Read Banggai YEREMIA 8 Bible Online

YEREMIA 8 - Banggai bible

YEREMIA 8

¹Doi tempodoo tomundo-tomundo buku-bukuno tukon pagauwe-pagauwe pamarentah doi Yehuda koidan saibino koimam buku-bukuno, nabi, tukon mondungoliyo bailon ko Yerusalem naikon kinalual luwedoi yanila nakibul,

²bolikon tuuk pinotongikon tukon kinibul koidan bai sinodiikono doi buta salaku limbut. Mian daango doo kobuku-bukuno naikon sasabulo doi oloyo nasinasalan bituwon tukon bituwon-bituwon pauno yanila moanggayo, seseange, leanio, sosubayo, tukon mangkabi otunggul.

³Maka mian badaang modaano tubo luwedoi bangsa molokis nia molapamo poalasene doi yaa-yaa naikon yase mate doi nadaanoan motubo. Yaku, TEMENENO, Mobabasal Konakuasa, lapamo basilingan.”

⁴TEMENENO sumboliyo yaku mobantile buno nia doi Naumat, “Kalu mian otuwong, tantu yana naikon bangun koidan, tukon kalu mian mosasaat doi loloon, tantu yana naikon abali.

⁵Bai bulaando komuyu, Daku umat, banggadudul tasalah tukon tinggale Yaku? Komuyu batani monggol doi mubapilogotan, tukon aki nayase abali doi Yaku!

⁶Yaku lapamo mondongoli momondok, bai komuyu aki pobasilingan bunokai bisa. Akiyo komeeng komian kai moluwe doi komuyu sesalio kona kakabai molokis. Akiyo komo bantil, ‘Oila daku sinalakon?’ Komuyu saibino loingio komu loloon susumu buno adalan polobosi doi polobosian lalomo.

⁷Tomisi kolong doo toiyo kona tempo tuuk abali; kokumkum, tomisi layang-layang tukon murai koidan tongo kona tempo tuuk mobioli tampat. Bai komuyu, Daku umat aki potingonio ko ukum-ukum Yaku mobeekene doi komuyu.

⁸Tutuu barani komuyu bantil baikon komuyu pandoi, tukon toiyo Daku ukum-ukum! Soba kitayo bulaando Daku ukum-ukum doo mopandoi-pandoi agama moaki natotobos!

⁹Saibino komo pandoi doi komuyu tanga-tangano naikon inakamaa. Yanila naikon lapuso napikilan tukon ilako. Yanila aki nayase matalima Kuotinau; diabudodoo, pandoian oilano modaano doi yanila?

¹⁰ Tobikon doiya Yaku naikon bekeene yanila naasi doi buta doo tumbuno bailon, tukon yanila naboloki doi mian bailon. Yanila saibino, babasal poipoisik mounggolio untung tukon doi loloon moaki najujur. Odemo nabi tukon imam doo kokolio komian.

¹¹ Daku umat pako-pakolo yanila anggene pakol popoisik tolong. ‘Ah, aki nabubula,’ yanila bantile, ‘saibino mondok tukon aman.’ Banggokai mau naidan aki.

¹²He Daku umat, siokai komuyu mamaa sabab lapamo lakukene saibino motinotulai doo! Bai komuyu duduso bondolong tukon aki yase natayo komaa. Tobikon doya komuyu naikon otuwon buno mian bailon molapamo otuwon; kabuso kosalitano kalukai Yaku ukume komuyu.

¹³Yaku yase tuuno mopototongikene Daku umat buno mian mopototongikene kona buta hasilo. Bai, Daku umat buno anggur batango tukon ara batango moakiyo kosaono tukon koloo-loono moloyumo. Doiyamo kosababapo Yaku lapamo pataaikene komian molubat-lubat tukon kuasaiyo yanila nalipu. Yaku, TEMENENO, lapamo basilingan.”

¹⁴“Bulaando kita aki ndamakabi oila-oila?” Mian Bisa Naumat bantile, “Mai kita posinggat-singgat biol doi kota-kota moano kona benteng, sodii kita mate indaa. TEMENENO Mian Bisa kita lapamo putusiyo baikon kita sio ndasilaka. Yana lapamo beekene doi kita tubele tuuk ininum sabab kita makabaimo lalim doi Yana.

¹⁵Palasuma tolong kita moinikene kodamean tukon tempo mangalinan, sabab komo daano tolongo namatikasan.

¹⁶Musuh daano doi kita Dan, yanila naadalan nggedeko, tukon posaapon kolipu teali matakutene. Musuh lubat tuuk momase saibino konda lipu, koidan ndakota tukon saibino komo dungoliyo.”

¹⁷“Palaatikanggene!” TEMENENO bantile, “Diabudodoo Yaku makapatu binda-binda doi komuyu tanga-tangano tuuk sokuwo komuyu, binda doi komuyu moupason moaki namoola kanakon doa-doa.”

¹⁸Konoanggu tokokol tukon masakit, daku paloonan aki napakuli.

¹⁹Lenggele! Doi sasaibino kolipu bulungano tapakiik kokil daku bangsa momasadai, “Kai akiyono TEMENENO doi Sion koidan? Doi yaa kai Tomundo diabudoo?” TEMENENO timbilio, yanila tomundo, “Bulaando ikoo sosuba doi ila-ila moakiyo kotakoso? Bulaando ikoo osokitio Konoanggu tukon sosubaiyo kopilogot-pilogot?”

²⁰Umat Israel kokuweis, “Tempo bapuian tukon tempo pital diabudodoo toliiso, bai kita akiyoon koidan nasalamat.”

²¹Konoanggu susah sabab daku bangsa masakito tuuno; yaku poloon tukon aki sanang.

²²Oila kolanggeno mokubayo kona sabab tobikon daku bangsa sampe diabu-dodoo akion koidan natangalin? Oila kai doi pasaapon ko Gilead, akiyo kodoktel kabai pakuli?