Read Banggai YEHESKIEL 12 Bible Online

YEHESKIEL 12 - Banggai bible

YEHESKIEL 12

¹TEMENENO basilingan koidan doi yaku, Nabantilan,

² “He banggapi moakiyo kotakoso ikoo dungol doi mian mo banggabut tanga-tangano. Yanila daano komatano bai aki nakitayo; daano kotolingaino, bai aki namolongol, sabab yanila yase banggabut.

³Tobikon doiya, he banggapi moakiyo kotakoso, daanon kooloyo madialang, daanon mubarang-barang doi meeng kobungkusan lalomo bunomokai mobiasamo mokinubai luwedoi mian mosinakukon. Akiyon napopook nalubat, tinggalemokai mubonua talang-talangan buno mian mobinaba doi masakukonan. Kubaiyokai kobuang doi mubonua sanggalo tukon mian mobanggabut doo nasakisio tukon babayomokai bungkusan modaano koantoko mubarang-barang doo kaluar mololoi dobuango. Tanggungekai bungkusan doo doi bengemu bunggono. Luwemo kai doi kalipokan lalomo; tanggupio komatamu sulano ikoo aki mukitayo kololoon ikoo mololoiyo. Sodiiyomokai sasaibino kobangsa Israel kitayo saibino mukinubai doo, sulano teali poingotii tuuk yanila. Banggokai yanila naikon sadal baikon yanila daanon mobanggabut.”

⁷Maka kulakukene TEMENENO Naparentah doi yaku. Doi oloyo doo koidan, tempo daano madialang kusadiayo daku barang-barang doi meeng kobungkusan lalomo, bunomo nabiasaan mian mobiol-biol nailakukon. Salataa oloyo tambuno popook, yaku mokubai buang tukon limanggu doi bonua nabeton, maka kalual loloiyo dobuanggo. Tukon sasaibino komian palatikanggene, tibul doo kutinanggung doi bengenggu, doi bundu yaku luwemo.

⁸Dodoa soono TEMENENO basilingan doi yaku, Yana bantil,

⁹“He banggapi moakiyo kotakoso, bangsa Israel, bangsa mobanggabut doo lapamo masadaikene doikoo oila modaanon ikoo kabaiyo.

¹⁰Tobikon doiya pelenggenekai doi yanila oila mo Yaku, TEMENENO Moinakatandak Tuuno bantile doi yanila. Kuteteba doo natujuan doi tomundo Yerusalem, tukon sasaibino modungoliyo kota doo.

¹¹Salitayokai baikon oila komo ikoo lakukene doo daanon lambang oila naikon moteali doi yanila, doiyamo: yanila naikon teali mian mosinakukon tukon motinaan.

¹²Doi kalipokan lalomo popook yanila tomundo naikon tanggunge kona tibul doi bengeno bunggono maka luwe. Mian-mian naikon mokubai buangdoi betong sulano yana malaat kalual, yana naikon tutupe komatano sulano aki namokita loloon nailoloi.

¹³ Bai Yaku naikon timbakene Kubuani tuuk molakoyo yana. Maka naikon Kubabayo yana doi kota Babel, tuukon indaa yana naikon mate aki naidan monggita kota doo.

¹⁴Saibino modungoliyo kamali, tongusokon saibino pongotinau tukon modagayo tomundo doo Kupoalasene doi samba kotampat. Yanila naikon Kulelenggene tukon yanila Kuakateo.

¹⁵Doi tempo yanila Kupoalasene doi bangsa-bangsa tanga-tangano kobailon doi tano-tano mololoon, yanila naikon toiyo baikon Yakumokai ko TEMENENO.

¹⁶Kosembeleng mopopoisik luwedoi yanila naikon kusalamatene luwedoi polobosian, luwedoi malaalan, tukon panakit biol-biol sulano doi bangsa-bangsa doo moddoon tanga-tangano yanila naikon sadal baikon yanila lapamo mokubai lokis tuuno. Maka yanila naikon mangakukene baikon Yakumokai ko TEMENENO.”

¹⁷TEMENENO bantil doi yaku,

¹⁸“He banggapi moakiyo kotakoso, mbombokonokai doi tempo ikoo kaan, tukon kolokotikai matakut doi tempo ikoo monginum.

¹⁹Pelenggenemokai doi posaapon kobangsa oila mo Yaku, TEMENENO Moinakatandak Tuuno bantile doi modungoliyo ko Yerusalem modaano dungol doi yanila nabuta. Yanila naikon mbombokon doi tempo kaan tukon kolokotikai matakut doi tempo monginum. Yanila nabuta naikon teali motuul, sabab saibino komian modungol idoo banggadudul molanggale ko ukum.

²⁰Kota-kota diabudodoo monooh tukon podungoli naikon minanas tukon asi-asi naikon teali motuul. Maka yanila toiyomokai baikon Yakumokai ko TEMENENO.”

²¹TEMENENO bantil doi yaku,

²²“He banggapi moakiyo kotakoso, bulando ko Israel mianno yase bantil-bantile andean nia: ‘Tempo poisoboli, bai konabuat-nabuat aki nabiasa teali’?

²³Nah, pelenggenemokai doi yanila baikon Yaku, TEMENENO Moinakatandak Tuuno, mebee potimbili nia: Andean doo naikon Kuhapuse, tobikon aki nabinantil koidan doi Israel. Salaku posobolino bontiikene doi yanila baikon kotempono laate mo, tukon samba konabuat naikon teali.

²⁴Doi Israel akiyono naikon modaanon koidan batokitaan kai ramalan moaki nabisa,

²⁵Yaku TEMENENO Moinakatandak Tuuno naikon basilingan doi bangsa Israel, tukon sasaibino Kubinantilo tantu naikon teali, aki natinunda-tunda koidan. Ndongoliyo kai he mian mobanggabut! Doi tempo mutuboan naikon Kukabaiyo saibino Kuingotikene doikoo. Yaku, TEMENENO Moinakatandak Tuuno lapamo basilingan.”

²⁶TEMENENO bantile doi yaku,

²⁷“He banggapi moakiyo kotakoso, Israel mian-miano bantile baikon batokitaan tukon munobuat doo sodo naikon teali moddon oloyo doibundu.

²⁸Tobikon doiya bantilemokai doi yanila baikon Yaku, TEMENENO Moinakatandak Tuuno, bantilekai: Saibino Daku binantil tantu naikon teali, aki natinunda-tunda koidan. Yaku, TEMENENO Moinakatandak Tuuno lapamo basilingan!”