Read Banggai MANDAUNGAN 2 Bible Online

MANDAUNGAN 2 - Banggai bible

MANDAUNGAN 2

¹TEMENENO tindokiyo doi Nanggimalan lalomo, Sion sinonggouli-Mo tukon kalipookan. Israel Nakinabasalan mopokakana kotimbu nakatandak, lapamo Nasinakukon doi buta. Doi tempo TEMENENO nggimal, Na Bonua doi Sion doo aki Nahilaukanggene.

²Samba kopadang rumput doi Yehuda tanono, Yana manase akiyo kopalasaan susah. Nanggimalan lalomo Yana duduwo polong tolubang benteng-benteng molindungiyo tano doo. Batomundoan doo polaing saibino ko katuano Yana tinuwong tobikon nateali totulai.

³Nanggimalan lalomo modadamo-dadamo, Israel Nabukuanan ilotomo. Salataa kita musuh lobosio, Yana akimo nabeena potomboni. Buno aung mokolot momanase sasaibino-sasaibino, bunomolakon TEMENENO nggimoliyo doi kita saibino.

⁴Buno musuh, Yana binggakene Kona pana, tukon Napana matano sasalanggene doi kita. Saibino komian mosanaanggene konoanggita, Yana kabuso akateo. Yana supakene Konanggimalan buno aung doi kota Yerusalem nia lalomo.

⁵TEMENENO tealimo buno musuh: Yana bobokiyo ko Israel polong tolubang. Yana manase kobenteng-benteng tukon kamali, tukon kadaange kosusaan doi modungoliyo ko Yehuda.

⁶Yana manase Kona Bonua Naumat nalipu pototongian tuuk sosubaan doi Yana. Yana kabaiyo komian toliminggene naikon kooloyo Tadean tukon oloyo-oloyo babasal. Sabab TEMENENO nggimal tuuno, imam tukon tomundo lapamo Natolayo.

⁷TEMENENO tolayo Kona balabaang momoliyous, tukon tinggale Kona Bonua susuungo; Yana sodikene musuh manase Kona beton-beton. Doi ndalipu loluk bakaledaan tukon balamean, musuh kokuweis sabab sanang.

⁸TEMENENO lapamo putuse baikon beton-beton Sion sio naminanas. Beton-beton doo lapamo Naukule, sulano saibino moola Namanase. Beton-beton tukon manara-manara, dia budodoo tealimo saibino bakaas.

⁹Tataapon-tataapon babasal tosokoimo buta, saibino koposembang-sembango moloto; tomundo tukon sambu pamarentah daanon doi masakukonan. TEMENENO na Hukum akimo koidan nainotunggulkon; nabii akimo koidan namatalima batokitaan luwedoi TEMENENO.

¹⁰Saibino katua-katua kota osulang doi buta aki nabiok; yanila tipase koambata doi oluno bunggono, tukon pakeo kotoik kalung susah palosano. Boi-boine totukukene kooluno polong doi buta.

¹¹Komatanggu bobongan sabab kokiil aki tade, konoanggu susah akiyo kotadean. Noanggu susah mokitayo bangsa natuwongan; kitayo kopau-pau tukon pau lumbon poso doi loloon-loloon kota.

¹²Yanila kokiil tukon odi-odi makabi kaan tukon monginum doi tinano. Buno mian mopakolon, yanila tolubang doi loloon-loloon maka mate doi tinano naabinano.

¹³Oh Yerusalem, Kota Sion mo kinilakon, muminanasan pokakana kondalangon kona kabasal. Oilakai komo moola kubantile tuuk mobeena hiburan? Sabab akiyon daano momandarita buno ikoo. Bisa akiyo komomoola kindedeke mundondoong.

¹⁴Mopinolonggon nabii-nabii doi komuyu, tontongo pongokolii tukon bakala-kala tolong. Yanila aki nabantile mulalim, tobikon sabab doiya ikoo aki babolii. Kobaliko yanila tolongo pelenggene doi komuyu bantilan-bantilan kala molambato.

¹⁵Saibino komian moalo, totulaiyo ikoo, sabab ikoo manaso saibino. Yanila pase-pasekene kooluno tukon bantil, “Doiyamo kotadoo monondok tuuno, kota dunia mo babanggalkene?”

¹⁶Saibino komu musuh tanggale kodudusomu tukon misikitene, yanila kokumbite ikoo tukon sosiboliyo. Yanila bantil, “Kota doo lapamo kami manase! Lapa doiya polongo kotempono koidan malumbito kami toti-totiiliyo!”

¹⁷TEMENENO lapamo kabaiyo Kona ngginimakon lolukoo batetelkenemo tukon ingotikenemo doi kita. Kita minanaso akiyono Kona maasih, musuh Yana binee kamanangan. Yana kabaiyo yanila tedes kitayo konda otuwongan.

¹⁸He beton-beton Yerusalem masadaimo doi TEMENENO! Tutulo komatano paisuno buno paisu batango mololong oloyo popook. Banggadudul kokiil, inai motade polong kobutomu teali pakadak!

¹⁹Kukuaikene mobangun popook kinobuluson tuuk wookon bukayomo konoamu antoko doi TEMENENO. Makabimo sulano Yana daano konamaasi doi napau-pau momalaal tukon poso doi samba kololoon sekuan.

²⁰TEMENENO, kitayomo tukon palatikanggene yanila Ikoo mosiksayo doo! Oilakai daano mo Komu lakukanano bunodoiya? Tinano kaane kona pau sinung mo seange, imam tukon nabii inakate doi Mu Bonua moliyous ko lalomo.

²¹Lakai tabo mate tetelengan doi loloon, malane moluko sabel kopangakateno. Doi oloyo Ikoo nggimal, Ikoo tembele yanila akiyono koseang.

²²Ikoo koloyo musuh-musuh kami momatakutene tuuk makabai lamean nggimalan mopotikunggon kami. Yanila akateo saibino komai piniala tukon sineang. Doi oloyo Munggimalan, akiyo komeeng komian kai moola dambasene kobutongo.