Read Banggai MANDAUNGAN 1 Bible Online

MANDAUNGAN 1 - Banggai bible

MANDAUNGAN 1

¹Yerusalem, dia budodoo nia kiisso tuuno, kota mololukkoo lame tuuno. Loluk lame tuuno doi antara bangsa-bangsa, dia budodoo teali buno bauntal. Loluk kota motodudul ngginaal, dia budodoo lapamo tinealikon ata.

²Samba kopopook yana kokiil susah, matano paisuno seselet doi pidalino. Akio komeeng komian luwedoi saibino kona bibian moyase hibule yana. Yana tula-tulano loilokise molapamo bangabalinggon teali lawan.

³Modungoliyo ko Yehuda tinggalemo konatano, sabab kinabai ata tukon sakisaa tuuno. Dia budodoo yanila dungol doi antara bangsa-bangsa akiyo kolipu mobee paladamean tuuno. Musuh boilingiyo yanila doi tempo yanila sakisaa.

⁴Doi oloyo-oloyo babasal akiyo komeeng komiankai molubat doi Mian Bisa Na Bonua. Panani boi-boine imbali mandarita, tukon imam-imam okitakene konoano nasusaan. Akiyo komian doi tataapon-tataapon babasal. Kota Sion kinonoi susah.

⁵Kona musuh-musuh teali kaasa sabab yanila moola nakuasayo. TEMENENO kubayo yana mandarita, sebab badaang tuuno kona lalim. Komian mo dungoliyo lapamo ilako, tukon inakut doi masakukonan.

⁶Kota Yerusalem nakasaan tolongokai salita doi lolukkoo. Saibino katuano lapamo teali miuk buno donga momalaal tuuno. Yanila kiono kona nadoya doi musuh molelenggene.

⁷Sambuno lapa otuwong tukon sakisaa, Yerusalem neneke baikon tempo loluk, salataa yana daano badaang kobuat; bulandokai komodungoliyo otuwong doi musuh limano, tukon akiyo komeeng komian molubat motombonio. Kona lawan-lawan tolongo kokumbit kitayo kona otuwongan.

⁸Yerusalem kodikitio kobutongo susuungo tukon kubaiyo badaang kolalim molokis. Saibino doi lolukoo odotio yana, dia budodoo natotulaiyo sabab kitayo konatalalauan. Yana okitakene kona kasusahan, sabab lapamo lapus koduduso.

⁹Kona madikitan tokita tukon bisa bai yana aki namopusinggon oila naikon moteali tukon butongo. Kona otuwongan hebat tuuno konamanasan, bai akiyo komeeng komian hibule yana. Maka makabi maasi luwedoi TEMENENO, sabab kona musuh-musuh manaango.

¹⁰Saibino kona musuh-musuh nabuat lapamo lampase. Yana tadukai sio nakitayo yanila mongusoki Mian Bisa Na Bonua, meeng kokakabai TEMENENO mapatanggene tuuk mian mobolikon Naumat.

¹¹Tukon okitakene konasusaan komodungoliyo mounggoli pongoli lobo masalo; barang modaano koanggano yanila soboliyo tukon roti, tolongo sulano yanila tataap tubo tukon inai namate. Yerusalem masadai, “Odee TEMENENO, kitayokai yaku, palatikanggene saibino daku pandaritaan.”

¹²“He mian daango moalo doi loloon, kitayo tukon palatikanggene! Daano kai kosakisaa mo pokakana konakabalat daku pandalitaan diabudodoo, sakisaa TEMENENO molubotikene doiyaku, sabab Nanggimalan babasal tuuno?

¹³Luwedoi timbu Yana obulusene Kona aung mosuayo polong doi noanggu lalomo. Talenggene Kona talong doi salaanggu mokabayo yaku otuwong. Maka Yana sodiiyomo yaku susunggu mandarita samba kooloyo.

¹⁴Yana alayomo saibino daku lalim, tukon yana boboiyo teali meeng, tukon usokikene doi bulunggu, tobikon kona kabalat kubayo yaku matalaimiuk. TEMENENO salakanggene yaku doi musuh; akiyono daku kakuatan molawane yanila doo.

¹⁵TEMENENO anggene aki nabukuan saibino daku talenga motambongan. Yana atulemoo kona suludadu sulano saibino daku mian motabokon nasilaka. Yana tudo-tudongiyo daku bangsa bangsa manas, buno mian momopiis anggur saohno.

¹⁶Doiyamo kosabapo matanggu paisuno mbelembesan, akiyo kobeena samangat tukon mohibure. Kubangsa lapuso sasaibino, sabab musuh lobian balakuasa.

¹⁷Yaku binggate kolimanggu manggabi potombonii, bai akiyo komo beena hiburan. Luwedoi saibino kopihak, TEMENENO kilime komusuh; yanila lubat lobosio yaku. Yaku linakukanggon buno limbut, barang mo madikit doi yanila tanga-tangano.

¹⁸Bai TEMENENO komo bisa, sabab Konaparentah akimo kutulutiyo. Ndongoliyomo yaku, he bangsa-bangsa, kitayokai yaku doi susah lalomo. Saibino kotabo tukon koboine ilako, tukon inakut doi masakukonan.

¹⁹Yaku uange kotula-tulanggu poomananggonan bai yana loki-lokise yaku. Saibino ko imam tukon mo katuayo kobangsa saibino matemo doi loloon-loloon kota. Salataa mounggolii kinaan tuuk palataanggene konaansang.

²⁰Oh, TEMENENO palatikanggene yaku, konoanggu manasal tukon susah, manas sabab daku baladosaan lolukoo. Doi loloon-loloon daano komo mangakate, doi bonua lalomo daano komatean.

²¹Oh TEMENENO! NDongoliyo dakubantilan, akiyo komo hibule yaku. Daku musuh-musuh tedes, sabab Ikoo kabaiyo yaku silaka. Lubato kai oloyo Ikoo janjikenedoo; kubayo yanila namandarita buno yaku.

²²Palatikanggene saibino yanila nakulokisan doo, tukon lakukene yanila buno Ikoo molakukene yaku, sabab saibino kolalim Ikoo molakukene doi komuyu. Yaku susah doi delita lalomo, noanggu susah tukon molisuk.”