Read Banggai YEREMIA 6 Bible Online

YEREMIA 6 - Banggai bible

YEREMIA 6

¹Tauso pobiol, he Benyamin mian-miano! Potinggalemo ko Yerusalem! Puuke kotrompet doi Tekoa, tukon okoitio koaung isalat doi Bet-Kerem! Kasusahan tukon silakaan babasal mominatakuton luwedoi lembet.

²Kota Sion monondok tuuno, bai TEMENENO naikon manasema;

³penguasa-penguasa naikon makabai sandung imbali tukon nasuludadu. Potikunggon doi kota doo yanila naikon pasange yanila natenda-tenda, suwe-suwele doi tampat yana moyase.

⁴Yanila naikon bantil, “Ayo basadiamo molobosiyo ko Yerusalem! Mai nda lobosio nadodoa nia!” Bai doi bundu yanila naikon bantil koidan, “Wah, talambat! Oloyo tambuno kalipookan, mbombokouno tambuno bulusan.

⁵Kona monondokon kita lobosio doi tempo popook, tukon manase kota doo nabenteng-benteng.”

⁶TEMENENO Mobabasal Konakuasa lapamo maparentah penguasa-penguasa doo sulano natapeo kokayung-kayung tukon mokokondong bunggul-bunggul palatahanan tuuk molobosi Yerusalem. TEMENENO bantil, “Kota nia naikon Kuhukume sabab doi lalomo lapamo lakukene badaang lunggon kona kakarasan.

⁷Bunokai paisu naluwean tataap mosumbuton paisu monondok, bunomo kota doo tataap kohasilo Kulokisan. Tolongo bilita kakasalan tukon pondikukan tolong Daku ilongol luwedoi kota doo; pakol tukon panakit Kukitayo doi yayaa.

⁸He modungoliyo ko Yerusalem, tadukai saibino kasukalan doo teali poingotii doi komuyu! Inai sampe Yaku tinggale komuyu tukon Kuboliyo mukota teali padang bone moakiyo komian modungoliyo.”

⁹TEMENENO Mobabasal Konakuasa bantil doi yaku, “Israel naikon dinaalu sampe kabus buno anggur asino mosaoh lapamo pinupui saibino. Tobikon doya daanon modaano kotempo, salamatene kolabino.”

¹⁰TEMENENO timbiliyo, “TEMENENO, doi inde daku basilinganan, tukon inde mosio kuingotikene? Yanila motikas konoano tukon aki nayase palatikanggene. Yanila kokumbite tukon misikitene Komuteteba yaku mopelenggene doi yanila.

¹¹Munggimalan doi yanila koidan daano kobala doi butonggu lalomo. TEMENENO! Sulit tuuk motahane.” Maka TEMENENO bantil, “Sumbutemo nggimalan doo doi pau-pau doi loloon-loloon babasal tukon doi mian badaang momongula modaanon pototongi. Mala-malane tukon moluko naikon ilako, tukon mian motuamo kai aki naikon naluput.

¹² Yanila nabonua naikon binekon doi mian nabonua bailon, bunomo koidan asi-asi yanila nabolo-boloki. Modungoliyo na lipu nia naikon yaku ukume.

¹³Yanila saibino, babasal popoisik, mounggoli untung tukon loloon moaki najujur. Malah konabii tukon imam doo okoliyo komian.

¹⁴ Daku umat napakol-pakol yanila anggene pakol popoisik tolong, ‘Ah, aki nabubula,’ yanila bantile, ‘saibino monondok tukon aman.’ Banggokai aki natutuu.

¹⁵Yanila siokai namamaa sababola lapamo lakukene saibino komo tinotulai doo. Bai yanila mondolong koduduso tukon aki natoyo komaa. Tobikon doiya yanila naikon otuwong buno mian bailon; kabuso yanila salitano kalukai Yaku ukume yanila. Yaku, TEMENENO, lapamo basilingan.”

¹⁶ TEMENENO bantil doi Naumat, “Kokondongo doi liasan-liasan loloon, tukon palatikanggene mono-monondok! Masadaikene kololoon-loloon mololukoo, tukon doi antara yaando komomonondok. Laingemo loloon doo, sulano komuyu tubo tanaang.” Bai yanila bantil, “Aki, kami aki nayase molainge loloon doo!”

¹⁷Maka TEMENENO badaang lunggon mongoduk padagai-padagai tuuk moingotikene yanila sulano ndongoliyo tanda trompet nabulunganan. Bai umat bantile, “Kami aki naiyase mondongoli.”

¹⁸Tobikon doiya TEMENENO bantil, “NDongoliyo, he bangsa-bangsa! Komuyu sio potoyo oila naikon moteali naikon doi Ku umat.

¹⁹Palatikanggene, he dunia! Daku umat aki naiyase matalima daku otunggul tukon aki nataat doi Yaku. Salaku baliko luwedoi yanila narencana Yaku lubatene kosilakaan doi yanila.

²⁰Kubayo oila kamangian yanila mobabayo tuuk Yaku luwedoi Syeba, kabai rampa-rampa luwedoi lipu moddoon? Aki Kuyase matalima yanila nasosubakon. Aki Kuyase doi yanila nasosubakon-sosubakon sinua.

²¹Yaku naikon kabayo sabab mian badaang nia takait tukon otuwong. Tama tukon pau, tulano tukon napokolanian saibino naikon silakamo.”

²²TEMENENO bantil, “Meeng kobangsa mobukuan daanon bagalak luwedoi lipu moddoon doi lembet. Yanila lubat tuuk polobosi.

²³Yanila nasandata panah tukon kalait; yanila lokis tukon aki natingonio koampun. Buno tobun nabulunganan babokolan bunomo yanila naadalan naampakonan lalo modaanon obulen tuuk motaus lobosio ko Yerusalem.”

²⁴Molongoli bilita doo modungoliyo ko Yerusalem teali akiyo konadaya. Yanila inotokuti palasaan matakut, tukon sakisaa buno boine moyase mosuung.

²⁵Yanila aki nabarani loboson doi loloon kabai taus doi naasi, sabab doi yayaa musuh modaano kona sandata osumbute kopomusuan.

²⁶TEMENENO bantil doi Naumat, “Pakeomo otoike karung tukon banggo-banggolinggon doi abu lalomo. Batunamo tukon mandaunggene tukon poloong buno mian mokokiilio konapau motongo meeng momatemo, sabab moakabuse naikon molobosiyo komuyu tukon sosi-sosinggot.”

²⁷Maka TEMENENO bantil doi Yeremia, “Udio Daku umat, buno ikoo udio kotambaga. Selidikiyomo yanila nandondoong!

²⁸Yanila saibino malontak momotikas konoano buno suasa konamotikasan tukon besi. Yanila lakukene komo lokis tukon ampakon doi yaa-yaa tuuk mosabukene kobilita mokulokisene komian bailon.

²⁹Nasinopuan monaso tuuno, bai kotambaga nakoran aki nayase koidan mototook tukon lapus. Palasuma Daku umat pobanggadudukon inudi tuuk nakininondok, sabab komian daango molokis aki nainalaas.

³⁰Yanila naikon sinumbuikon, suasa mosinakukon, sabab Yaku, TEMENENO, lapamo sakukene yanila.”