Read Banggai YEHESKIEL 10 Bible Online

YEHESKIEL 10 - Banggai bible

YEHESKIEL 10

¹ Maka yaku kitayo bola modaano doi malaekat-malaekat oluno bunggono, tukon kukitayo komeeng mobuno kulusii luwedoi batu nilam.

² Lapa doiya Mian Bisa bantil doi mian mobapekean lenan doo, “Usokokai doi antara roda-roda mo daano doi bilit malaekat-malaekat doo, tukon mangalakai meeng koakuno aung balano. Maka tiposikene bala doo doi kota doo bunggono.” Yana moloingi, tukon yaku palatikanggene.

³Salataa yana usok, malaekat-malaekat doo daanon mokokondong taikon doi lalom TEMENENO Na Bonua sembeleng. Meeng kopatikuno kobunom mokonoiyo posaapon TEMENENO Na Bonua kintalo lalomo.

⁴Laango momasalidang kopalosano TEMENENO Nadaanoan mopalapuas luwedoi malaekat-malaekat doo tukon biol doi tataapon usokan TEMENENO Na Bonua, tobikon kokintalo teali madialang tuuno.

⁵Malaekat-malaekat doo kapilo nakepakan alalo tollongol polong doi kintalo tonggulongo, buno Mian Bisa Mobabasal Konakuasa alalo.

⁶Lapa doiya TEMENENO sumboliyo komian mobapakean lenan doo mangala meeng koakuno aung balano luwedoi antara roda-roda doo bilit malaekat-malaekat doo, mian doo mousok tukon kokondong doi bibilo sala komeeng luwedoi roda-roda doo.

⁷Maka sala komeeng luwedoi malaekat-malaekat doo usokene kolimano doi aung doo lalomo mo daano doi yanila tanga-tangano, mangala bubula kobala patolo, tukon bekene doi mian mo bapakean lenan doo. Mian doo talimayo maka taus.

⁸Yaku kitayo baikon doi samba komalaekat-malaekat doo kapilo doi bilit daanon kolobo mo babunokon banggapilimano.

⁹ Yaku kitayo koidan baikon malaekat-malaekat doo suwe-suwele daanon komeeng koloda doi bibilo. Sangkap loda doo pokakana, tukon montotilan buno permata mondok. Suwe-suwele daanon koloda bailonggon mo totibalat doi tanga-tangano.

¹¹Tukon bunodoiya malaekat-malaekat doo laate mosasalane kosanggapo kololoon. Yanila moola taus doi yaa tolong yanila yase, aki napalese kobutongo.

¹² Posaapon yanila butongo, bungguto, limano kapilo tukon roda-roda doo moonoh tukon mata.

¹³Yaku lengele baikon roda-roda doo sinumbuikon “sokoi makasang”.

¹⁴ Samba komalaekat-malaekat doo daanon kosanggapo koduduso posasala. Duduso tumbeno doiyamo banteng duduso, koluano banggapi duduso kotoluno singa duduso, tukon kosanggapo alai bengga duduso.

¹⁵Malaekat-malaekat sulugawi doiyamokai dakukinita loluk doi Kebar Paisunobatango bibilo. Samba lunggon malaekat-malaekat doo palabiok kai belekayo kokapilo benga doi dapang tukon benga matailuk kai tade, roda-roda doo sidutu malaing, sabab malaekat-malaekat doo kuasaiyomo.

¹⁸Maka laango montotilang kopalosanno TEMENENO Nadaanoan molinggalemo kotataapon usokan doi TEMENENO Na Bonua tukon biol doi malaekat-malaekat doo.

¹⁹Yaku kitayo malaekat-malaekat doo belekayo kokapilo tukon benga tinggalemo kobuta maka taus, tukon naroda-roda malaing. Maka yanila tade lolani TEMENENO Na Bonua kotataapono babasal taikon doi tolopot sembeleng, daanon laango montotilang tataap doi yanila bunggono.

²⁰Yaku neeke baikon doiyamo malaekat-malaekat mo lolukoo kukitayo daanon Mian Bisa Israel mobabayo doi Kebar Paisunobatango bibilo.

²¹Malaekat-malaekat doo suwe-suwele daano kosanggap koduduso, lua kopasang kapilo, tukon koidan kolobo mobuno banggapi limano doi bilit kapi-kapilo doo.

²²Yanila duduso pokakanakai tukon malaekat-malaekat kukinita doi Kebar Paisunobatango bibilo. Suwe-suwele ampakon sio doi muka.