Read Banggai YEHESKIEL 19 Bible Online

YEHESKIEL 19 - Banggai bible

YEHESKIEL 19

¹Mian Bisa sumboliyo yaku mananikene mandaungan nia tuuk lua komian tomundo Israel:

²Tinamu buno singa molukono mohebat tukon luar biasa. Yana kabasale kona pau-pau doi antara singa-singa mobarani.

³Salah komeeng kona pau yana didike tukon yana otunggule mounggoli musuh. Maka yana tealimo singga mobabasal posoku tukon pakaan banggapi.

⁴Bangsa-bangsa molongol tentang yana pototongi sulano yana lakoyo. Yana ilako doi buang lalomo tukon tinaan, maka siniika doi Mesir tukon tongusokon.

⁵Akiyo kotakoso tinano totiiliyo kona pau; maka yana toiyo baikon lapuso kona minoinikon. Maka kona pau bailon kona latih teali singa barani tukon bukuan.

⁶Singa napaudoo tealimo babasal tukon polaing ko singa-singa bailonggon. Yana inotunggul mounggolian musuh tukon tealimo pakaan mian koidan.

⁷Benteng-benteng yana duduwo, kota-kota yana manase. Sasaibino modungoliyo tano doo teali nggabut mondongoli nangatonan momombokon.

⁸Bai bangsa-bangsa luwedoi nawilayah potikunggon malakoi luwedoi yaa-yaa. Yanila sakukene kobuany sulano nalakoyo tukon yana doo ilako doi yanila na palangkap lalomo.

⁹Yana inusukon doi kulungan singa maka binaba doi tano Babel momangadap tomundo. Yana dinagai tuuno sulano nanggaton inai nalongol koidan doi Israel bunggu-bunggulo motatandak bunggono.

¹⁰Tinamu bunokai anggur batango momonondok motubo doi asi mololani kopaisu batango. Yana teali nasilumbang tukon saono sabab idoo kopaisu lobi-lobian.

¹¹Kolaangaano bukuan, aki nagampang moloto teali natealikene tongkat batomundoan. Puduko tatandak tuuno laate kobunom-bunom. Yana saibino komian eanggene sabab yana tatandak tukon loono basalimbung.

¹²Bai yana tina-tinano monggimolon yana kinibuto, doi bundu sinakakon doi buta. Mombuul tolopot puul, kosaoono monondok motuul. Kolangano moloto, teali motuul maka sinua.

¹³Dia budodoo yana sinakakong doi padang bone, doi buta motuul tukon akiyono kopaisu.

¹⁴Anggur batango doo aung molala dalepe; pangano tukon saono tosuamo saibino. Kolangano dia budodoo akiyo namonggolan; akimo namoola teali tongkat batomundoan. Doiyamo mandaungan mokinuai-kuaikon umat momananikene.