Read Banggai YEHESKIEL 21 Bible Online

YEHESKIEL 21 - Banggai bible

YEHESKIEL 21

¹TEMENENO bantil doi yaku, Nabantile,

²“He banggapi moakiyo kotakoso, kutukiyomo ko Yerusalem. Kutukiyomo tampat-tampat bakaledaan imbali. Ingotikene ko Israel nabuta,

³baikon Yaku, TEMENENO, bantil bunonia, ‘Yaku nia mumusuh, Yaku naikon kibute dakusabel tukon akateo komuyu saibino, molokis maukai momondok.

⁴Tukon Daku sabel naikon Kulawane saibino komian moluwe doi lembet polong doi lalom.

⁵Maka saibino komian naikon toiyo baikon Yaku, TEMENENO, kibute Daku sabel tukon aki naikon naabali salunggene.’

⁶He banggapi moakiyo kotakoso, pokabalatan tukon pomangadumo doi Israel mianno salaano, nai naikon molotomo konuamu tukon akimo koharapan.

⁷Kalu yanila masadai bulaando ikoo momangadu, bantikenemo baikon ikoo susah bilita naikon molubat. Bilita doo naikon kubaiyo yanila noano mbombokon, yanila limano pakadak, tukon yanila tuulo mbombokon, yanila naikon akiyono kona samangat. Bisa kotempono laatemo, tukon sasaibino doo naikon teali Yaku TEMENENO Moinakatandak Tuuno lapamo basilingan.”

⁸TEMENENO bantil doiyaku,

⁹“He banggapi moakiyo kotakoso, pokitayomo! Popitoikenemo doi mian-mian baikon Yaku, TEMENENO bantil bunonia, ‘Daano komeeng kosabel, sabel moinasa tukon namamangan.

¹⁰Yana inakamangan sulano moola mangakate, kinolondoi sulano namontontilan-montontilan. Tuuk doi Kuumat akiyono koidan kotedesan, sabab saibino kopoingotii tukon yanila lalaikanggene koukuman.

¹¹Padang doo sidutu binilas sulano sadia pinake maka sinalakanggong doi meeng komian mokolotiyo.

¹²He banggapi moakiyo kotakoso, mandaungan tukon nggeleamon! Sabab sabel doo sadia molawane Daku umat. Saibino katua Israel polaing sasaibino kobangsa, naikon tinobokon sabel doo tobikon mate. Maka pakayo kooyopumu tukon susah,

¹³sabab Yaku daano moujiyo Dakuumat, kalu yanila aki nayase kindedeke kona kalakuan, saibino doo naikon teali doi yanila.’

¹⁴Eh, banggapi moakiyo kotakoso, ramalemo. Pakayo kolimamu, salaku palooasan tuuk sabel doo sulano tambun mokoloti. Sabel doo minakuton tuuno.

¹⁵Yana kabaiyo Daku bangsa kona baranian lapus tukon tuwong tongokolo. Yaku lobosio yanila nakota tukon sabel doo momontotilan buno didip, tukon mobasadian tuuk mangakate.

¹⁶He sabel mo mamangan patelemo doi bakalinga tukon doi bobo, tukon taikon doiyamo tulutiyo muminooton.

¹⁷Yaku naikon pakayo koidan kolimano, maka Daku nggimalan naikon tademo. Yaku, TEMENENO lapamo basilingan.”

¹⁸TEMENENO basilingan doi yaku, Nabantile,

¹⁹“He Banggapi moakiyo kotakoso, gambale lua kololoon momoola tomundo Babel loloiyo babayo kona sabel. Loloon molua doo sio tambun luwedoi tano pokakana; meeng kololoon natujuiyo doi Raba, kota Amon, komeeng koidan doi Yerusalem, kota modaano kona benteng doi Yehuda. Pasangemo kodopi motudoikene kololoon doi yaa loloon doo tambun panga.

²¹Tomundo Babel kokondong lolani dodopidoo potudoikon loloon doo. Sulano toiyo yando kololoon naikon kona iloloi, yana makabi otunggul luwedoi napilogot-pilogot, palesayo kopana tukon palesayo koiyayon ateno mosodo sinosubakon.

²²Tokita pana limano bakalingano moalayo daano Yerusalem palosano! Doya koalatino baikon tomundo sio lobosiyo kota Yerusalem, nggeleamonggene kokuweisan polobosian tukon sumboliyo kona suludadu nasusune kona alat-alat pamanas napaasano doi Yerusalem tataapon-tataapono mobabasal, mangatambun buta teali beton molobosian tukon makali got-got.

²³Modungoliyo ko Yerusalem aki naikon namangangga baikon yanila moilobosi sabab yanila lapamo mokubai perjanjian tukon Babel. Bai napokita nia naikon ingotiikene yanila baikon naikon linako sabab yanila nalalim-lalim.

²⁴Yaku, TEMENENO Moinakatandak Tuuno bantil doi yanila, ‘Mulalim-lalim totoimo tukon saibino komian toiyo baikon komuyu salamo. Mukulokisan tokita doi meeng-meeng komulenggang lalomo. Diabudodoo laatemo kotempono komuyu inukum tukon komuyu naikon Yaku salakanggene doi pomusuh.’

²⁵Tukon doi tomundo Israel Yaku bantile, ‘He tomundo molokis tukon aki nataat! Muinukuman lolanimo kotempono kona pupusan.

²⁶Yaku, TEMENENO Moinakatandak Tuuno lapamo basilingan. Liatemo musonggo tukon bukayomo komu tuala. Dia budoo, kona nondoon bolimo. Bingkatemo odudukemo mianmotallais tukon beena yanila kuasa! Tademo saibino komo balakuasa luwedoi nabalakuasaan!

²⁷Kota nia naikon Yaku manasemo tuuno, sulano doi yayaa daano kuililik kotuwo-tuwolo. Bai langge doo sodo nateali kalu mian kuililik tuuk moukume nakota nia lubato. Doi yana mo naikon kota nia Kusalakanggenemo.’ ”

²⁸ “He banggapi moakiyo kotakoso, pokitayomo! Popitoikenemo doi Amon mianno molapamo totulaiyo ko Israel, baikon Yaku, TEMENENO Moinakatandak Tuuno bantil, ‘Meeng kosabel sadiamo tuuk metembel; sabel doo binilaso montotilan buno didip, sulano sadia tuuk mangkate.

²⁹Batokitaan komuyu mokitayo daanon mokala, tukon pokita komuyu mobantilemo koidan kala tukon bakokolii. Komuyu lokis tukon aki potaat, tukon muinukuman kotempono lolanimo kona pupusan. Sabel doo naikon patele kobulumu.

³⁰He Amon mianno, salunggenemo musabel koidan! Komuyu naikon kuakimio doi komuyu natampat pinasitakan tukon nasinungan.

³¹Yaku naikon okitakenemo doi komuyu Daku nggimalan tutuuno. Tukon komuyu naikon Kusalakanggene doi mian-mian motalatimo kona baranian sulano naakabusemo.

³²Komuyu naikon kabus tosua doi aung. Kosaumu naikon tokundang doi mutano susumu, tukon akiyo daano komeeng komian kai modaano neneeke doikoo. Yaku TEMENENO lapamo basilingan.’ ”