Read Banggai YEHESKIEL 20 Bible Online

YEHESKIEL 20 - Banggai bible

YEHESKIEL 20

¹Doi tanggal songulo bituwon kolimano, taun kopituno lalomo tempo kami nasinakukon bubula, komian katukatua Israel lubat doiyaku tuuk mangkabi TEMENENO natotudo. Sambuno lapa yanila osulang doi salaangu,

²yaku lengele TEMENENO bantil doiyaku,

³“He banggapi moakiyo kotakoso, basilingano doi pokatua-katua doo tukon bantile baikon, Yaku, TEMENENO Moinakatandak Tuuno bantil bunoi naia, ‘Barani tuuno komuyu mangkabi totudo doi Yaku! Demi Yaku, Mian Bisa Motubo, Yaku aki sanaang kinobii totudo luwedoi koo! Yaku TEMENENO Moinakatandak Tuuno lapamo basilingan.’

⁴He banggapi moakiyo kotakoso, ikoo lapamo basadia hakimio yanila? Nah, kabaiyomokai! Ingotiikene yanila sasaibino kokulokisan naikon molapamo yanila nambumbu lakukene.

⁵ Pelenggene doi oila Daku binantil nia. Yaku lilikemo Israel bingkate kototopi tuuk doi yanila. Doi Mesir, Yaku okitakene kobutonggu doi yanila tukon bantil, ‘Yakumokai ko TEMENENO mu Mian Bisa.’

⁶Doi tempodoo Yaku batotopi naikon babayo yanila sumbut luwedoi Mesir tujuiyo kolipu Yaku molilike tuuk yanila. Tano doo kaasa tukon molumbang, buta momonondok tuuno doi posaapon ko dunia.

⁷Yaku sumboliyo yanila sakukene kotimbalang-timbalang molokis yanila moyase doo, tukon Kulalane yanila mookoditio butong tukon sosubaiyo kopilogot-pilogot luwedoi Mesir, sabab Yakumokai yanila na TEMENENO Mian Bisa.

⁸Bai yanila lawane Yaku tukon aki naiyase ndongoliyo Yaku. Yanila aki naiyase sakukene kotimbalang-timbalang mokulokisdoo tukon koidan aki naiyase tade, sosubaiyo kopilogot-pilogot Mesir. Doi tempo yanila daano indaa, Yaku siapo naikon motinggale Daku nggimalan doi yanila doo.

⁹Bai Yaku aki Kukabaiyo, sulano Kosambunggu inai natinotulai luwedoi bangsa-bangsa doi tampat yanila daanon. Sabab doi bangsa-bangsa salaano doo, Yaku lapamo umumkanggene baikon bangsa Israel naikon Kubabayo sumbut luwedoi Mesir.

¹⁰Maka Yaku babayo yanila sumbut luwedoi Mesir tujuiyo ko padang bone.

¹¹ Imbali Yaku beekene doi yanila Daku parentah-parentah tukon Kuotunggulikene Daku ukum-ukum mo sio yanila taatio, sabab mian motaatio naikon tataap tubo.

¹² Yaku sumboliyo yanila holomatio kooloyo Tadean salaku paloosan Kuperjanjian tukon yanila, tuuk moingotikene baikon Yaku TEMENENO, lapamo Kualaase yanila tuuk doi Yaku.

¹³Bai doi padang bone doo koidan yanila lawane Yaku. Yanila langgalemo Daku parentah-parentah, tukon tolake Daku ukum-ukum mojamine baikon mian motaatio tataap tubo. Yanila todudul kulokisene kooloyo Tadean. Tobikon doiya, doi padang bone doo Yaku sadiamo naikon mosodiiyo Daku nggimalan tuuno doi yanila tukon mosilakakene yanila.

¹⁴Bai yanila aki Kulakukene demi nahinolomatian Kosambunggu, sulano Kosambunggu inai natinotulai bangsa-bangsa mokitayo Yaku babayo Israel sumbut luwedoi Mesir.

¹⁵ Doi padang bone doo Yaku koidan nggimolio baikon bangsa Israel aki naikon Kubabayo usok doi buta molapamo sinadiakon buat yanila, yanila nabuta mokaasa tukon molumbang tukon momonondok tuuno doi posaapon ko dunia.

