Read Banggai YEHESKIEL 23 Bible Online

YEHESKIEL 23 - Banggai bible

YEHESKIEL 23

²“He banggapi moakiyo kotakoso, daano kolua koboine langgongo pioto.

³Doi tempo natabokonan, yanila dungol doi Mesir. Indaa kona perawanan lapus, maka yanila teali balolowa.

⁴Kolanggongo kosambuno Ohola; yana Samaria lambango. Kopiyoto kosambuno Oholiba; yana Yerusalem lambango. Yaku osoan tukon yanila tukon malaat pau luwedoi lua-luwailah.

⁵Maukai Ohola tealimo kuboloki, yana tataap balolowa, tukon sanang tuuno moleleaniyo kona bibian-bibian moluwe doi Asyur.

⁶Yanila doo doiyamo suludadu mobapakean memela, saibino komo tulunan tomundo sambu-sambu motatandak; saibino perwira pasukan molokitio koadalan kapala-kapalano koduduso pomondoki.

⁷Tukon sambu pobosolii-pobosolii doiyamo Ohola balolowa. Kokoidan sabab konaselanan tuuno, yana kodikitio kobutongo tukon sosubaiyo yanila napilogot-pilogot.

⁸Yana banggadudulo balolowa bunomo nakinubai loluk doi Mesir; doiyamo yana lapus konapauboinekonan. Tambuno doi tempo napau-pauan, yana kinoloimo tukon moiloloai.

⁹Tobikon doiya kusalakanggene yana doi nabibian-bibian, Asyur mianno napinolonggon tuuno.

¹⁰Yanila lauwe yana tukon lokis, maka inakate tukon sabel, tukon konapau-pau dinampason. Doiyayaa kona kalakuan doo teali salita doi pauboine.

¹¹Oholiba utuso pioto kitayo kadadiannoo, bai yana konaminoton lobian tuuno lakukene dobalolowannoo luwedoi Ohola.

¹²Oholiba Yase tuuno Asyur doo mianno, doiyamo tabo-tabo pomondoki luwedoi pasukan molokiti adalan; batulunangene kotomundo tukon sambu potondoki, tukon suludadu mubapakean memela doo.

¹³Yaku kitayo baikon Ohaliba doo badingan tuuno, pokakana otuso langgongo.

¹⁴Pololokon malumbit pololokon badingan Oholiba. Yana tapangaru tuuno doi timbalan-timbalan mobinotik doi sanggal, tukon mobinee warna tukon Zet memelah buno saoh. Timalan-timabalan buno sauh. Timbalang-timbalang doo kapala-kapala bagian pamarentah Babel lambango tukon napoboot mo monondok tukon nasulubaan moulul-ulul.

¹⁵

¹⁶Salataa Oholiba kitayo dotimbalang-timbalang doo, konamomootan tosungi tukon yana menteteba doi kapala-kapala bagian pamarentah doo doi Babel.

¹⁷Maka yanila doo lubat tukon pokoloi yana. Yanila kodokitio yana bunodoiya kotambongo sulano doibundu yana teali toluwe tukon yanila.

¹⁸Lapa doiya tukon talang-talangan yana balolowa tukon okitakene kobutongo doi umum. Yaku toluwe kitayo yana, buno yaku toluwekene koutusonggu langgongo.

¹⁹Pololokon malumbit pololokon yana idan-idanno balolowa, akiyo konapossalaan buno doi tempo napamudaan salataa yana balolowa doi Mesir.

²⁰Yana balenggang tuuno doi mala-malane motuboi kona momotan bakean, tukon nabakean pangaruno pokakana koadalan malaneno kona nafsu nababasalan. (

²¹He Oholiba, ikoo yase kubaiyo koidan kobalolowan mo ikoo lakukene doi tempo mupauboinean, salataa Mesir mianno pobianggon tukon ikoo.)”

²²TEMENENO Moinakatandak Tuuno bantile, “He Oholiba, bai Yaku naikon kabiyo yanila sulano yanila nggimal doi komuyu tukon lobosio ikoo.

²³Yaku naikon potongikene tukon babayo doi koo saibino komubibian luwedoi Babel. Pekod, Soa, Koa, Asyur tukon Kaldea mianno. Yaku babayo doi koo tabo-tabo motambongan konapangkat tatandak, tulunan tomundo, pangkat mopenting tukon pasukan-pasukan adalan kapalano.

²⁴Yanila naikon lobosio ikoo luwedoi lembet tukon suludadu badaang, tukon kereta-kereta polobosian tukon kereta-kereta mobabayo kokinaan. Tukon lindungiyo tombide tukon songgo-songgo tambaga, yanila naikon lobosio ikoo. Naikon kusodiikene yanila hakimio ikoo yanila naukum-ukum.

²⁵Sabab Yaku nggimoliyo komuyu, kusodiikene yanila lakukene komuyu tukon nggimal. Songano tukon tolingaimu naikon yanila patele tukon mupau-pau naikon inala tukon sinua tubo-tubo.

²⁶Ikoo naikon tinallau tukon mupalahiasan-palahiasan naikon linampas.

