Read Banggai YEHESKIEL 18 Bible Online

YEHESKIEL 18 - Banggai bible

YEHESKIEL 18

¹TEMENENO bantil doi yaku,

² “Bulandoo naandeannia bangadudul binantil-bantil doi tano Israel? ‘Orang tua makaan anggur saono momeele kotamiso, bai pau-pau doila komo mangilu kongolingo.’

³Tolongo Yaku, Mian Bisa motubo, TEMENENO Moinakatandak Tuuno, andean doo akimo naikon binantil koidan doi Israel.

⁴Samba komian naansan danon Kumilik, mau orang tua naansan maukai pau-pau naansang. Mian mobaladosa, yanamo naikon komo mate.

⁵Kalukai daanon komian momonondok adil tukon jujur.

⁶Yana aki nasosuba doi Israel mianno napilogot kabai makaan kurban mosinosubakon doi tampat-tampat nggalano koilah-ilah. Yana akiyoon idan nagodaiyo komian naboloki bailon kabai pokoloi koboine modaanon bolokon.

⁷Yana aki nabiasa bakokolii kabai pondikuk. Mian mojamine barang-barang mobasamea doi yana sidutu abalinggene. Mian momalaal binee kaan tukon mian moakiyo kona bokukum, yana binee pakean.

⁸Yana akiyon namonggisabokene tukon bingano. Yana aki naiyase kubaiyo molokis tukon samaba kopodanganian yana mobee kaputusan mojujur.

⁹ Yana tulutiyo Daku parentah tukon taat doi Kuukum-ukum. Mian mobunodoiya mo jujur tukon naikon tubo tataap. Yaku, TEMENENO Moinakatandak Tuuno lapamo basilingan.

¹⁰Bai andean mianno daano kona pau moyase pondikuk, mangakate, tukon makabai badaang molokis bailon

¹¹moakiyo kotamano lakukene, yana makaan sosubakon doi tampat-tampat nggaalano koila-ila. Yana godayo tukon koloyo komian bailon naboloki.

¹²Yana yase okoliyo komian motallais, ndikuke, sitayo komian nabarang petaruh mobasamea doiyana. Yana taus doi bakas-bakas mian moaki natingonio ko TEMENENO tukon sosubaiyo kopilogot mominisikitan.

¹³Yana beenaa masabol tukon nabunga. Bulaakai komian bunodoiya naikon tubo? Aki! Yana lapamo kabaiyo saibino kopalabuatan mominisikiton, tukon yana naikon mate! Namatean kosabapo nakakabai susungo.

¹⁴Andeno mian moma kabai badaang kolokis doo daano kona pau tukon paudoo kitayo saibino kotamano nakakabai, bai aki naloingi.

¹⁵Paudoo aki naiyase sosubaiyo ko Israel mianno napilogot, kabai makaan sosubakon mosinakukon doi tampat-tampat nggaalano ilah-ilah. Yana aki nabiasa gangguwe mian bailon naboloki,

¹⁶kabai pipike kai indeemokai kopondikuk. Mian mobasamea nabarang-barang binatalukon doiyana sidutu yana abalinggene. Mian momalaal yana beena kaan tukon mian moakiyo kona kalambi yana beena pakean.

¹⁷Yana aki namakabai lokis kabai binggotiyo tukon bunga. Yana taat doi Kuukum-ukum tukon taatio Daku parentah. Pau doo aki naikon namate sabab tamano nalalim-lalim, bai tataap tubo.

¹⁸Kobaliko tamano komo yase bakakala, pondikuk tukon makabai lokis bailonggon, naikon mate sabab kolalim-lalim yana lakukene susungo.

¹⁹Bai tantu daano komian masadai bulaando dopau doo aki naiyase motanggunge tamano nalalim-lalim pabaloso. Kona potimbili doiyana, sabab kona pau doo monondok tukon jujul. Yana taatio Daku ukum-ukum tukon molole lakukene, maka yana tataap tubo.

²⁰ Mian mokubai lalim, yanamo naikon komo mate. Kobaliko tamano nakasalahan Paudoo aki tanggunge, bai koidan tamano aki natanggunge kobaliko napau nalalim-lalim kinubai. Mian monondok naikon malaat pambalasan monondok sabab nakokubai monondok. Tukon mian molokis naikon mandarita pabaloso luwedoi nakulokisan.

²¹Kalu meeng komian molokis akimo koidan namakabai lalim, tukon tambuno taatio Daku ukum-ukum, tukon lakukene kokakabai momondok tukon mobisa, yana aki naikon namate.

²²Saibino kona lalim naikon inompuni; yana naikon tubo, sabab lakukene komo bisa.

²³Oilakai ikoo pikikene Yaku sanaang TEMENENO Moinakatandak Tuuno kalu mian molokis mate? Sasaibino aki tuuno! Yaku yase yana tinggalemo kona lalim-lalim sulano yana tataap tubo.

²⁴Bai kalu meeng komian monondok akimo nakubaiyo komo mondok koidan, tolongo lakukene kokulokisan tukon saibino kokakabai mominosikiton mosidutu mian lokis lakukene, oilakai yana naikon tataap tubo? Aki! Luwedoi nakakabai-kakabai monondok doo, akiyono komeeng kai moinonook koidan. Yana naikon mate sabab mokubai lalim tukon akimo namolole doi Yaku.

²⁵Banggokai daano, mobantil bunonia. ‘TEMENENO natindakan kaliru.’ Ndongoliyo ko Israel mianno! Kutindakan kaliru? Komiyumo mokaliru.

²⁶Kalu mian momondok aki nakabaiyo komonondok mate, sabab kulokisan molapamo lakukanggon.

²⁷Bai kalu mian molokis aki namakabai lalim koidan bai tambuno lakukene kokubai mokana tukon monondok, kobutongo naikon salamat.

²⁸Yana sadaliyomo saibino kona kakabai maka tade mokubai lalim. Tukon bunodoiya yana aki namate bai tataap tubo.

²⁹Tukon komuyu, Israel mianno, komuyu bantile baikon TEMENENO natindakano doo kaliru. Kalirumo Daku tindakan he Israel? Aki! Komuyumo komo kaliru!”

³⁰TEMENENO Moinakatandak Tuuno, bantile, “He Israel mianno, Yaku naikon adilio samba komian pololoikon tukon nakokubai. Badodoloono luwedoi mulalim-lalim. Inai mosodiikene mulalim-lalim momanase kobutomu.

³¹Atadeomo konoa nakulokisan saibino komuyu molakukene tukon mupikilan teali boolu. Bulaando komuyu motantumo mate?

³²Yaku aki sanaang kalu meeng komian mate. Tinggalemo komulalim-lalim sulano komuyu tataap tubo. Yaku TEMENENO Moinakatandak lapamo bosilingan.”