Read Banggai YEHESKIEL 16 Bible Online

YEHESKIEL 16 - Banggai bible

YEHESKIEL 16

²“He banggapi moakiyo kotakoso, tudoikene mokai doi Yerusalem kokubai-kokubai molokis molapamo lakukene.”

³TEMENENO Moinakatandak Tuuno sumboliyo yaku pelenggene teteba nia doi Yerusalem, “He Yerusalem, ikoo sinuung doi buta Kanaan. Tamamu Amori mianno tukon tinamu Het mianno.

⁴Salataa ikoo sinuung akiyo komo patele pupulosomu aloso kai mosauwo ikoo, kai motiposio tukon timuson kai bungusiyo tukon toik.

⁵Akiyo meeng komiankai moseange doikoo tobikon yase lakukene langge-langge doo tuuk ikoo. Salataa ikoo sinuung akiyo komo seange ikoo, baimokai ikoo sinakukon doi asi.

⁶Lapadoiya alomokai Yaku tukon kitayo ikoo palabiok doi saumu nalelangan, bai Yaku aki sodiiyo ikoo mate.

⁷Kumangala paisu maka Kukumesio sauh doi butomu. Kuinggale kulitomu tukon zaitun lisosono Kukabasale ikoo buno tanaman molumbang. Ikoo tubo mosobit, kekedek tukon tambongan, tukon teali meeng koboine mongula. Kosusuno tambuno bunggul tukon mubuuk bulusan, bai ikoo tallau. Salataa Yaku alo koidan, Kukitayo mutempo baikon laatemo tuuk pobianggon. Kupusekene Daku toga doi butomu motallau, tukon Kupaladandikene kucintaano doikoo. Ya, Kutantukenemo basoanan tukon ikoo, tukon ikoo teali kungguna. Yaku, TEMENENO Moinakatandak Tuuno lapamo basilingan.

⁸

⁹

¹⁰Lapadoiya kopakeonikene doikoo kalambi mobinotikih, sapatu luwedoi kulit mohalus tuuno, poboi olono luwedoi toik lenan tukon toga sutra.

¹¹Kurias ikoo tukon permata, inoo tukon kulaluk-kulaluk.

¹²Kubekeene doikoo sosolut soongano, anting-anting tukon matuweisan tuuno.

¹³Bunomokai doiya ikoo babubungai mosoni tukon suasa; mupakean kinubai luwedoi toik lenen tukon sutra mobinotik. Ikoo moola makaan roti tukon luwedoi tarigu momonondok tuuno, tukon dokot tukon zaitun lisosonno. Mumatuweisan tuuno moluar biasa ikoo teali tomundo boineno.

¹⁴Saibino kobangsa gaale mumatuweisan motalakanadoo, tukon Yakumokai molapamo kabaiyo mupauboinean. Yaku, TEMENENO Moinakatandak Tuuno lapamo basilingan.

¹⁵Bai ikoo salah mukabaiyano komumatuweisan tukon nababangian kosambumu. Ikoo pokoloi tukon mala-malane yandomokai komo alo.

¹⁶Songobos luwedoi mupakean ikoo pakeo tuuk pobubungai tampat mososubayan mupilogot. Ikoo teali baloloa tukon mobekeene kobutongo doi samba komala-malane.

¹⁷Luwedoi pobubungai mosoni tukon suasa mo Kubekeene doi koo, ikoo kubaiyo kotimbalang-timbalang malane, maka ikoo makabai seleno tukon timbalang-timbalang doo.

¹⁸Ikoo konoikene doi timbalang-timbalang doo pakean mobinatik molapamo Kubekene doikoo. Kusosubakene doi yanila zaitun lisosono tukon kamangian molapamo kutalimayo luwedoi Yaku.

¹⁹Kubeena doikoo kinaan luwedoi tarigu momonondok tuuno, dokot tukon zaitun lisosono motuuno. Bai saibino doo ikoo sosubakene doi pilogot-pilogot doo tuuk mosananggene yanila noano. Yaku, TEMENENO Moinakatandak Tuuno lapamo basilingan.

²⁰Lapa doiya ikoo sosubakene nda pau-pau, mala-malane tukon moluko, teali sosubakon doi pilogot-pilogot. Akiyoon nasukupkai baikon ikoo aki totobos doi Yaku?

²¹Siokai ikoo alayo koidan Kupau-pau tukon sosubakene doi yanila doi pilogot-pilogot?

²²Mutuboan lalomo mominisikiton bunokai mubaloloa doo, mau soisik ikoo aki muneneke tempo loluk mupau-paunoan, tempo ikoo tallau tukon palabiok doi sauhmu susungo nalelangan susumu.”

