Read Banggai YEHESKIEL 25 Bible Online

YEHESKIEL 25 - Banggai bible

YEHESKIEL 25

¹ TEMENENO bantil doiyaku,

²“He banggapi moakiyo kotakoso, batopikenemo tano Amon.

³Sumboliyomo bangsa doo mondongolii oila Yaku, TEMENENO Moinakatandak Tuuno bantil doi yanila, ‘Komuyu sanaang kitayo Daku Bonua momanggilit tukon buta Israel minanas tukon bangsa Yahudi inakut doi nasinakukonan.

⁴Tobikon doiya komuyu doo Kusodikene kobense-benseno bangsa moluwe doi Talise Lalomo lungguiyo komuyu. Yanila naikon mokokondong sandung-sandung doi potano maka tataapo idoo. Yanila naikon makaan posaoh-saoh tukon monginum susu muiyayon piniala.

⁵Kota Laba naikon kuboliyo teali tampat madagaian unta, tukon posaapon kotano Amon teali tampat madagaian domba. Maka komuyu toiyo baikon Yakumo TEMENENO.’ ”

⁶TEMENENO Moinakatandak Tuuno bantile, “Komuyu pakayo kolimamuyu tukon tedes osuleng. Komuyu pandang enteng buta Israel.

⁷Tobikon doiya komuyu naikon kusalakanggene doi badaang kobangsa naikon momalampok tukon lampase saibino komuyu nalobo. Komuyu naikon Kukulokisene bunodiya tobikon akimo koidan teali meeng kobangsa tukon akimo koidan namototoli tano susungo. Maka komuyu toiyomo baikon Yakumo TEMENENO.”

⁸ TEMENENO Moinakatandak Tuuno bantile, “Moab bantile baikon Yehuda doo pokakana buno bangsa-bangsa bailon.

⁹Tobikon doiya kota-kota mopalatanggene kokalatan-kalatan tano Moab naikon Kusodiikene musuh lobosio tongusokon kota-kota momonondok tuuno doiyamo: Bet-Yosimot, Baal-Meon tukon Kiryataim.

¹⁰Yaku naikon sodiikene kobenseno-benseno bangsa moluwe doi Talise Lalomo kalayo ko Moab talain tano Amon, tobikon Moab akikai nabuno meeng kobangsa.

¹¹Yaku naikon ukume ko Moab, maka yanila toiyo baikon Yakumo ko TEMENENO.”

¹² TEMENENO Moinakatandak Tuuno bantile, “Bangsa Edom mokubaimo kasalahan babasal sabab lakukene kobaranian telhadap Yehuda, salaku kukubai balase ko ata naminusuan.

¹³Tobikon Yaku umumkanggene baikon Yaku naikon ukume ko Edom tukon mangakate meeng kobanggapi tukon meeng koiyayon inda. Posaapon tano doo, luwedoi kota Teman. Polong doi kota Dedan, kutealikene kiis tuuno; konarayat naikon mate doi polobosian lalomo.

¹⁴Daku bangsa Israel naikon Kupakeo tuuk mobalase kona masakitan konoano doi Edom, tukon Edom naikon ilakukanggon pokonoi tukon Kunggimalan tuuno. Edom naikon toiyo bulaando kotamiso teali Daku nggimalan natuukan. Yaku TEMENENO Moinakatandak Tuuno lapamo basilingan.”

¹⁵ TEMENENO Moinakatandak Tuuno bantil, “Filistin mianno balasemo konamasakitan konoano tukon nggimal tuuno doi musuh monggabute yanila tukon momanase yanila tukon misikitene tuuno.

¹⁶Tobikon doiya yaku pelenggene baikon yaku naikon lobosio Filistin mianno manase yanila. Memeeng komian modaano kolabino doi lipu Filistin pasisilo naikon kuakateo.

¹⁷Yaku naikon ukume yanila babalat tuuno tukon kaluare konamasakitan konoanggu sampe kabus. Kalu yanila neneeke Daku nggimalan, yanila toiyo baikon Yakumo ko TEMENENO.”