Read Banggai YEHESKIEL 17 Bible Online

YEHESKIEL 17 - Banggai bible

YEHESKIEL 17

¹TEMENENO bantil doiyaku, “He banggapi moakiyo kotakoso, salitaikene doi Israel mian-mianno koandean,

²Yakumo, TEMENENO Moinakatandak Tuuno yase pelenggene doi yanila: Daanon komeeng kotomisi Kuweang mobabasal kobuulono monondok tukon kapilo bebelak tukon bukuan. Yana benga doi Libanon Bunggulo, moloto meeng cemara batango pusuko,

⁴maka mababayo tukon binggakene doi kota dagang molame.

⁵Doibundu yana mangala mosinakakon meeng kobatango modaano mongula luwedoi buta Israel, tukon yana sakakene doi asi mosubul, moaki nakakulangan paisu.

⁶Mosinakukonoo tealimo anggur batango motubo pepende bai landa moloas. Kolanga-langano totudoiyo doi Kuweangoo, tukon koanggo-anggolo usok doi buta lalomo tuuno. Anggulo batango molumbang tuuno.

⁷Daanon tomisi Kuweang mobabasal bailon daano; kokapilo bebelak tukon kobuulono bondolong. Maka doangguro batango koanggo-anggolo tuduiyo doi tomisi doo kuweang moboolu doo tukon moinikene sulano tomisidoo yase beene doiyana lobian badaang kopaisu luwedoi modaano doi asidoo.

⁸Banggokai angguro batango lapamo tasakukon doi buta mosubul tukon paisu molobian, tobikon laate molumbang koloono, kosaono, badaang, tukon teali anggur batango monondok.

⁹Maka, Yaku TEMENENO Moinakatandak Tuuno, masadai: Molakai angguro batango tubo tukon tuboi? Akiyono tomisi kueang kotumbeno naikon mokibute yana tukon anggo-anggolo; mogegese kosaono, molotoyo kolanga-langano tukon sodiikene yana moloyu? Aki namapalalu badaang kotanaga kai bangsa mobukuan tuuk mokibute batango doo polong koanggo-anggolo.

¹⁰Bisamo yana tasakakono tuuno, bai molakai yana tubo banggadudul tukon tuboi? Akikai yana naikon moloyu kalu mombul puule? Akikai yana motuul doi tampat nasinakukonan?”

¹¹TEMENENO bantil doi yaku,

¹² “Masadaikene doi mobanggabut-banggabut doo, oilakai yanila mangalatikene andean doo alatino. Pelenggene doi yanila baikon tomundo Babel lubato doi Yerusalem, tukon akute kotomundo Yehuda tukon mobabasakene-babasakene kota doo doi Babel.

¹³Maka yana piliyo komeeng komian tomundo Yehuda tukon nakaluarga, makabai perjanjian tukon yana, tukon sumboliyo yana batotopi mololo doi yana. Tomundo Babel doo taane komian-mian mopenting,

¹⁴sulano batomundoan Yehuda naikon akimo nabangun koidan, tukon damine baikon perjanjian noo tutuu iloingi.

¹⁵Bai tomundo Yehuda banggabuto tukon sumboliyo bobitokon doi Mesir sulano namalaat adalan tukon suludadu mobadaang. Oilakai yana naikon daanon kohasilo? Oilakai yanila naikon sinodiikon nalolos? Yana aki namoolah akienggene koperjanjian nakinonoi ukuman!

¹⁶Tolongo Yaku, Mian Bisa motubo, TEMENENO Moinakatandak Tuuno, tomundo Yehuda naikon mate doi Babel, sabab yana akienggene kona totopi tukon nalanggalano kona perjanjian tukon tomundo Babel, molapamo odukke yana doi kursi batomundoan bunggono.

¹⁷Tukon nasuludadu Mesir mobarani doo, aki nasanggup tulunge yana luwedoi Babel mianno namolobosian mokabaiyo mangatambunan buta tukon makali goot-goot tuuk mangakatean mian badaang.

¹⁸Sabab yana lengelemo kototopi tukon naperjanjian, yana naikon akimo namoola loloskanggene kobutongo.

¹⁹Tolongo Yaku, Mian Bisa motubo, TEMENENO Moinakatandak Tuuno, tomundo Yehuda Kuukume sabab langgalemo kona perjanjian tukon tomundo Babel, banggokai yana batotopimo lolo doi Kosambunggu tuuk namalaatan.

²⁰Yaku naikon banatene kopukat molakoyo. Yana naikon kubaiyo doi Babel tukon Kuukume imbali sabab yana aki nasetia doi Yaku.

²¹Kona suludadu momonondok tuuk naikon matemo doi polobosian lalomo, baino mobalahasil naikon lolos poalaas saibino kojulusan. Maka Daku umat toiyo baikon Yaku, TEMENENO lapamo basilingan.”

²²Naiyamo ko TEMENENO Moinakatandak Tuuno, “Luwedoi cemara batango motatandak, naikon Kupupue kopuduko maka Kulotoyo meeng kolanggaano mo mongula; Kusakakene kolanganodoo doi bunggul mo laatekobunom.

²³Doi bungkuko motatandak tuuno doi Israel, Kulibakene yana. Indaa yana naikon sopii, tukon badaang kosaono, maka teali cemara batango monggangaan. Saibino kotomisi rupano naikon makabai talea dolalomo tukon soop doibilit nalindungiano.

²⁴Saibino kokayung doi tano doo naikon toiyo baikon Yakumokai ko TEMENENO. Kayung motatandak Kutapeo; kayung mopepende, Kukabaiyo tubo tatandak. Kayung momonondok Kutealikene motuul tuuno; tukon kayung momotuul Kubeena sopiino tuboi. Yaku, TEMENENO lapamo basilingan, saibino Dakubantilan naikon linaksanakon.”