¹⁶Nggimalan doo Kubantile sabab yanila lalaikanggene Daku parentah-parentah langgale Daku ukum-ukum tukon okoditio kooloyo Tadean. Yanila yasene tuuno sosubaiyo yanila napilogot-pilogot.

¹⁷Bai doibundu Yaku seseange doi yanila tobikon yanila aki teali Kuateo doi padang bone doo.

¹⁸Kobaliko mian-mian mongula doi antara yanila, Kuotinauwo buno nia, ‘Inaikai muloloi mumbumbu naparaturan kinubai. Inai momokita yanila nakabiasan tukon inai koidan mokodokitio kobutomu tukon sosubaiyo yanila napilogot-pilogot.

¹⁹Yakumokai ko TEMENENO Mian Bisa. Taatiyomo ko ukum-ukum tukon Yaku naparentah-parentah.

²⁰Odotiyo kooloyo Tadean sulano teali paloosan perjanjian antara Yaku tukon komuyu, tukon moinggotikene komuyu baikon Yakumo mu TEMENENO Mian Bisa.’

²¹Bai angkatan muda doo nggimolon telhadap Yaku. Yanila langgale Daku ukum-ukum tukon aki nalakukene Daku parentah-parentah, mojamine baikon komian motaatio tataap tubo. Yanila kulokisene kooloyo Tadean. Tobikon doiya Yaku lapamo siap naikon mosodiiyo Daku nggimalan tuuno terhadap doi yanila doi padang bone doo tukon akateo yanila sasaibino.

²²Bai Yaku aki Kulakukene sulano Kosambunggu bangsa-bangsa inai natotulaiyo mokitayo Yaku babayo Israel luwedoi Mesir.

²³ Doi padang bone doo Yaku naikon batotopi baikon Yaku naikon poalasene yanila posaapon kodunia,

²⁴sabab yanila lalaikenemo Daku parentah-parentah, banggalemo kodikitio kooloyo Tadean, tukon tataap sosubaiyo kopilogot-pilogot yanila nambumbu monggagale.

²⁵Doi bundu yaku beena doi yanila ukum-ukum moaki namonondok tukon parentah-parentah moaki namoola mebee tuboan.

²⁶Yaku sodiiyomo yanila kodikitio butong tukon yanila nasosubakon-sosubakon susungo, baikon yanila napau-pau malane langgong yanila sosubakene. Caradoo doiya yaku ukume yanila sulano yanila toiyo baikon Yakumokai TEMENENO.

²⁷Nah banggapi moakiyo kotakoso, pelenggene doi Israel mianno, oila komo Yaku TEMENENO Moinakatandak Tuuno bantile doi yanila: Naiya sontoh bailon motudoikene bulaando mumbumbu totulayo Yaku tukon aki nasatia doi Yaku.

²⁸Yaku babayo yanila doi, buta molapamo Yaku dondike doi yanila. Salataa yanila bunggul-bunggul motatandak tukon kayung-kayung mosalimbung, yanila sosubakene sosubakon doi tampat-tampat doo. Yanila kubaiyo Yaku nggimal sabab sosubakon-sosubakon mosinua tukon yanila nasisinosubakon anggur.

²⁹Yaku masadai doi yanila, ‘Tampat-tampat tatandak oila komu dinutidoo?’ Maka tambun doi tampat-tampat doo sinumbuikon ‘Tampat-tampat motatandak’.

³⁰Jadi pelenggenemo doi Israel mianno oila komo Yaku, TEMENENO Mian Bisa Moinakatandak Tuuno bantilemo doi yanila. ‘Bulaando komuyu lakukene kolalim-lalim bunomo mumbumbu nailakukon? Bunomo yanila, komuyu ikutio koidan kopilogot-pilogot mokodikitio doo.

³¹Baikon polong oloyo nia kai komuyu kodikitio kobutong tukon babayo kososubakon tukon suayo mupau-pau salaku sosubakon doi pilogot-pilogot. Maka komuyu daano barani makabi otinau luwedoi Yaku? Demi Yaku, Mian Bisa Mutubo, TEMENENO Moinakatandak Tuuno, komuyu aki Kupataikene makabi otunggul luwedoi Yaku.

