Read Banggai YEHESKIEL 26 Bible Online

YEHESKIEL 26 - Banggai bible

YEHESKIEL 26

¹ Doi tanggal komeengo bituwon motantu taun kosongulono meeng luwedoi tempo kami nasinakukonan. TEMENENO basilingan doiyaku, Nabantile,

²“He banggapi moakiyo kotakoso, modungoliyo ko Tirus lapamo tedes-tedes tukon bantile, ‘Yerusalem manaso! Nabukuanan badagangan lalomo lapuso! Yana akimo teali ndasaingan koidan!’ ”

³TEMENENO Moinakatandak Tuuno bantil, “Yakumo nia mumusuh; he Tirus! Yaku naikon mababa badaang kobangsa tuuk molobosi ikoo, tukon yanila naikon lubat buno tobin bokolo.

⁴Yanila naikon manase komu beton-beton tukon molubange komu menara-menara, saibino kobuta modaano indaa naikon Kusapuwe naikon baino komo totinggal tolongo meeng kobatu doi tobin doo tangano.

⁵Saibino komosabang naikon yanila leange konabuani doi batu bunggono doo. Yaku TEMENENO Moinakatandak Tuuno lapamo basilingan. Tirus naikon teali musuh tuuk badaang kobangsa.

⁶Yanila naikon malampok tukon akateo komodungoliyo kokota-kota doi buta Tirus. Maka modungoliyo ko Tirus toiyomo baikon Yakumo ko TEMENENO.”

⁷TEMENENO Moinakatandak Tuuno bantil, “Yaku naikon babayo Tomundo Nebukadnezar luwedoi Babel tuuk molobosiyo ikoo he Tirus. Tomundo mobukuan tuuno doo naikon lubat luwedoi lembet tukon suludadu badaang, tukon adalan badaang tukon kereta-kereta polobosian tukon suludadu molakit adalan.

⁸Saibino modungoliyo posaapon kota doi buta tina naikon inakate doi polobosian lalomo doo. Musuh naikon makali got-got palatahanan, sokoiyo kobenteng-benteng polobosian tukon susunemo kotombide-tombide babasal yanila mopakeo buno benteng molawane ikoo.

⁹Yanila naikon tubuluke mubenteng-benteng tukon alat-alat motubuluke tukon lubange kumu menara-menara tukon besi bata-batango.

¹⁰Yanila naadalan-adalan badaang tuuno, tobikonkai kona tutupanggona kubaiyo koambata benga-benga mosonggupio ikoo. Lalo bulungan suludadu mololo adalan momatandang kereta moalakite kokinaan tukon kereta polobosi naikon komubetong-betong lolondong doi tempo yanila lisiyo kotataapon tataapon babasal tukon usokiyo kota motealimo bakas-bakas.

¹¹Suludadu molokiti adalan doo naikon molobosimo doi muloloon-loloon tukon akateo modungolikon tukon yanila nasabel. Mubetong-betong monondok tukon monggol naikon tolubang.

¹²Komu musuh-musuh doo naikon lampase saibino komu kasaan tukon mubinadaganggon. Yanila naikon manase komu betong-betong tukon molubange mubonua-bonua monondok. Yanila naikon mangala kona batu-batu, doping-doping tukon butano, maka lambitenedoi tobun lalomo.

¹³ Yaku naikon atadeo saibino mumananian tukon musik kasapi.

¹⁴Daku tininggal baino meeng kobatu moakiyo komotubo, saibino komo sabang natampat yanila napitalano konabuani. Kota doo akimo naikon nakinokondong koidan. Yaku TEMENENO Moinakatandak Tuuno basilingano.”

¹⁵TEMENENO Moinakatandak Tuuno bantil doi kota Tirus, “Modungoliyo kolipu doi pante naikon bombokon matakut kalu molongol wokonan mupalatanan tukon keisonan mian-mian modaanon tinembel.

¹⁶ Kitayo mutuboan, tomundo-tomundo luwe doi bangsa-bangsa doi tobun bibilo naikon kokondong luwe doi nakulusi, yanila liate juba mobinabasakon tukon kalambi mobinotik, maka osulang mbobokon kobuta. Yanila naikon matakut tuuno tobikon aki namo ola tanaang.

¹⁷Lapadoiya yanila naikon manyanyikene lagu bakibulan nia tuuk ikoo: Manaso kota mosinosubai! Saibino kooluno sinapu luwedoi ndalangon. Komodungoliyo tumbeno balakuasa doi tobun kubaiyo mian-mian doi tobun bibilo matakut.

¹⁸Diabudodoo, doi oloyo ikoo mokinalamo, modungoliyo kotogong-togong mbombokon. Yanila saibino sosinggot kitayo mumanasan mo todudulo.”

¹⁹TEMENENO Moinakatandak Tuuno bantil, “Kutealikene ikoo kiis tuuno buno kota moakiyo komo dungoliyo. Yaku naikon tutupiyo ikoo tukon paisu moluwe doi ndalangon naluwean.

²⁰Maka ikoo Yaku kapatuwo doi mian mate nalipu tuuk pototongi tukon mian-mian moluwe doi tempo looluk. Kusodiikene ikoo tataap doi mian mate doo nalipu doi bakas-bakas tanga-tangano posidutukon, polaing-laing tukon mian mate. Maka mubuta akimo naikon nadinungoli koidan, tukon ikoo akimo natangait doi antara mian tubo.

²¹ Ikoo Kutealikene sontoh mominatakuton, tukon doiyamo kosalitano napupusan. Mian-mian naikon unggoliyo ikoo, bai aki naikon ikoo pinosunggon. Yaku TEMENENO Moinakatandak Tuuno basilingano.”