²³TEMENENO Moinakatandak Tuuno bantil, “Silakamokai ikoo! Bisa silakamo! Ikoo lapamo lakukene saibino kokulokisan doo.

²⁴Koidan kai, doi loloon-loloon kota tukon samba kololoon bibilo ikoo kekendenge kotampat-tampat tuuk sosubaiyo kopilogot tukon mololoai.

²⁵Ikoo kulokisene komumatuweisan. Butomu ikoo bolukikene doi samba komala-malane moalo, tukon aki natade-tade ikoo baloloa.

²⁶Mesir mupolanian mobabasal konalsu doo, lapamo ikoo pokila moolo. Ikoo sangadaiyo mololoiyo tuuk mukaibaiyo Yaku nggimal.

²⁷Diabudodoo Yaku ukume ikoo tukon alayo kobalakaat molapamo Kubeekene doi ikoo. Kusalakanggene ikoo doi Filistin mian-mianno momisikitene ikoo tukon mo toluwe kitayo mukakabai mo lokis doo.

²⁸Bai ikoo akiyon koidan mubiakene; sabab doiya ikoo lelenggene-lelenggene ko Asyur mianno. Ikoo teali yanila napololoai, bai aki koidan nalaate biaikene luwedoi yanila.

²⁹Maka ikoo teali baloloa doi Babel mianno, bangsa mobadaang doo. Bai yanila kai aki nasanggup beena ikoo mubiaikene.”

³⁰TEMENENO Moinakatandak Tuuno bantile, “Saibino doo lapamo ikoo lakukene bunomo baloloa moaki natoiyo komaa.

³¹Doi loloon-loloon koidan kota tukon doi samba kololoon ikoo kekendenggene tampat-tampat tuuk mososubaiyan pilogot tukon mololoai. Bai ikoo bolikonkai buno baloloa biasa mopalalu doy.

³²Ikoo buno boloki mo kulokisene kona lakai tukon mokubai salah tukon mala-malane bailon.

³³Meeng komian mobaloloa sidutu malaat pabeal, bai kobaliko ikoomokai mobeena tambo doi mubibian-bibian, bisa ikoo budukio yanila tukon doy sulano lubat luwedoi yaa-yaa tuuk moolo pokoloikoo.

³⁴Ikoo ploloai bailon luwedoi mobai-bailon. Akiyokai mopakisaiyo ikoo teali baloloa. Ikoo aki nabineal, tolongo ikoo mobeale susumu. Bisamo ikoo bailon luwedoi bai-bailonggon.”

³⁵He Yerusalem, pololoai lengelekai oila ko TEMENENO Moinakatandak Tuuno nabinantil, “Ikoo lapamo bukayo mukalambi tukon bunokai poloai ikoo salakanggene kobutomu doi bibian-bibian tukon mupilogot-pilogot mominatakuton doo. Mupau-pau ikoo akateo tukon ikoo sosubakene tuuk doi pilogot-pilogot doo.

³⁶

³⁷Tobikon doiya saibino mubekas bibian naikon Kupotongikene, mau muinias maukai mumisikitene. Yanila naikon kokondong boilingio ikoo tukon naikon liate saibino mupakean, tobikon yanila tanggale kobutomu mo tallau.

³⁸Ikoo naikon Kuukume sabab pololoayan tukon mangakatean molapamo ikoo kabaiyo. Doi nggimalan lalomo tukon Kunggimalan ikoo naikon Kuukume mate.

³⁹Ikoo naikon Kusalakanggene doi mubibian doo tukon yanila naikon lubange tampat-tampat mubaloloan tukon mososubaian pilogot-pilogot. Saibino kopakean tukon mupobubungai naikon yanila lampase, tobikon ikoo tallau.

⁴⁰Yanila naikon sumboliyo komian badaang mosakule ikoo tukon batu, tukon mopate-patele kobutomu tukon sabel.

⁴¹Yanila naikon suayo mubonu-bonua tukon mosumbolii saibino koboine sakisiyo komu ukuman. Bunomodoiyakai naikon Kutadekene komu baloloan. Ikoo aki naikon ebe-ebese ko hadiah koidan doi mubibian-bibian.

⁴²Sodo lapa doiya Kunggimalan naikon tade, tukon Yaku naikon teali abali tanang. Yaku aki naikon nggimal koidan kai masakit konoano.