³²Komuyu yase pokakana bangsa-bangsa bailon tukon modungoliyo kotano-tano bailon mososubaiyo kokayung tukon batu. Bai damu inonoko aki naikon nalaate.’ ”

³³“Demi Yaku, Mian Bisa Mutubo, TEMENENO Moinakatandak Tuuno, komuyu Kuingotikene baikon sabab Daku nggimalan, komuyu naikon Kuparentayo tukon kakarasan tukon tagaas tobikon komuyu rasakanggene Daku kuasa. Komuyu naikon Kupotongikene tukon Kubabayo abali luwedoi sasaibino kotano tampat komuyu napinoalasonan.

³⁴

³⁵Maka komuyu naikon Kubabayo abali doi ‘Padang Gurun Bangsa-bangsa.’ Indaa komuyu naikon Kuadilio tukon posalaan duduso,

³⁶bunomo molapamo Kubantile telhadap mumbumbu doi Gurun Sinai. Yaku, TEMENENO Moinakatandak Tuuno lapamo basilingan.

³⁷Komuyu naikon Kulakukene tukon kakalasan sulano komuyu taatiyo Daku paladandian.

³⁸Saibino kopanggabut tukon molokis naikon Kubiele luwedoi komuyu tanga-tangano. Yanila naikon Yaku babayo sumbut luwedoi tano-tano tampat yanila diabudodoo dungol tukon aki pataikene abali doi tano Israel. Maka toiyomo komuyu baikon Yaku TEMENENO.”

³⁹TEMENENO Moinakatandak Tuuno bantil, “He Israel mianno, diabudodoo tersera doi ikoo. Banggadudukenemo mokubai lalim tukon mososubai mupilogot-pilogot! Bai ingate baikon lapadoiya komuyu sio taatio Yaku tukon aki koidan kulokisene Kosambunggu momolius tukon mababa sosubakon doi mupilogot-pilogot doo.

⁴⁰Sabab doi tano Israel, doi Kubunggul momoliyous, komuyu saibino, bangsa Israel naikon sosubaiyo Yaku. Indaa naikon Yaku sanaang, doikoo tukon pokonoi matalima musosubakon-sosubakon, musinosubakon-sinosubakon momonondok tuuno tukon mubinekon-binekon motangalaas.

⁴¹Sambuno lapa komuyu kobaiyo sumbut luwedoi tano-tano tampat komuyu pinoalaason, Yaku naikon pototngikene komuyu tukon matalima sosubakon musinua. Maka toiyomo saibino kobangsa baikon Yaku nia Mian Bisa Momoliyous tuuno.

⁴²Kalu kai komuyu kubabayo abali doi buta Israel, buta Yaku modondikene doi mumbumbu, maka komuyu toiyomo baikon Yakumokai ko TEMENENO.

⁴³Indaa komuyu naikon neneeke saibino kokubai mominisikiton molapamo okodikitiyo kobutomu. Maka komuyu naikon toluwe neneeke saibino kulokisan doo.

⁴⁴Kalukai komuyu lapamo Kulakukanggene buno doiya demi namonondok Kosambunggu, tukon bolikon napokakana mukalakuan mokulokis tukon mukakabai molokis, komuyu Israel mianno toiyomo baikon Yakumokai TEMENENO. Yaku TEMENENO Moinakatandak Tuuno lapamo basilingan.”

⁴⁵TEMENENO bantil doi yaku, buno naia,

⁴⁶“He banggapi moakiyo kotakoso, kitayo taikon doi lalong Liekene lalong butano tukon nggimoliyo komosolot indaa.

⁴⁷Sumboliiyo mosolotoo doongoliyo oila Yakumo ko TEMENENO Moinakatandak Tuuno bantile doi yana, ‘NDongoliyo! Yaku naikon bangokoiti aung mosuayo kabus samba kokayung modaano doikoo, mau momotuul maukai moakiyo namotuul. Aung mokait-kait too aki laate pinosoi, yana naikon landa luwedoi loloong pituwoo kolembet tukon saibino komian saibino naikon omiyo kona monasan.

⁴⁸Yanila naikon sadalio baikon Yaku, TEMENENO mookoitio aung doo, tukon akiyo komeeng komian kai moola naposoiyo.’ ”

⁴⁹Bai yaku Yeheskiel nyatakanggene daku kabalatan tukon bantil, “TEMENENO Moinakatandak Tuuno, inai mosumboliyo yaku mobantile doiya! Saibino komian mengelumo sabab yaku yase basiling tukon andean tobikon nasulit naminangalatikon.”