Read Banggai YEHESKIEL 11 Bible Online

YEHESKIEL 11 - Banggai bible

YEHESKIEL 11

¹Maka ko Mian Bisa Na Roh biangkataku tukon babayo doi tataapon babasal taikon tolopot doi TEMENENO Na Bonua. Idoo kukitayo 25 komian, doi antara yanila talaat lua katua bangsa doiyamo Yaazanya Azur napau tukon Pelaca Benaya napau.

²Mian Bisa bantil doi yaku, “He banggapi moakiyo kotakoso, naiyamokai mian-mian mobaniatene ko kulokisan doi kota nia tukon beena otinau mosalah.

³Tobikon doiya pelenggene kai Kuteteba tentang ukuman tuuk yanila, he banggapi moakiyo kotakoso. Sabab yanila bantile, ‘Aki namalumbit koidan bonua-bonua nia naikon kita kekendenge koidan. Kota nia daanon tobunang tukon kitamokai kosail doi lalomo. Kita naikon aman luwedoi aung nanggulepan sabab dotobunang nia moseepene.’ ”

⁵Lapa doiya TEMENENO Na Roh usoko doi yaku tukon TEMENENO sumboliyo yaku banti doi umat Israel, “He bangsa Israel yaku toiyo oila komuyu nabinantil tukon komuyu nabinaniaton.

⁶Badaang tuuno komian molapamo komuyu akateo, tobikon kololoon-loloon doi kota moonoh bajan.

⁷Sabab doiya, Yaku, TEMENENO Moinakatandak Tuuno, bantil doikoo: Bisa, kota nia daanon tobunang, bai sail doilalomo bolikon komuyu baimokai mian-mian bajano molapamo komuyu akateo! Baimokai komuyu naikon Kusikayo kalual luwedoi kota nia!

⁸Komuyu matakutene kosabel? Naikon Kulubatene mian mobabayo kosabel tuuk molobosikon.

⁹Komuyu naikon Kubabayo kalual luwedoi kota tukon Kusalakanggene doi mian molulubaton. Yaku lapamo putusiyo komuyu inukum mate.

¹⁰Komuyu naikon mate doi polobosian lalomo doi mutano susungo, maka komuyu toiyomokai baikon Yakumokai ko TEMENENO.

¹¹Jadi, komuyu aki naikon naaman doi kota nia lalomo, aki nabuno sail doi tobunang lalomo. Yaku naikon mololonggon tukon ukume komuyu doi yaando kai komuyu nadaanoan doi tano Israel.

¹²Maka komuyu toiyomokai baikon Yakumokai ko TEMENENO tukon komuyu Kuukume sabab lapamo polanggare Kuparaturan-paraturan tukon aki napalatikanggene Kuparentah-parentah tukon moloingi ukum-ukum bangsa-bangsa mopotikunggon ikoo.”

¹³Daanon yaku pelenggene bantilan doo, sosinggot-sosinggot Pelaca otuwong mate. Maka yaku kai sosuba tukon kokuweis, “Aduh TEMENENO Moinakatandak Tuuno! Oilakai saibino ko Israel labino nia tadukai Kuakateo?”

¹⁴TEMENENO bantil doi yaku koidan,

¹⁵“He banggapi moakiyo kotakoso, ikoo tukon tula-tulamu doi pembangunan lalomo modaano dungoliyo ko Yerusalem mosalitayo. Yanila bantile, ‘Mian-mian mosinakukon doo todudul moddoon luwedoi Yerusalem tuuk bakaleda doi TEMENENO. Buta Israel TEMENENO lapamo bekeene doi kita.’

¹⁶Tobikon doiya pelenggene kai Kuteteba nia doi tula-tulamu nasinakukonan lalomo, baikon Yakumokai mobabayo yanila dodoon-dodoon doi antara bangsa-bangsa tukon mosabukene yanila doi tano-tanodoo. Maukai daanon yanila daano indaa Yaku naikon polainggene yanila.

¹⁷Yaku, TEMENENO Moinakatandak Tuuno, okitakene baikon yaku naikon pototongikene yanila luwedoi tano-tano doi tampat yanila natasabukonan, maka abalinggene Israel nabuta doi yanila.

¹⁸Kalu yanila mule, yanila naikon sakukene saibino kopilogot molokis tukon mominisikiton yanila moposunggon.

¹⁹ Yanila naikon kubeena noa moboolu tukon budi moboolu. Yanila noano buno batu namotikasan naikon Kualayo tukon Kusoboliyo tukon noano motaat doi Yaku.

²⁰Maka yanila naikon tulutiyo Kuparentah-parentah tukon tobos mololoi Daku parentah. Yanila naikon teali Kuumat tukon Yaku teali yanila na Mian Bisa.

²¹Bai mian-mian moyase sosubaiyo kopilogot-pilogot molokis tukon mominisikiton naikon Kuukume sabab yanila nakakabai molokis doo.” Bunomo doiya kai TEMENENO Moinakatandak Tuuno nabantilan.

²² Malaekat-malaekat doo tambuno benga tukon loda-loda doo malaing koidan. Laango montotilan mo pinalosanggon Mian Bisa Israel nadaanoan daano doi yanila bunggono.

²³Lapadoiya laango motontilan doo tinggalemo ko Yerusalem tukon biol doi bunggul doi tolopot kota doo sembeleng.

²⁴Doi batokitaan doo lalomo, Mian Bisa Na Roh binggate yaku tukon abalinggene yaku doi mian-mian mosinakukon doi Babel. Lapa doiya lapusokai batokitaan doo.

²⁵Maka yaku basalitakene doi mian-mian saibino mosinakukon mo inokitaikon TEMENENO doi yaku.