Read Banggai YEREMIA 52 Bible Online

YEREMIA 52 - Banggai bible

YEREMIA 52

¹Zedekia naumur lua kolono meeng kotaun salaata yana teali Tomundo Yehuda. Yana maparentah doi Yerusalem sungulo meeng kotaun kona kalumbit. Tinano sambuno Hamutal, Yeremia napau luwedoi kota Libna.

²Buno Tomundo Yoyakim, Tomundo Zedekia kai baladosa doi TEMENENO.

³TEMENENO nggimal tuuno doi modungoliyo ko Yerusalem tukon Yehuda miano sampe yana sikayo yanila tukon aki nalindungio yanila koidan. Zedekia nggimoliokai Nebukadnezar tomundo Babel,

⁴ sabab doiya Nebukadnezar tukon saibino napasukan polobosi lubat tukon molobosiyo Yerusalem doi tanggal songolo bituwon kosongulono taun kosiyono Zedekia namaparentaan lalomo. Yanila mokokondong palatanan doi kota tonggulungo, bangune kona beton molobosian

⁵tukon banggadudul kepunge kota doo polong doi taun kosongulono meeng Zedekia namaparentaan.

⁶Doi tanggal kosiono bituwon kosanggapo taun doo koidan, salata malalaan bunomo doiya kona hebatan tobikon akiyono tuuno kona kinaan,

⁷ kobeton kona musuh lusayomo. Popokoo, maukai ko Babel miano daanon moboilingio kota doo, saibino kosuludadu Yehuda dampasene kobutongo badombalaakon Yordan Pepelakono. Yanila mangala loloon moalo doi kamali asino, maka sumbut lolo doi tataapon babasal mopotamikene kolua kobeton doi lipu doo.

⁸Bai kosuludadu Babel lengele Tomundo Zedekia tukon lakoyo doi buta Yerikho. Saibino kona suludadu dampaso tinggale yana.

⁹Doibundu Tomundo Zedekia binaba doi Tomundo Nebukadnezar doi kota Ribla doi lipu Hamat.

¹⁰Doi kota doo koidan kona pau-pau ianakate doi matano salaano, tukon saibino kosambu pamarentah Yehuda ianakate tolong.

¹¹ Lapa doiya Zedekia matano tinuak, maka binoboi tukon binaba doi Babel. Indaa yana inusokon doi talunggu lalomo, tukon aki namoola sumbut luwedoi idoo sampe tempono yana mate.

¹²Doi tanggal kosongulo bituwon kolimano doi taun kosongulono sio lalomo Nebukadnezar tomundo Babel namaparentaan, lubato doi Yerusalem meeng komian kosambuno Nebuzaradan. Yana daanon pongotinau tukon kapala modagaiyo Nebukadnezar butongo susungo.

¹³ Nebuzaradan suayo ko TEMENENO Na Bonua, tomundo nakamali, tukon saibino komian mototingoni nabonua doi Yerusalem.

¹⁴Maka saibino kona suludadu lubange beton-beton kota doo.

¹⁵Doi bundu korayat modaano doi kota, doiyamo saibino komo pandoi balimang kosisano, mian daango motalais, tukon mian daango mobuleno taikon doi Babel miano, saibino Nebukadnezar akutemo doi Babel.

¹⁶Bai meeng koobos luwedoi rayat motalais tuuno tukon akiyo kona buat, tininggalo doi Yehuda, tukon sinumboli limange koanggur asino tukon asi-asi.

¹⁷ Sudong-sudong tambaga tukon kereta-kereta doi TEMENENO Na Bonua tukon bak tambaga Babel miano pasayo, maka saibino kona tambaga inakut doi yanila natano.

¹⁸Yanila koidan mangakut barang-barang nia: pasalak-pasalak, abu balabang nainabosan. Lampu pakaso-pakakaso, manggo-manggo, mangabosan iyayon mokinolot saono tuuk sosubakon, manggo-manggo tuuk mosuan kamangian, tukon saibino kobarang tambaga bailonggon mopinake tuuk doi upacara kaledaan.

¹⁹Barang-barang mosoni tukon suasa, tongusokon manggo-manggo pauno tukon bara nainabosan manggo-manggo tuuk iyayon nakinolot sauno nainabosan mosinosubakon, abu nainabosan, posiaino, manggo-manggo tuuk kamangian, tukon manggo-manggo tuuk batunano koanggur paisuno mosinosubakon saibinodoo Nebuzaradan komo alayo susungo.

²⁰Barang tambaga Tomundo Salomo mukinubai tuuk TEMENENO Na Bonua doiyamo lua kosudong kereta-kereta, bak tukon saapi songulolua motumbakke doibakkoo, saibino babarata, tobikon akimo natolimbang.

²¹Lua kosudong tambaga doo suwe-suwele pokakana kona katandak 8 meter, kobintingo 5,3 meter, tukon tanga-tangano kosong. Kotambangono nabondolongan 75 ko milimeter. Doi samba kosudong doo doi bunggono daano kosudong oluno kona katandak 2,2 meter. Potikungon sudong oluno-oluno doo daano komoinanam tukon palahiasan delima saono, saibino luwedoi tambaga koidan.

²³Delima saono doi samba kosudong oluno doo moinanam daano kosakat, bai tolongo siokolononoom komo tokita luwedoi bilit.

²⁴Mobolikon doiya Nebuzaradan malako Imam Babasal Seraya, Zefanya kona wakil, tolu komian padagai TEMENENO Na Bonua tataapono,

²⁵pitu kopongotinau tomundo susungo modaanon doi kota, talenga, wakil talenga mouluse kosuludadu nakapalaluan, tukon noom kolono komian mobabasakene bailon.

²⁶Saibino mian doo binaba doi Tomundo Nebukadnezar doi kota Ribla,

²⁷doi lipu Hamat. Imbali yanila sinakisaa, maka inakate. Bunomokai Yehuda miano daango inakut luwedoi yanila tano tukon binaba doi masakukonan;

²⁸saibino daano 4.600 komian. Nebukadnezar akute yanila tongobos-obos buno naia: 3.023 komian doi taun kopituno namaparentaan, 832 komian luwedoi Yerusalem doi taun kosongulono alu namaparentaan, tukon 745 komian Nebuzaradan akute doi taun lua kolono tolu Nebukadnezar namaparentaan.

³¹Doi tanggal lua kolono limabituwon songu lo lua doi taun tolu kolono pitu lalomo lapa Yoyakhin inakut doi masakukonan, Ewil-Merodakh teali tomundo Babel. Doi taun doo koidan yana tudoikene kona namasikanano doi Yoyakhin, tukon sodiyo yana doi taluungu,

³²maka lakukene tukon monondok. Yoyakhin bine kadudukan molobian tatandak luwedoi tomundo-tomundo bailon koidan mosinakukon doi Babel.

³³Yana bine isin mosoboliyo kona pakean talungguan tukon tuuk banggadudul doi natuboan nakalumbit yana moola kaan doi kamali, tukon samba kooloyo binee doiy tuuk nakapalaluan tuboan.