²⁷Bunomo doiya yaku naikon atadeo komu pau nabaloloaan tukon saibino kopakeaan ikoo molakukene tambun daano dungol doi Mesir. Ikoo naikon akimo koidan moinikene doi pilogot yaando kai kabai neneeke doi Mesir.”

²⁸TEMENENO Moinakatandak Tuuno bantil, “Yaku naikon salakanggene ikoo doi miannoo motoluwekene ikoo momisikitonggon.

²⁹Sabab yanila misikitonggon, saibino komu pakadakan hasilo naikon yanila lampase. Ikoo naikon tininggalo tallau tuuno buno balolowa tukon teali mian badaang namokitaan. Namomotan pokeaan tukon mubaloloaan.

³⁰Molubatene kotuboan molokis nia doi komuyu. Ikoo teali balolowa tuuk doi bangsa-bangsa, tukon kodikitio kobutomu tukon yanila napilogot-pilogot.

³¹Ikoo moloingikon utusomu langgongo nandodoong, tobikon doiya ikoo naikon kuukume tukon ukuman pokakana.”

³²TEMENENO Moinakatandak Tuuno bantile, “Utusomu langgongo nasanggil antoko sio mulemese. Sanggil doo babasal tukon atean. Koantoko moono totulai-totulai tukon sosiboli, mosio ikoo tanggunge luwedoi samba komian.

³³Utusomu langgongo Samaria Nasasanggil, koantoko matakutan tukon namanasan Sambuno lapa ikoo inume saibino kopaisuno ikoo naikon malangu tukon susahmo. Tukon sasanggilo bisi-bisilo doo ikoo naikon sia-siake kooyopomu. Yaku TEMENENO Moinakatandak Tuuno lapamo basilingan.”

³⁴

³⁵TEMENENO Moinakatandak Tuuno bantile, “Sabab ikoo toliminggenemo Yaku tukon totonggulungemo Yaku, ikoo naikon susamo sabab muminoton bakean tukon mubaloloaan.”

³⁶TEMENENO bantil doi yaku, “He banggapi moakiyo kotakoso, ikoo lapamo sadia mohakimio Ohola tukon Oholiba? Anukene yanila komadikitan molapamo yanila kubaiyo.

³⁷Yanila lapamo lakukene kopokean tukon mangakatean; yanila lapamo bakeea tukon pilogot-pilogot tukon mangakate Daku pau-pau yanila mosuunge. Pau-pau doo yanila lapamo sosubakene doi yanila napilogot-pilogot.

³⁸Tukon bolikon tongo doiya, yanila koidan kodikitio Daku Bonua tukon oloyo Tadean molapamo Yaku tataapkanggene.

³⁹Doi oloyo yanila akateo Daku pau-pau tukon mososubakene doi pilogot-pilogot, luaila montolutus langgongo pioto doo lubat doi Ku Bonua tukon mokulokisene!

⁴⁰Yanila kilime ko undangan doi mala-malane doi tano-tano moddoon tukon yanila daanokene doponguang doo. Tuuk mololobotio tamu-tamu doo, luaila montolutus langgongo pioto doo masau, mapake cet mata tukon konoikene naperhiasan-perhiasan.

⁴¹Maka yanila osulang doi tampat mooloan bunggono momonondok. Doi salano daano komeja moono tukon kinan-kinaan tongusokon kamangian tukon zaitun likisono molapamo Yaku bekene doi yanila.

⁴²Luwedoi tonggulung tollongol mian badaang nalalo mobasanang-sanang. Mian-mian doo inuango lubat luwedoi padang bone. Yanila mongusokon kulaluk doi utuso langgongo pioto doo, pase kosonggo-songgo monondok doi oluno.

⁴³Maka Kupikikene, “Daanon mian-miano yase babibian tukon mobalolowa-balolowa momoloyomo sabab napakean?”

⁴⁴Paisobolii komian-mian molubotio Ohola tukon Oholiba, lua domo balolowa doo mobajingan.

⁴⁵Bai, mian-mian moliyous naikon adiliyo langgongo pioto doo kona pokok pakean tukon mangakatean, sabab yanila bisa mosalah.”

⁴⁶TEMENENO Moinakatandak Tuuno bantile, “Uangemo meeng kotomundo komian tuuk mosakiisayo tukon ndikuke doo boine lua doo mo balolowa doo.

⁴⁷Sodiiyomo yanila sinokuli tukon batu tukon linobosi tukon sabel. Sodiiyomo yanila napau-pau tinembeli tukon yanila nabonua-bonua sinua.

⁴⁸Posaapon kotano naikon kubantalaase kobajingan mobuno doiya. Tindakandoo naikon teali poingoti tuuk samba koboine sulano inai nabalolowa buno moto utus langgongo tukon pioto doo.

⁴⁹He Ohola tukon Oholiba, Yaku naikon ukume komuyu sabab komuyu balolowa tukon sosubaiyo pilogot. Maka komuyu toiyo baikon Yakumo TEMENENO Moinakatandak Tuuno.”