beena kasampatan doi nasuludadu tuuk mopanakene kona panah matano kabai banggakene kona pakean polobosian. Kona pau-pau mongula inaimo sodiikene tubo. Manasemo saibino kona suludadu!

⁴Yanila naikon pakolong babasal tukon mate doi yanila nakota loloon-loloono.

⁵Yaku, TEMENENO, Mian Bisa Mobabasal Konakuasa, Mian Bisa Moliyous Israel, aki naikon natinggale ko Israel tukon Yehuda, maukai yanila lapamo mokabai lalim doi Yaku.

⁶Salamatene kobutomu! Obulen luwedoi Babel, inai nasampe komuyu talaing inakate sabab nalalim. Sabab naiyamo kotempono Yaku balase ko Babel nakolukisan, tukon ukume yana pokonoimo kona kakabai.

⁷ Babel budodoo buno galas mosoni Daku tinaani tukon kabaiyo posaapon kodunia malangu. Bangsa-bangsa monginum anggur luwedoi galas doo tobikon yanila teali tindo.

⁸Bai sosinggat Babel otuwong tukon mapasah. Kokiiliyo yana, tukon unggoliyo kopakuli tuuk napakol-pakol, banggokai yana moola tangalin.

⁹ Mian molulubaton tukon dungol indaa bantil meeng tukon bailon, ‘Kita lapamo balausaha tulungio ko Babel, bai toliiso! Lobian komondok kita tinggale tano nia tukon mule doi nda tano suwe-suwele. TEMENENO lapamo ukume tuuno ko Babel, tukon yana manase mo tuuno.’ ”

¹⁰TEMENENO naumat bantil, “TEMENENO lapamo tudoikene baikon kita daano taikon doi mobisa. Maimo doi Yerusalem tukon salitayo indaa oila komo lapamo TEMENENO nda Mian Bisa nailakukon.”

¹¹TEMENENO lapamo lolubute tomundo-tomundo Media, sabab Yana naikon momanase ko Babel. Doiyamo Konaniat Yana balase kakabai mian daango momanase Kona bonua. Saibino koletnan pasukan polobosi mamparentakene, “Taduyo kopana matano! Sadiayo kotombide!

¹²Benamo paloosan tuuk lobosio ko Babel nabeton-beton Kabukuanggene badagaian. Tampat kanggene kopadagai. Basadiamo molobosi!” TEMENENO lapamo laksanakene oila Yana binaniaton telhadap Babel miano.

¹³ Tano doo kaasa tuuno tukon badaang kona paisu batango, bai tempo natuboan kabuso; kona tuboan napupusan lubato.

¹⁴TEMENENO Mobabasal Konakuasa batotopi butongo susungo kosakiisi baikon Yana naikon mokilim mian pokakana kobetek kona kadaang tuuk molobosi Babel, tukon yanila naikon mowokanggene kowokonan komanangan.

¹⁵TEMENENO pasikatakayo kodunia tukon Nakuasa, kabaiyo kodunia tukon Napandoiyan, tukon bukayo kotimbu tukon Napandoiyan.

¹⁶Tolongo tukon beena parentah, bulungano kopaisu doi dapaang. Luwedoi dunia bundu-bunduno linubaton kobunom, tukon Yana kapatuwo komombuul luwedoi tamapat mangabosan.

¹⁷Kitayo saibino doo kobangkapi sadalo, baikon yana longas tukon akiyo kapangalatian. Saibino kotukang mosoni lapuso, koduduso, sabab pilogot timbalango nakinubai doo palsu tukon akiyo koaansan.

¹⁸Pilogot-pilogot doo akiyo koanggano, patu nasinisiboli tukon tinotulai. Kalukai lubat kotempono yanila naikon silaka.

¹⁹Yakub na Mian Bisa aki nabuno pilogot-pilogot doo; Yana komo pasitakayo saibino kolobo. Kosambuno doiyamo saibino TEMENENO Mobabasal Konakuasa; Yana lapamo lilike Israel teali Naumat.

²⁰TEMENENO bantil, “Babel, ikoo bunokai palu, Daku sandata tuuk polobosian. Ikoo, Kupakeo tuuk momanase molobosiyo kobangsa-bangsa tukon batomundoan-batomundoan.

²¹Ikoo Kupakeo tuuk mangakate adalan tukon molokitio.

²²Yaku bitekene ikoo tuuk moakateo komalane tukon boine, motua maukai motabokon, boine tukon pau malane.

²³Yaku biteke ikoo tuuk molopuwo kopadagai tukon iyayon piniala, patani tukon nasaapi pajeko, mobalakuasa tukon naletnan-letnan.”

²⁴TEMENENO bantile, “Sakisiiyomo susungo bulandoo Yaku diabudodoo mobalase ko Babel tukon modungoliyo saibino kokulokisan yanila molakukene telhadap Yerusalem.

