Read Banggai YEHESKIEL 1 Bible Online

YEHESKIEL 1 - Banggai bible

YEHESKIEL 1

¹ Doi tanggal lima bituwon kosanggapo doi taun tolu kolono, taun kolimano lalomo Tomundo Yoyakhin tambuno inakut doi masakukonan, yaku, Imam Yeheskiel Busi napau, daanon doi Kebar Paisunobatanggo bibilo doi Babel polaing komian daango Yahudi bailongon mosinakukon. Sosinggot timbu tobuka tukon yaku malaat pokita Mian Bisa kaliangano. Yaku lenggele Temeneno basilingan doiyaku tukon yaku rasayo Kona kuasa bukuan.

⁴Yaku lelengea tukon kitayo mombuul puul luwedoi lembet. Selese posambar-sambar luwedoi meeng kobunom potikuno mobabasal tuuno, tukon timbu potikunggon madialang-madialango. Doi didipo lalomo monggilep-nggilep doo tokita lobo momontontilan buno tambaga.

⁵ Doi bunom doo tanga-tangano, yaku koitayo sanggap komalaekat doiyamo lobo saibino motubo mobuno banggapi,

⁶bai sue-suele motoli sanggap koduduso tukon lua paal kokapilo.

⁷Koaino moloyos tukon montontilan buno tambaga moininggal. Koaino saono daano kolungguno buno banteng lungguno.

⁸Kobailon sanggap koduduso tukon lua kopaal kokapilo doo, yanila kolimano banggapi doi samba kokapilo taikon doi bilit.

⁹Meeng kopaar kokapilo moluwe doi lobodoo motuboi tukon kobundu-bunduno posinggil lobodoo bailon kapilo, tobikon dolobodoo mosangkap mokubai sangkap kopasumo. Kalu polamiok, yanila suwe-suwele polamiok moloyos doi depan aki napalese kobutongo.

¹⁰ Samba kolobodoo daanon kosanggapo koduduso moposasala; banggapi duduso doi saalano, singga duduso taikon doi bakalingano, banteng duduso taikon doi bobo tukon rajawali duduso taikon doi tonggulungo.

¹¹Meeng kopaal kokapilo luwedoi sembeleng, tukon meeng paal kokapio koidan tolipat tonggupio kobutongo.

¹²Sue-suele lobodoo banggadudul sasalaane kosanggap kojurusan tobikon yanila laate taus doi yayaa tolong yanila yase aki napasekene kobutongo.

¹³ Doi lobo-lobodoo tanga-tangano daanon komeeng motokita buno aung balano kai pansonan mokait moinggot-inggot aki tade. Aung doo kait-kaito tukon palapit koselese kila-kilato.

¹⁴Lobo-lobodoo susungo polamiok dombalaa dosumai pokakana kilat namosobitan.

¹⁵ Daanon yaku mopalaatikanggene saibino doo, kukitayo sanggap koloda doi buta bunggono, meeng koloda samba lobodoo bibilo meeng koloda.

¹⁶Sanggap lodadoo pokakana tukon montontilan buno batu montontilan tukon sue-suele daanon komeeng koloda bailon mototibalat doi tanga-tangano.

¹⁷Tukon buno doiya loda-lodadoo mobosikene doi sanggapo kojurusan.

¹⁸ Lingkaran-lingkaran lodadoo moono tukon mata.

¹⁹Lobo-lobodoo taus doiyayaa tolong yanila yase, tukon loda-lodadoo sidutu malaing; sabab lobo-lobodoo komo kuasaiyo. Sambaalonggon lobo-lobo doo palabiok liba doi dapang kai tade, loda-loda doo sidutu polaing yanila.

²² Doi lobo-lobodoo oluno bunggono tobuka meeng kolobo mobuno timbu luwedoi samba kaca momangkilat.

²³Doi timbu doo sukaano samba dolobodoo banatene meeng kopaal kokapilo taikon doi lobo doo sembeleng, bai kokapilo meeng kopaal koidan tonggupiyo kobutongo.

²⁴ Kalu yanila benga, yaku lengele kokapilo lalo nabakepakan: kona bulunganan buno paisu lomba nabulunganan buno pasukan suludadu badang nalaakonan alalo babasal, buno Mian Bisa Mo Balakuasa alalo. Kalu yanila tade benga, yanila pakuwo kokapi-kapilo,

²⁵bai luwedoi timbu doo bunggono doi yanila oluno bunggono, daanon molongol koalalo nabulunganan.

²⁶ Doi timbu doo bunggono daanon komeeng kolobo mobuno osulangan luwedoi batu nilam, tukon doi bunggono osulang-osulang komeeng kolobo motokita buno banggapi.

²⁷ Taikon doi bungguk tokita kalaango buno tambaga doi aung mokait tanga-tangano. Taikon doi bilit montontilan madialang tuuno,

²⁸tukon kona warna warni buno tandalo. Doiyamo madialang montontilan motudoikene ko TEMENENO nadaanonan.