Read Banggai MANDAUNGAN 4 Bible Online

MANDAUNGAN 4 - Banggai bible

MANDAUNGAN 4

¹Mosoni mo montolikan tealimo luntul batu-batu Mian Bisa Nabonua tebeaso doi loloon.

²Loluk saibino koremaja doi kota Sion buno mosoni moano koanggano, bai diabudodoo linakukon tolongo buno bak buta tolong.

³Baimokai asu lobo tinano susuwo kona pau, bai daku umat nggimal tuuno buno tomisi unata doi padang.

⁴Pau-pau lumbun aki nasinusu, tobikon namate molou. Pau-pau makabi kaan, bai akiyono komo beena.

⁵Yanila biasamo lasayo kokinaan momondok, tukon tubo doi nalobianan lalomo diabudodoo langgang mounggoli kinaan doi limbut napinutonggikon, tukon mate malaal doi loloon-loloon.

⁶Daku umat lapamo inukum lobian kona kabalat luwedoi Sodom miano tolongo sopiongan mata lalomo manas doi Mian Bisa limano akiyo kobanggapi natindakan.

⁷Loluk komai katua-katua bilisii buno kapas momoute bilisii. Yanila tambongan tukon bukuan, sanaang tuuno tukon sehat.

⁸Bai yanila budodoo yanila duduso lobian mopook luwedoi lobo mopook tobinggakon doi loloon-loloon akiyo komo moola tingonia yanila. Yanila kulito mokukut doi buku-buku, buno kayung momotuul tuuno.

⁹Yanila sakisaa tukon yanila mate poi-poinia, sabab akiyo tuuno konakinaan; momate doi polobosian lalomo, lobian kountungo luwedoi mo mata malaal.

¹⁰Bukuan tuuno dobencana doo molupayo daku umat tobikon kotina-tina momiuk konoano rebuse kona pau susungo tuuk potui tiano.

¹¹TEMENENO okitakene konanggimalan tukon suayo kokota Sion polong polatapon tukon buta.

¹²Doi antara tomundo tukon modungoliyo ko dunia akio komengkai moanggayo baikon kota Yerusalem tataapon-tataapono kona lawan laate usokiyo.

¹³Bai langge doo tealimo sabab lalim saibino koimam tukon nabii. Yanila akateo komian moakiyo, kona salah kosauhno tokundang.

¹⁴Buno mian piit molausala doi loloon-loloon bunomokai katua-katua kota Yerusalem. Yanila napakean madikit sauh tobikon akio komo singgile yanila.

¹⁵Komian bantil, “Taus luwe dimbaa! Komiu madikit, inai motaape kami!” Maka yanila tauso tukon lausalah luwedoi bangsa-kobangsa, bai inde komiano koidan aki napinataikon momanataap.

¹⁶TEMENENO akimo napalaatikanggene kona umat; Yanamo susungo mopoalasene yanila tukon koidan imam-imam akiyo koanggano; saibino kokatua akiyono komo mamasikene.

¹⁷Komata nggami pakadak mombalenge, montotili potomboni moakiyo komo lubat. Kami moinikene meeng kobangsa napotomboni, kona tutuuan aki namoola beena oi-oila.

¹⁸Kami aki namoola sumbut doi loloon, sabab sidutu konamusuh sopitio. Komai tuboan napupusan lolanimo sabab komai olo-oloyo ganapo.

¹⁹Molelenggene-lelenggene kami mosobit tuuno modoon kona lobianan mosubit luwedoi tomisi rajawali. Yanila lelenggene kami doi bunggul tukon lolobotio kami doi padang lalomo.

²⁰Yanila lakayo TEMENENO natomundo linilik mian kami momoinikene mobenggami tuboan, tukon posinggouli doi musuh.

²¹He Bangsa Edom tukon Us, pokokumbit, potedeso, mokokumbit modaanokai moola! Kosilakaan naikon lubat kai doi koo tukon sabab malangu ikoo naikon akimaayo kobutomu.

²²Sion lapamo lakukene kona hukuman doi nalalim-lalim nakinubai diabudonia kami aki naikon TEMENENO sobiikene tukon akimo koidan binaba doi masakukonan lalomo. Bai ikoo, he Edom, naikon TEMENENO ukume. Mulalim-lalim naikon binukamo.