²⁵He Babel ikoo buno bunggulkon momanase posaapon kodunia. Bai Yaku, TEMENENO, naikon lawane ikoo. Ikoo naikon Kubiniton tukon Kunggolinggene tukon Kusodiikene namosua teali ambata.

²⁶Akiyono komeeng kobatu naikon mopiniake koidan luwedoi mumanasan tuuk momambangun. Ikoo naikon teali buno padang lalomo tuuk sidutu posidutukon. Yaku, TEMENENO lapamo basilingan.”

²⁷“He tomundo moluwedoi lembet! Beenamo polosan tuuk molobosiyo! Puuke kotrompet sulano kobangsa-bangsa nalenggele! Atulemo kobangsa-bangsa doo tuuk polobosi molawane ko Babel! Sumboliyo kobatomundoan Ararat Mini tukon Askenas namolobosi. Poodukemo komeeng kotalenga tuuk mopimpine kopolobosian doo. Atulemo koadalan buno betek tambuno konakadaang.

²⁸Sadiayomo kobangsa-bangsa tuuk polobosi lawane ko Babel. Uange kotomundo-tomundo Media polaing komo balakuasa tukon laka-lakaino tukon suludadu luwedoi saibino kotano yanila mokuasaiyo.

²⁹Buta mombomboko tukon ngioko sabab yaku daano molakukene daku lencana tuuk motealikene ko Babel tamapat moaki nateali kobangkapi dungoliyo.

³⁰Suludadu Babel belentimo polobosi tukon dungol doi benteng-benteng. Yanila lapus kona baranian tukon akimo nabukuan. Kota tataapono-tataapono babasal minanaso, tukon kobonua-bonua sinua.

³¹Pobitokon-pobiton doo abulen tundu-potundu tuuk mobotikene doi tomundo Babel baikon kona kota ilobosiomo luwedoi saibino kojulusan.

³²Lipu pintasan musuh dungoliyomo, tukonbenteng-benteng palataan sinua. Suludadu Babel teali pusing.

³³Aki namalumbit koidan yanila ilungguimo tukon musuh tudoi-tudoingiyo buno doi tampat motudongian gandum. Yanila TEMENENO Mobabasal Konakuasa, Mian Bisa Israel lapamo basilingan.”

³⁴Yerusalem minanas tukon tomundo Babel kabus kaane; kota doo yana kosonngkanggene buno nai mokosongkanggene kobotol. Buno meeng koiyayon babasal, yana molemese ko Yerusalem tukon tiano antoko tukon saibino komomondokon luwedoi kota doo, maka sakukene kolabino.

³⁵Modungoliyo kosion, bantilemo, “Biliisi Babel kanakon nakulokisan moilakukanggon telhadap doi kita!” Modungoliyo ko Yerusalem, bantilemo, “Biliisi Babel nakanakon pandalitaan mokinonoikon doi kita!”

³⁶Tobikon doiya TEMENENO bantil doi modungoliyo ko Yerusalem, “Yaku naikon baladuanggene komu palakala tukon balase mumusuh-musuh nakakabai doi komuyu. Paisu naluwean tukon paisu batango Babel naikon Kukotiise.

³⁷Tano doo naikon teali buno lipu asu mosolot nasapitan. Mian lasayo matakut nakitayo, tukon akiyo komeeng komian kai moyase dungol indaa.

³⁸Babel miano tataluang buno singa, tukon ngaaton buno singa napau.

³⁹Daanon yanila moyase tuuno kaan, Yaku naikon sodiayomo kosidakan tuuk yanila, tukon kabaiyo yanila malangu tukon pusing sampe moolo tukon aki mo nabangun-bangun koidan.

⁴⁰Yanila naikon Kubabayo tuuk tinembel buno domba napau, mbembe, tukon domba langgilo. Yaku, TEMENENO, lapamo basilingan.”

⁴¹TEMENENO bantile, “Babel mongginal doi posaapon kodunia lapamo linunggui tukon dinunggolimo! Bukamaen tano doo tuuk kobangsa-bangsa matakutene.

⁴²Tobin paisuno toduapo doi Babel; kobokol-bokolo kokungan lupayo tano doo.

⁴³Kona kota-kota teali lipu mominatakuton, buno padang lalomo momotuul. Akiyo komian moiyase dungol kai mo alo idoo.

⁴⁴Bel dewa tano Babel naikon Kuukume. Naikon Kukabaiyo yana abalinggene oila komo lapamo yana lampase. Bangsa-bangsa akimo naikon nasusubayo yana koidan. Beton-beton tolubango doi Babel.

⁴⁵Tobikon doiya obulengo luwe indaa, he umat Israel! Salamatene kobutomu luwedoi Kunggimalan motududulo.

