Read Banggai YEREMIA 7 Bible Online

YEREMIA 7 - Banggai bible

YEREMIA 7

¹TEMENENO sumboliyo yaku taus doi Na Bonua tukon kokondong doi natataapon babasal Yehuda miano mololoio molubat kaleda. Yana sumboliyo yaku mopopitoikene Kona teteba nia doi yanila, “Boliyomo kalakuan tukon cara mutuboan, maka Yaku, TEMENENO Mobabasal Konakuasa, Mian Bisa Israel naikon pataikene komuyu tataap dungol dimbaa.

⁴Inaikai mangangga doi mobakala-kala nabantilan, ‘Kita aman, sabab naia TEMENENO Na Bonua. Tutuu naia TEMENENO Na Bonua!’

⁵Boliomo komutuboan tukon mokalakuan. Lakukenemokai komo adil meeng komian doi bailonggon.

⁶Inaimo koidan mopipiike komian lubat, pau tuboon, tukon balu-balu. Inai mangakate mian moakiyo kona salah doi lipu nia. Inai mososubayo koilah-ilah bailon, sabab langge doo naikon silakayo komuyu.

⁷Kalu komuyu boliyo kopocara tuboan tukon pokalakuan maka belentimo lakukene saibino doo, naikon Yaku pataikene komuyu tataap dungol doi lipu nia molapamo Yaku bekene salaku buta budel doi mumbumbu.

⁸Bai, natutuuan palasuma tolong komuyu mangangga doi bantilan-bantilan mokala.

⁹Komuyu pondikuk, mangakate, baloloa, beena kasaksian mokala, mososubakon-sosubakon doi Baal, tukon mososubayo ilah-ilah komuyu moaki potingonio.

¹⁰Sambuno lapa saibino doo komuyu lakukene, komuyu lubat mangadap Yaku dimbaa doi Ku Bonua susuunggu, tukon bantil, ‘Kami aman!’ Lapadoiya komuyu banggadudukene pokakabai molokis doo.

¹¹ Oilano komuyu anggene Daku Bonua nia pondikuk nadungolan? Saibino mukakabai lapamo Kukitayo.

¹² Tauso doi Silo, kota mololukoo Kulilike teali tampat kaledaan doi Yaku. Kitayomo oila molapamo Kulakukene doi tampatoo sabab umat-Ku Israel nalalim.

¹³Maukai nabadaang lunggon Yaku basilingan doi komuyu, komuyu aki poyase mondongoli. Komuyu lakukene saibino-saibino lalim doo, tukon aki nayase motimbili kalu Yaku uange.

¹⁴Nah, Daku Bonua ikoomo mobalanggene, tukon tampat Yaku mobeekene doi mumbumbu tukon doi komuyu nia naikon Kulakukene buno doi Silo lolukoo.

¹⁵Komuyu naikon Kusilakayo luwedoi salaang-Ku buno lapamo Yaku siikayo mumontolutusan, umat Israel.”

¹⁶TEMENENO bantil, “Yeremia, inaimokai mosambeanggene komian badang nia. Inai manggabi tulung kabai sambeang tuuk yanila; inai mosiayo Yaku, sabab aki Kuyase mondongolii kakabi doo.

¹⁷Ikoo lapamo kitayo susumu oilano yanila nailakukon doi kota-kota Yehuda tukon doi loloon-loloon doi Yerusalem!

¹⁸ Pau-pau mangatambun kayung mosinua, mian mala-malane akaite ko aung, tukon mian moluko mosambule koadonan tuuk makabai kukis tuuk ilah mo yanila sumbuikene Tomundo boine doi Surgaa. Tukon tuuk osokitio Konoanggu yanila koidan mososubakon anggur paisuno doi temeneno-temeneno bailon.

¹⁹Bai konabiasaan, bolikon Yaku moosokitio yanila, bai yanila butongo susungo tobikon yanila mamaa.

²⁰Yaku TEMENENO Moinakatandak Tuuno, naikon popisaikene Kunggimalan minatakuton doi bonua kaledaan nia bunggono, doi banggapi tukon iayayon, koidan doi kayung-kayung tukon dunia hasilo. Daku nggimalan naikon kai-kaito buno aung moaki namoola pinosoi.”

²¹TEMENENO bantil, “He Daku umat, komuyu toiyo baikon sosubakon komuyu mosuayo doi balabaang bunggono sio nasinua sampe kabus, tukon sosubakon bailonggon moola komuyu kaane. Bai Yaku TEMENENO bantil, palasilaakan kaanemo saibino!

²²Salataa Yaku babayo mumbumbu sumbut luwedoi Mesir, Yaku aki beena yanila peraturan sosubakon mosinua kaliangano kabai sosubakon-sosubakon bailonggon.

²³Yaku tolongo parentayo yanila tuuk taatio Yaku sulano Yaku teali yanila na Mian Bisa, tukon yanila teali Kuumat. Yaku sumboliyo yanila tubo mololoi Daku parentah-parentah sulano yanila monondok.

²⁴Bai yanila aki nayase mondongoli tukon aki yase palaatikanggene. Yanila tolongo tulutiyo yanila susuungo noano namongiasan momotikas tukon molokis doo. Yanila bolikon kai teali monondok bai teali lobian lokis.

²⁵Tambun mumbumbu sumbut luwedoi Mesir polong oloyo nia Yaku sidutu bitekene Daku ata-ata, saibino kunabi, doi komuyu.

²⁶Bai akiyo komondongoliyo tukon mopalaatikanggene. Komuyu tolongo teali motikas tuuno konoano tukon lokis doi mumbumbu.”

²⁷Lapadoiya TEMENENO bantil, “Tobikom doiya, he Yeremia, maukai ikoo popbaikene saibino doo doi Kuumat, yanila aki naikon napalatikanggene mubantilan-bantilan aki naikon namotimbili.

²⁸Jadi, bantilemo doi yanila baikon yanila daanon meeng kobangsa moaki naiyase taat doi Yaku, TEMENENO yanila na Mian Bisa. Yanila aki nayase palajario luwedoi ukuman molapamo yana rasayo. Kona satian doi Yaku kiono, tolongo akimo nabinisalakon koidan.”

²⁹TEMENENO bantil, “Eh modungoliyo ko Yerusalem, popelenggene! Patele komu buuk tukon sakukene! Mananikene konamian mandaungan doi bunggulo-bunggulo bunggono, sabab Yaku, TEMENENO, daano monggimal tukon lapamo tolake komuyu saibino.

³⁰Yehuda miano lapamo lakukene kokulokisan. Yanila napilogot-pilogot Kuminisikiton doo lapamo yanila abese doi Ku Bonua lalomo, tobikon kulokiso.

³¹ Meeng kobalabaang mosinimbuikon Tofet lapamo yanila kekendenge doi Hinom Pepelakono tuuk mosubakene yanila napau-pau salaku sosubakon sinua. Banggokai Yaku aki naikon mosumboli yanila lakukene langge doo, bisakai aki naikon langge mobunodoiya sumbut doi Kupikilan lalomo.

³²Tobikon doiya, naikon laate kotempono tampatoo akimo koidan nasinumbuikon Tofet kabai Hinom Pepelakono, baimokai Pepelakon Bakolotan. Butadoo naikon teali buta bakibulan sabab akiyo kotampat bailon.

³³Yanila bajan-bajano naikon teali tomisi nakaan tukon iyayon mobarani sabab akiyo komosikayo.

³⁴ Lipu nia naikon teali padang tandus. Lalo tedesan tukon lalo lamean osoanan naikon Kuatadeo doi kota-kota Yehuda tukon doi loloon-loloon Yerusalem.