Read Banggai YEHESKIEL 13 Bible Online

YEHESKIEL 13 - Banggai bible

YEHESKIEL 13

¹TEMENENO bantil doi yaku,

²“He banggapi moakiyo kotakoso, nggimalkai nabii-nabii Israel mobantile nakarangan ramalan susungo. Sumboliyo kai yanila namondongoli Kubantilan.”

³TEMENENO Moinakatandak Tuuno bantil, “Silakamokai nabii-nabii molongas doo! Naotunggul laate luwedoi nahayalan susungo tukon nabatokitaan moaki nabisa.

⁴He Israel munabii-nabii doo akiyo koanggano, pokakana buno asu-asu lobo motubo doi bakas kota tanga-tangano.

⁵Yanila aki badagai tampat-tampat doiyando nabeton-beton manaso, tukon koidan aki namokindok beton-beton doo. Jadi, Israel aki laate palatanggene kalukai tealimo kopolobosian doi oloyo Yaku, TEMENENO lubat ukume.

⁶Batokitaa-batokitaan yanila aki nabisa tukon yanila naramalan-ramalan tolongo kala-kala. Yanila mangaku babayo koteteba luwedoi Yaku, banggokai Yaku aki nabisa utuse yanila. Bulando Konatealian yanila moinikene yanila lamalan doo naikon moteali?

⁷Yaku, TEMENENO Moinakatandak Tuuno bantil doi yanila, ‘Mubatokitaan-batokitaan doo aki nabisa tukon muramalan-muramalan doo kakala. Komuyu bantile baikon sasaibino doo daanokai Kuteteba, banggokai Yaku aki nabiasa basilingan doi komuyu! Tobikon doiya Yaku naikon teali mumusu.

⁹Yaku naikon ukume komuyu, he nabii-nabii mobantile lamalan mokakala tukon hayalan batokitaan-batokitaan! Komuyu aki namoola koidan mebee kaputusan doi Kuumat rapat-rapat lalomo. Kosambu-sambumu naikon sinoleto luwedoi daptal Israel benseno, tukon komuyu akimo pomule doi pobuta sinungan. Maka komuyu toiyomo baikon Yaku, TEMENENO Moinakatandak Tuuno.

¹⁰ He nabii-nabii moaki nabisa! Komuyu lapamo sesatkanggene Kuumat tukon bantile baikon saibino aman tukon beles. Banggokai sasaibino doo aki! Kuumat lapamo kekendenge beton tukon batu bata momonggol kona pinaasaan, lapa doiya komuyu lubat mobacet.

¹¹He, nabi-nabii moaki nabisa mubeton naikon manas. Yaku naikon obulesene koudan babasal. Beton doo naikon linupa sokoi tukon kana udan es

¹²tobikon tolubang, tukon samba komian naikon masadai oila kogunano beton doo sineet.’ ”

¹³TEMENENO Moinakatandak Tuuno bantil, “Kumonondokan lalomo, Yaku naikon molubaton sokoi, udan babasal tukon udan es tuuk momanase beton doo.

¹⁴Yaku baniat tuuk molubange beton no komuyu moceete doo, momana-manase sulano baino pondasino komo totinggal. Beton doo naikon pisayo tukon akateo komuyu saibino. Maka komuyu toiyomo baikon Yakumo TEMENENO.

¹⁵Beton doo tukon komuyu molapamo sineet naikon lasakanggene kona hebatan Kunggimalan. Lapa doiya naikon Kubontiikene doi komuyu baikon beton doo lapamo lapuso tuuno, pokakana buno komuyu mobacet,

¹⁶he nabii-nabii moaki nabisa! Komuyu molamale baikon Yerusalem aman tukon beles, banggokai pokakana tuuno aki!” Buno doiyamo bantilan TEMENENO Moinakatandak Tuuno.

¹⁷TEMENENO bantil, “Diabudodoo, he banggapi moakiyo kotakoso, palatikanggene boi-boinemo batambogon nabiah doi antara mubangsa. Ngimolon kai yanila,

¹⁸tukon pelenggenekai oila komo Yaku, TEMENENO Moinakatandak Tuuno bantile doi yanila: ‘Silakamokai komuyu! Komuyu mokubai kulaluk-kulaluk jimat tuuk saibino komian tukon tuala-tuala mobisa-bisa sulano mian mopakeo moola nakuasaiyo mian bailon natuboan. Komuyu yase balakuasa doi tuboan matean Kuumat tukon kuasa doo komuyu pakeo tolongo mukauntungan susungo.

¹⁹Komuyu lapamo tolulaiyo Yaku doi Kuumat saalano tolongo tuuk malaat bubula ko akuno jelai tukon bubula koroti patolo. Mian-mian moaki nasalah, komuyu akateo baimokai mian-mian motantu mate komuyu sodiiyo tubo. Maka komuyu kokoliyo Kuumat tukon yanila anggayo doikoo.’ ”

²⁰TEMENENO Moinakatandak Tuuno bantil doi boi-boine mobatambogon nabiah doo, “Yaku misikit kitayo kotogas-togas jimat komuyu mopakeo tuuk mokuasaiyo Kuumat natuboan matean. Togas-togas doo naikon Kukibute luwedoi limamu, tukon mian-mian komuyu mokuasaiyo naikon Kubebaskanggene.

²¹Tuala-tuala mobisa-bisa naikon Kubendinge, tukon Kuumat naikon Kudedenggene luwedoi mukulokisan napengaruh tuuk sidutu-positukon. Maka komuyu toiyomo baikon Yakumokai TEMENENO.”

²²Komian-mian monondok mo aki namate Ikoo bula-bulandeo, tukon pobakokolian komuyu kubaiyo konoa poipoisik. Mian-mian molokis komuyu kubaiyo loba konoano sulano tataap mokubai lalim tukon aki nasinalamatan.

²³Diabudodoo tombokitaan-tombokitaan mokala pupuso tukon lamaran-lamaran bokokolii. Daku umat Kusalamatene luwedoi mugodaan molokis. Maka komuyu toiyo baikon Yakumokai ko TEMENENO.”