⁴⁶Inai momatakut kai manasal sabab salita-salita komuyu molengele. Samba kotaun sasabul kobilita moposasala bilita nggimalan kaliangano doi tano doo lalomo tukon tomundo-tomundo kaliangano mopolobosi meeng tukon bailon.

⁴⁷Anggayomo, kotempo naikon laatemo Yaku ukume kopilogot-pilogot Baal. Posaapon tano doo naikon tinotulai, tukon sasaibino komodungoliyo inakate.

⁴⁸ Saibino kolobo doi timbu tukon doi buta naikon sanaang kokuweis kalukai Babel otuwongo doi bangsa moluwe doi lembet lubat tuuk momanase.

⁴⁹ Posaapon kodunia badaang komian lapamo mate inakate sabab Babel, bai diabudodoo Babel naikon otuwong tolongo Israel miano moinakate mate. Yaku, TEMENENO lapamo basilingan.”

⁵⁰TEMENENO bantil doi Israel miano doi Babel, “Komuyu luputo luwedoi mangakatean! Jadi, tauso diabudodoo! Inai mototili! Maukai komuyu modoon luwedoi bonua neneeke Yaku, mu TEMENENO tukon doi Yerusalem.

⁵¹Komuyu bantil, ‘Kami tinotulai tukon inakamaa; kami akimo maimangga sabab mian daango molulubato osulongiyo koruangan-ruangan moliyous doi TEMENENO Na Bonua lalomo.’

⁵²Nah palaatikanggene Dakubantilan nia. Naikon lubat kotempono Yaku ukume kopilogot-pilogot Babel. Posaapon sabab pakolon babasal.

⁵³Maukai Babel laate liba doi timbu tukon bangune kona palatahanan moaki nailaat, Yaku tataap naikon kapatuwo komian tuuk molusake. Yaku, TEMENENO, lapamo basilingan.”

⁵⁴TEMENENO bantil, “NDongoliyo! Doi Babel mian kiliison tukon kokiil poloonggene doi tano doo motealimo manas.

⁵⁵Yaku daanon momanase ko Babel tukon bokol atadeo kolalo-lalo molamemo. Musuh lubat buno bokol momungan, tukon nasuludadu molobosi tukon kekeisonan polobosian.

⁵⁶Yanila lubat tuuk lusayo ko Babel, malako nasuludadu-suludadu tukon aloyo yanila nasandata-sandata. Yakumo TEMENENO mohukume kokulokisan, tukon Babel naikon kubalase pokakana tukon napalabuatan.

⁵⁷Yaku naikon languwe saibino kosambu pamarentah Babel — saibino komo pandoi-pandoi, komo katuaiyo tukon suludadu. Yanila naikon akimo nabangun-bangun koidan, tokolomo tuuk sidutu-posidutukon. Yaku lapamo basilingan; Yakumo ko tomundo, Yaku TEMENENO Mobabasal Konakuasa.

⁵⁸Beton Babel momonggol naikon kumanase tobikon nateali rata tukon buta. Tataapono babasal mopotondoki naikon kabus kusuayo. Palasumo tolong bangsa-bangsa napakadakan, sabab saibino yanila nabalimangan haslio naikon tosua doi aung. Yaku, TEMENENO Mobabasal Konakuasa, lapamo basilingan.”

⁵⁹Tomundo Zedekia mokawale doiyamo Seraya Neria napau Mahseya natumbu. Doi taun kosanggapo Zedekia tomundo Yehuda namaparentaan, Seraya lolainge Zedekia doi Babel. Maka yaku beena doi yana meeng kolimang.

⁶⁰Saibino kosilakaan naikon mokanakon doi Babel tukon langge-langge bailon kaliangano tanodoo lapamo kutulise doi meeng kobuku moginulung lalomo.

⁶¹Maka Yaku bantil doi Seraya, “Lapa ikoo polong doi Babel, usakanggene sulano saibino komo totulis doi buku nia lalomo moola ikoo basakene doi mian-mian doo imbali.

⁶²Lapa doiya sambeang bunonia, ‘TEMENENO, Ikoo lapamo bantil naikon kota nia Ikoo manase tobikon mau banggapi maukai iyayon kabus tuuno sidutu-posidutukon.’

⁶³ Nah, lapamo ikoo basakene nabuku nia antoko doi mian daango doo, ketene batu doi buku nia, maka sakukene doi Efrat Paisunobatango tanga-tangano,

⁶⁴maka bantil, ‘Bunonia naikon konatealian tukon Babel. Tano nia naikon tibus tukon akimo nakinita koidan sabab TEMENENO lubatene kosilakaan doi buunggono.’ ” Yeremia nabantilan-bantilan pupus dimbaa.