⁴³Yaku ukume ikoo sabab ikoo akimo muneneeke bulando Yaku pakulio ikoo salaata ikoo daano mongula. Ikoo kubaiyo Yaku nggimal tukon saibino mukakabai molokis doo. Bulaando saibino mukakabai mominatakuton doo, ikoo daano mosungungiyo koidan tukon baloloa? Yaku, TEMENENO Moinakatandak Tuuno lapamo basilingan.”

⁴⁴TEMENENO bantil, “He Yerusalem mian-miano naikon konoikene naandean nia doikoo, ‘Bunokai tinano, pokakana koidan naboine.’

⁴⁵Bisa ikoo daano tinamu napau molukono. Yana misikitene doi mulakai tukon doi napau-pau susungo. Ikoo ala doi utus-utusomu moluko koidan mosikitene kona langkai tukon napau-pau. Ikoo tukon utus-utusomu, doiyamo kota-kota doi bibilomu daanon kotinano Het mianno tukon tamano Amori mianno.

⁴⁶Utusomu langgongo daanon Samaria doi lembet tukon saibino kona kampung. Tukon utusumo pioto daano Sodom doi lalom tukon saibino kona kampung.

⁴⁷Ikoo biaikenemo mololoiyo yanila nalolon tukon kitayo yanila nakokubai molokis doo? Akion! Aki namalumbit koidan ikoo lobian kai lokis doi yanila.

⁴⁸Tolongo Yaku, Mian Bisa motubo TEMENENO Moinakatandak Tuuno bantile, koutusomu Sodom tukon nakampung-kampung akiyoon kai nakulokis ikoo tukon nakampung-kampung.

⁴⁹Sodom tukon nakampung-kampung babanggal sabab kona palasadian badaang kokinaan tukon moola tubo tukon tanaang tukon dame. Bai yanila aki napalaatikanggene komian motallais tukon mianno motinoitulai.

⁵⁰Yanila babanggal tukon motikas konoano, tukon kabaiyo kolange-langge mominisikiton. Sabab doiya yanila Kumanase buno molapamo Kukitayo.

⁵¹Bisa Samaria kulokis, bai kona lalim akiyo sembeleng luwedoi mulalim-lalim. Mukakabai lobian tuuno koidan kona kulokisan. Utus-utusomu moluko naikon akiyo kona salah pinokoikon tukon ikoo. Ikoo sio mulasayo mamaa tukon tutulai!”

⁵²

⁵³TEMENENO bantil doi Yerusalem, “Sodom tukon Samaria tukon yanila nakampung naikon Kutealikene abali makmur. Lapa doiya, maka sodo ikoo Kutealikene monondok koidan.

⁵⁴Tukon bunodoiya ikoo naikon mamaa doi butomu susumu, tukon mutinotulaian naikon tudoikene doi utus-utusomu monondoko yanila natuboan.

⁵⁵Yanila tukon yanila kampung-kampung naikon teali abali monondok tuuno, koidan ikoo tukon mukampung-kampung.

⁵⁶Bolikonkai ikoo biasamo kokumbite ko Sodom doi tempo ikoo daanon mobabanggaal

⁵⁷tukon mukulokisan ikoo natinoi? Diabudodoo ikoo pokakanamo tukon yana; ikoo teali Edom mianno nakinokumbit doi Filistin mianno tukon mopokolanian bailon mo minisikiton doi komuyu.

⁵⁸Ikoo sio sakisaa salaku mukakabai akibato momadikit tukon minatakuton doo. Yaku TEMENENO lapamo basilingan.”

⁵⁹TEMENENO Moinakatandak Tuuno bantil, “Ikoo naikon Kulakukene pokakana tukon mukakabai, sabab ikoo lapamo akienggene mutotopi tukon lisiyomo Kuperjanjian molapamo akienggene tukon ikoo.

⁶⁰Bai yaku naikon neneeke perjanjian molapamo Kukubaiyo tukon ikoo doi tempo mumongulaan tukon mokubai perjanjian tukon ikoo, molaku tuuk sidutu-posidutukon.

⁶¹Ikoo naikon neneeke doi kakabai-kakabai tukon lasayo mamaa doi tempo utus-utusomu Kuambalinggene doikoo. Yanila naikon Kutealikene buno mupau-pau, maukai langge doo aki tongusokon doi Kuperjanjian lalomo tukon ikoo.

⁶²Yaku naikon mokubai perjanjian moboolu tukon ikoo, maka ikoo toiyomo baikon Yakumokai TEMENENO.

⁶³Yaku naikon maafkanggene saibino mukasalahan, bai ikoo aki naikon natoliminggene tukon ikoo naikon lasayo mamaa tuuk nabantil oilamokai. Yaku TEMENENO Moinakatandak Tuuno lapamo basilingan.”