Read Banggai YEHESKIEL 14 Bible Online

YEHESKIEL 14 - Banggai bible

YEHESKIEL 14

¹Bubula mian luwedoi katua bangsa Israel lubat doi yaku tuuk masadaikene TEMENENO namongiasan.

²Maka TEMENENO bantile doi yaku,

³“He banggapi moakiyo kotakoso, mian-mian nia lapuso monggianggakene kobutongo doi pilogot tobikon yanila otuwong doi lalim lalomo. Bulaando Yaku yase yanila masadai?

⁴Tobikon doiya, bantilemokai doi yanila baikon Yaku, TEMENENO Moinakatandak Tuuno bateteba buno naia, ‘Samba ko Israel mianno molapamo monggianggakene kobutongo doi pilogot tukon batadikene kobutongo otuwong doi lalim lalomo, maka nalubat mangkabi otunggul doi meeng konabii, Yaku naikon timbiliyo mo pokokonoi tuuk napilogot-pilogot mo badaang doo!

⁵Saibino pilogot doo lapamo dedengene Kuumat luwedoi Yaku bai mudah-mudahan tukon Kupotimbili doo Kuumat naikon abali doi Yaku.’

⁶Popitoikenemokai koidan doi Israel mianno baikon Yaku, TEMENENO Moinakatandak Tuuno bantil doi yanila, ‘Babolimokai doi mulalim-lalim, tukon tinggale mokai mupilogot-pilogot mo tinoluwekon doo.’

⁷Samba ko Israel mianno kai mian molulubaton modungol doi antara bangsa Israel, mo badodonggon doi Yaku tukon mongianggakene kobutongo doi pilogot, maka makabi otinau doi meeng konabii naikon Kutimbiliyo susunggu.

⁸Yaku naikon lawane yana tukon tealikene tana sontoh tuuk bailonggon. Yaku naikon alase yana luwedoi Kuumat masarakat, maka Kuumat toyomokai baikon Yakumokai ko TEMENENO.

⁹Kalu meeng konabii lapamo inokolii tobikon mebee potimbili mo salah. Yakumokai molapamo tipuwo. Yaku, TEMENENO Moinakatandak Tuuno naikon alaase yana luwedoi Israel mian-mianno.

¹⁰Mau nabii doo maukai yanila momakabi naotinau, naikon malaat ukuman mopokakana.

¹¹Saibino doo kulakukene sulano Israel mianno inai koidan dedenggene Yaku tukon inai koidan mokodikitio kobutongo tukon lalim. Tukon bunodoiya yanila naikon teali Kuumat, tukon Yaku teali yanila Mian Bisa.” Yaku, TEMENENO Moinakatandak Tuuno lapamo basilingan.

¹²TEMENENO bantil doi yaku, “He banggapi moakiyo kotakoso,

¹³kalu meeng kotano mobaladosa tukon aki nasatia doi Yaku, Yaku naikon ukume tano doo. Yaku naikon momanase palasadian mokinaan, lubatene kosusaan malalaan tukon mangakate mau banggapi maukai iyayon.

¹⁴Maukai nuh, Danel tukon Ayub dungol doi tampat doo, maka namonondokan yanila toluila tolongo laate salamatene yanila butongo susungo tolong. Yaku, TEMENENO Moinakatandak Tuuno lapamo basilingan.

¹⁵Moola teali Yaku molubaton iyayon-iyayon mobarani tuuk mosokuwo modungoliyo tano doo, tobikon lipu doo teali bahaya tuuno tukon akiyo meeng komian kai barani moalokon.

¹⁶Maukai Nuh, Danel tukon Ayub dunggol idoo, maka tongo Yaku, Mian Bisa motubo. TEMENENO Moinakatandak Tuuno, yanila aki naikon laate salamatene inde tolong mau yanila napau susungokai aki. Tolongo yanila susungo tolong mosalamatene, baimokai tano doo naikon teali motuul.

¹⁷Moola teali Yaku lubatene polobosian doi tano doo, tukon Kukilimio sandata-sandata mokuat tuuk momanase mau banggapi maukai iyayon.

¹⁸Tukon maukai tolu komian budodoo dungol idoo, maka tolongo Yaku, Mian Bisa motubo, TEMENENO Moinakatandak Tuuno, yanila aki naikon moola salamatene inde komianno, maukai yanila napau susungokai aki. Tolongo yanila susungo komo salamat.

¹⁹Moola teali Yaku lubatene kopanakit biol-biol doi tano doo, tukon Kukaluare Daku nggimalan doi yana tobikon mau banggapi maukai iyayon naikon silaka.

²⁰Tukon maukai Nuh, Danel tukon Ayub dungol idoo, maka tolongo Yaku, Mian Bisa motubo, TEMENENO Moinakatandak Tuuno, yanila aki naikon moola salamatene inde komianno, mau kai yanila napau susungokai aki. Tolongo yanila susungo komo salamat sabab yanila namonondokan.”

²¹ TEMENENO Moinakatandak Tuuno bantil, “Yaku naikon tuenge Kuukum kosanggapo mobabasal tuuno doi Yerusalem tuuk momanase mau banggapi maukai iyayon. Ukuman doo doiyamo: polobosi, malalaan, iyayon barani tukon panakit biol-biol.

²²Kalukai daano komo lolos tukon salamatene kona pau-pau, palatikanggene yanila kalukai yanila lubat doi komuyu. Kitayo bulando yanila nakulokisan, maka komuyu naikon sadal baikon tapatoo Kutindakan tuuk moukume ko Yerusalem.

²³Maka komuyu kai naikon mangalati baikon saibino Kutindakan doo daanon kona alasan. Yaku, TEMENENO Moinakatandak Tuuno lapamo basilingan.”