Read Banggai YEHESKIEL 22 Bible Online

YEHESKIEL 22 - Banggai bible

YEHESKIEL 22

¹TEMENENO basilingan doiyaku, Nabantile,

²“He banggapi moakiyo kotakoso, ikoo lapamo basadia mohakimio kota doo moono tukon pangakate doo. Tudoikene doi yana saibino kona kakabai mominosikiton.”

³TEMENENO Moinakatandak Tuuno sumboliyo Yaku pelenggene teteba nia doi Yerusalem, “Ikoo salahmo sabab lapamo mangakate badaang luwedoi modungoliyo ko Yerusalem susungo, tukon lapamo kodikitiyo kobutomu tukon sosubah doi pilogot-pilogot mukinubai susuumu. Tobikon doiya lolanimo kotempono muinadilian tukon salitamu mosobito pupus. Ikoo kusoodiikene teali langge totulai tukon tuuk bangsa-bangsa tukon saibino kotano nakinokumbit.

⁵Ikoo kotano-tano momodoon tukon mololani totulaikon-totulaikon sabab ikoo pololokon langgare koukum tukon paraturan.

⁶Saibino kokatua Israel balaanggene kona bukuanan susungo tukon lakukene komangakatean.

⁷ Akion komeeng komian kai luwedoi modungolikon odotio konaorangtua. Ikoo kokoliyo komian lulubatan tukon mangala untung luwedoi balu tukon pau tuboon nakasusaan.

⁸ Tampat-tampat kaledaan tuuk Yaku ikoo kodikitio mo tukon oloyo Tadean akimo palatikanggene.

⁹Doi antara podungoli daano kopanggabut-panggabut moiyase salitayo komian bailon sulano nainukum mate. Daano koidan moyase makaan sail molapamo sosubakene doi pilogot. Daano koidan moiyase balolowa.

¹⁰ Daano komo babuduki tukon koloiyo kona silaabo, boine modaano bolokon,

¹¹mian bailon naboloki kabai namonianan kabai utuso pioto luwedoi tinano bailon.

¹² Daano koidan moteali pangakate bineal, momangala untung tukon molaing-laingoene kona bangsa. Yanila saibino toliminggenemo Yaku. Yaku, TEMENENO Moinakatandak Tuuno lapamo basilingan.

¹³Bai diabudodoo yaku naikon bobokiyo saibino kopalampok tukon moakatekon.

¹⁴Daanon mobarani kabai daanon ikoo bukuan tuuk bingkate kolimamu salataa Yaku lapamo ukume ikoo? Yaku, TEMENENO Moinakatandak Tuuno lapamo basilingan tukon Yaku naikon kubaiyo molapamo Kubantile.

¹⁵Yaku naikon poalasene modungoliyo doi saibino kotano tukon bangsa, tukon Yaku naikon belentio mukokubai molokis doo.

¹⁶Ikoo naikon bangsa-bangsa bailon tinotulai, maka ikoo toiyomo baikon Yakumo ko TEMENENO.”

¹⁷TEMENENO bantil doi yaku,

¹⁸“He banggapi moakiyo kotakoso, Israel mian-mianno doo akio kona totuk tuuk doi Yaku. Yanila buno logam peoputo moposonbuli, buno tambaga, tima besi tukon tima mopook labino sambuno lapa koperak sinopu doi babusaiyan lalomo.

¹⁹Maka diabudoo, Yaku, TEMENENO Moinakatandak Tuuno bantile doi yanila baikon yanila pokakana buno logam moakiyono kotakoso. Buno mokai batu perak, tambaga, besi, tima mopook tukon tima moute inusokon doi babunsaan sulano monondok tuuno, bunomo koidan yanila naikon Kupototongikene tukon Kubabayo doi Yerusalem. Daku nggimalan tuuno naikon moboliyo yanila buno aung moboliyo batu-batu logam.

²¹Ode, Yaku naikon pototongikene yanila doi Yerusalem, mookoitio aung Daku nggimalan doi yanila, tobikon yanila manas tuuno.

²²Buno perak mobinusang doi buusaang lalomo, bunomokai yanila koidan naikon binolii doi Yerusalem. Maka yanila toiyo baikon Yaku, TEMENENO, lapamo osodiiyomo Daku nggimalan doi yanila.”

²³TEMENENO basilingan koidan doi yaku, Nabantile,

²⁴“He banggapi moakiyo kotakoso, bantile doi Israel mianno baikon yanila nabuta madikit, tukon tobikon doiya Yaku nggimal tukon ukume.

²⁵Saibino kona katua buno singa mongangaton lapamo mosuku kona musuh. Yanila akateo korayat, rampase saibino kobuat tukon nakokayaan yanila posunggene tukon tealikene badaang koboine teali balu.

²⁶ Saibino koimam Israel langgalemo Daku ukum-ukum tukon kodikitio barang-barang moinalaasanggon tuuk Yaku. Yanila aki naposalakene yaando komo moola tukon yaando komo haram. Koidan yanila aki naotunggule korayat sulano naposasaleke yaando komobilisih tukon yaando komo madikit mololoi paraturan agama. Yanila aki napalaatikanggene oloyo Tadean. Tukon bunodoiya bangsa Israel totulaiyo Yaku.

²⁷Sambu-sambu pamarentah buno singa mosiak-siakke kona musuh. Yanila lakukene komangakatean tolongo tuuk mounggolii untung.

²⁸Saibino konabii seekene kolalim-lalim doo; yanila buno mian mobasu betong momadikit. Yanila napokita-pokita kala-kala, bunomo koidan yanila napotoy-potoy. Yanila mangakukene baikon teteba yanila mopelenggene daanon yanila motalimayo luwedoi TEMENENO Moinakatandak Tuuno banggokai aki tuuno Yaku basilingan doi yanila.

²⁹Mian-mian mokaasa bakala-kala tukon pondikuk. Yanila lakukanggene tutuuno komian motallais tukon mangala untung luwedoi molulubaton.

³⁰Doi antara Israel mianno doo, Yaku mounggolii mian molaate kekendenge kobetong, kabai kokondong doi tampat-tampat kona betong-betong manas tuuk palataanggene tanodoo kalukai Yaku yase momanase doi Kunggimalan tuuno lalomo; maukai akiyo komeeng komian Kupinosunggon.

³¹Tobikon doiya dia budodoo Yaku sodiiyomo Daku nggimalan doi yanila tukon buno aung yaku naikon moakateo yanila sabab yanila saibino nakakabai. Yaku TEMENENO Moinakatandak Tuuno lapamo basilingan.”