Read Banggai YEREMIA 9 Bible Online

YEREMIA 9 - Banggai bible

YEREMIA 9

¹Bukamaen kona monondokan kalu koolunggu buno bubung momoonoh paisu, tukon mataku saasalum momollong banggadul! Maka yaku moola kokiil oloyo tukon popook; poloonggene mian daango momeeng ko bangsa tukon yaku musuh moakateo.

²Kalukai doi padang bone laate kuposunggene tampat sampukonan tuuk mian doi naampakonan lalomo! Maka yaku naikon tinggalemo daku bangsa, tukon obulen imbali tuuk badodonggon luwedoi yanila. Yanila saibino lokiso, meeng kopototongian mian moaki nasatia,

³tukon sidutu siap tuuk bakakala. Posaapon kolipu, kona kaanan aki nabalakuasa; tukon kai naakian najujur motatabulo. TEMENENO bantile, “Daku umat lakukene kokulokisan tukon aki tade-tade, yanila aki naakuiyo Yaku salaku yanila na Mian Bisa.”

⁴Terhadap tulaando, samba komian sio nabadagai tukon utus meeng kotina kai aki namoola inangga. Sabab, buno Yakub bunomolakon yanila, suwe-suwele kokolio koutuso. Samba komian ampakon doi yaa-yaa tuuk sabukene pitana tukon kala-kala.

⁵Saibino bakakalamo, akiyo komo totobos basilingan. Suungo biasamo bakalakala, yanila aki nanggola tinggale kona lalim. Tolonggimolon tuuk tolonggimolon, bakalakalaan tuuk bakalakalaan yanila lakukene sidutu posidutukon, yanila akikene tutuno ko TEMENENO.

⁷Sabab doya TEMENENO Mobabasal Konakuasa bantil, “Buno tambaga, Daku ujiano naikon Daku umat sulaano yanila teali tulen. Oila koidan momoola Kulakukene telhadap Daku umat molapamo makabai kulokisan?

⁸Yanila nabantilan-bantilan silakaan tuuno, moola akateo buno pana moano kona bisa. Yanila nabantilan-bantilan kala tuuno. Yanila mabantil-bantilan maamis menarik, bai kona bisaan yanila batalonggon.

⁹Bulaando ko bangsa bunonia aki Kupokonoikene ukuman mopokonoi? Naikon Kubalese yanila nakakabai; Yaku, TEMENENO, lapamo basilingan!”

¹⁰Yaku, Yeremia, bantil, “Yaku tadukai kokiil tukon monduang, sabab padang motubu doilipu mopadanggon moloas tukon doi bunggukon-bunggukon molapamo motuul tuuno tukon komian aki naloloiyo. Lalo iyayon piniala koidan akimo tolongol; tomisi pauno tukon iyayon-iyayon bailon obuleno tukon kabuso.”

¹¹TEMENENO bantil, “Yerusalem naikon Kutealikene manas tampat asu lobo nasapitan. Kota-kota Yehuda naikon te ali kiis, tampat moakimo koidan nadinungoli.”

¹²Yaku masadai, “TEMENENO, bulaando lipu nia mosiodiikon aki natubo komosinakakon tukon motuul buno padang bone tobikon akiyo komo loloiyo? Oila daano komo sukup pandoi tuuk mangalatikene saibino nia? Doi Indekai lapamo Ikoo beena pangalatioan sulano yana moola pelenggene doi mian bailon?”

¹³TEMENENO timbiliyo, “Doiya teali sabab Daku umat koidan akimo napalaati kanggene otunggul-otunggul Yaku mobekene doi yanila. Yanila aki nataat doi Yaku, tukon aki naiyase tulutiyo Daku parenta.

¹⁴Yanila motikas konoano tukon sosubaiyo kopilogot-pilogot Baal buno yanila nambumbu nainotunggulkon.

¹⁵Sabab doya, ndongoliyo oila komo Yaku, TEMENENO Mobabasal Konakuasa, Mian Bisa Israel, naikon lakukene: Daku umat naikon Kubeena mosinakakon mosopot tuuk mokinaan tukon lasum tuuk moinimum.

¹⁶Yanila naikon Kusalakanggene doi antara bangsa-bangsa moaki yanila natingonio kabai yanila nambumbu. Yaku naikon sidutu kilime Daku suludadu molobosiyo yanila sampe Yaku silakaiyo yanila tutuuno.”

¹⁷TEMENENO Mobabasal Konakuasa bantil doi Naumat, “Palatikanggene oila komo daano teali doi lipu nia, tukon mosobit uange saibino komandaung. Sumboliyo yanila lubat tukon mananikene kolagu mandaungan.”

¹⁸Yehuda miano bantil, “Sumboliyo yanila namosobit mananikene lagu mandaungan tuuk doi kita saibino, sulano namesele-mesele komatano paisuno mbetokio kopidalinggita.”

¹⁹Doi Sion tollongol kolalo kokiil, “Kita silakamo tukon inokimaa tuuno. Konda lipu sio kita tinggale, ndabonua-bonua manas tuuno.”

²⁰Yaku bantil, “Ndongolio TEMENENO nabantilan-bantilan, he boine saibino! Doi muboi-boine otunggulkene mananian mandaungan, doi tula-tulamu lagu poloanan.

²¹Matean usoko lolo doi dendela, pakesayo mousok doi kamali lalomo; yana sokuwo kopau-pau doi loloon tukon mian mongula doi lapangan.

²²Bajano sasabukon doi yaa-yaa buno limbut doi buta bunggono; buno gandum molapamo pinotoli maka natininggal tukon akimo koidan napinotongikon. Doiyamo TEMENENO nateteba mosio kupopitoikene.”

²³TEMENENO bantil, “Mian pandoi aki moola babanggal sabab napandoian, mian bukuan sabab nabukuanan, tukon mian kaasa sabab nabuat.

²⁴ Inde moiyase babanggal kaliangano lobo meeng, siokai nababanggal baikon yana tingonio tukon Yaku mangalatikene; baikon yana toiyo Yaku seseange tuuk sidutu-posidutukon tukon Yaku ekenggele koukum tukon kaadilan doi dunia. Saibino doya kindedeke Konoanggu. Yaku, TEMENENO, mobantile doya.”

²⁵TEMENENO bantile, “Naikon lubat kotempono Yaku ukume Mesir miano, Yehuda, Edom, Amon, Moab tukon modungoliyo kopadang bone mopatele pependek kona buuk. Yanila saibino sinunat pokakana buno Israel miano, bai mau yanila maukai bangsa Israel lakukene buno mian badaang moaki nasinunat, sabab yanila aki nataatio koperjanjian moinumbamakon sunat doo.”