Read Banggai YEHESKIEL 28 Bible Online

YEHESKIEL 28 - Banggai bible

YEHESKIEL 28

¹TEMENENO bantil doiyaku,

²“He banggapi moakiyo kotakoso, pelenggene doi tomundo Tirus, oila komo Yaku TEMENENO Moinakatandak Tuuno bantile doi yana, ‘Tukon ikoo tedes anggene kobutomu ila moosulang doi kulusi doi tobun tanga-tangano. Moolakai ikoo tetedes buno ila bai neneeke, ikoo tolongo banggapi biasa.

³Muanggene ikoo pandoimo luwedoi Daniel, tobikon akio kolaasia motosookon tuuk ikoo.

⁴Ikoo mapake pandoian tukon mumontoian sulano mangatambung buat, mosoni tukon salaka.

⁵Ode, ikoo pandoi badagang tukon diabudodoo kaasamo tuuno, tukon mukasaan doo kubaiyo ikoo babanggal!’ ”

⁶TEMENENO Moinakatandak Tuuno bantil, “He Tirus, sabab ikoo anggene kobutomu pokakana buno Mian Bisa, Yaku naikon mokirim suludadu molulubaton monggimolon tuuno sulano lobosio ikoo. Yanila naikon manasemo saibino komu monondokan molapamo ikoo laate kobalakat, pandoian tukon mumontoian.

⁸Ikoo naikon inakate tukon kinibul doi tobun lalomo.

⁹Nah, kalu latemo kotempono doo daanon moolakai ikoo bantile baikon ikoo Mian Bisa? Doi moakatekon-akatekon salaano, tokitamo baikon ikoo tolongo banggapi biasa.

¹⁰Ikoo naikon mate buno mian motinotulai sabab mian molulubaton moaki natingonio Komian Bisa moakateo. Yaku TEMENENO Moinakatandak Tuuno lapamo basilingan.”

¹¹TEMENENO bantil koidan doiyaku, Nabantile,

¹²“He banggapi moakiyo kotakoso, momandaunggene tuuk Tomundo Tirus. Pelenggene oila mo Yaku, TEMENENO Moinakatandak Tuuno bantilemo doi yana, ‘Ikoo daanomo mutealian lambang namonondokan; looluk ikoo tutuu pandoi tukon tambongan!

¹³Mutampat dungolan doi Eden Mian Bisa naasi. Mupakean kopobungaino rupa-rupa kopermata: batu delima tukon intan, topas, batu pilus, batu jakut, ratna, cempaka, batu nilam, zamrud, tukon batu alkali memela. Mupobubungai mosonikai badaang. Barang-barang doo kinubai tuuk ikoo doi oloyo ikoo napinasikatakaan.

¹⁴Malaekat mominatakuton Yaku abese idoo sulano nadagaiyo ikoo. Ikoo dungol doi Kubunggul bunggono mo moliyous tukon ampakono doi batu permata tanga-tangano mo montotilan doo.

¹⁵Mukakabai monondok tambun doi mupinasitakaan polong doi koo tambun mokubai lokis.

¹⁶Ikoo sibuk mongoli mabalukon, tukon doiyamo mobabayo ikoo doi motikasan tukon lalim. Maka Kusiikayo ikoo luwedoi Kubunggul moliyous, tukon malaekat mupadagai siikayo ikoo luwedoi mupermata momontontilan doo tanga-tangano.

¹⁷Mundodoong tambungan kubaiyo ikoo babanggal tukon motollongolan tealikene ikoo kubaiyo kobodoan. Tobikon doiya Kutikakene ikoo doi buta tukon Kutealikene poingotii tuuk tomundo-tomundo bailon.’ ”

¹⁸TEMENENO bantil, “He Tirus, ikoo kodikitio mutampat-tampat bakaledaan sabab kokasalahan-kasalahan tukon bangokolian tempo bangoli babalukon. Tobikon doiya kusuayo ikoo sulano nateali polatapon tukon buta. Sasaibino komian mombalenge ikoo tolongo kitayo koambata.

¹⁹Ikoo lapusokai tuuno posidutukon. Saibino kobangsa motingonio ikoo teali mombokon sabab matakutene naikon moalamio konatuboan bunodoiya.”

²⁰ TEMENENO bantil doiyaku,

²¹“He banggapi moakiyo kotakoso, batotopikene kokota Sidon.

²²Pelenggene doi modungoliyo baikon Yaku TEMENENO Moinakatandak Tuuno bantil doi yanila, ‘Yaku nia mumusuh, he Sidon. Mian-mian naikon nggale Yaku sabab Dakukakabai doi ikoo. Tempodoo Yaku ukume komupodungolian, yanila naikon toiyo baikon Yakumo ko TEMENENO mo moliyous.

²³Yaku naikon lubatene kopanakit podonggiti, tukon sodiikene kosauh molomba doi muloloon-loloon. Ikoo naikon musuh lobosikon luwedoi sa saibino kojulusan, tukon mupodungoli naikon inakate. Maka ikoo toiyomo baikon Yakumo ko TEMENENO.’ ”

²⁴TEMENENO bantile, “Tano-tano napokolanian mobiasamo totulaiyo ko Israel, akimo koidan nabuno sonit mokolosio ko Israel. Yanila naikon tingoniomo baikon Yakumo TEMENENO Moinakatandak Tuuno.”

²⁵TEMENENO Moinakatandak Tuuno bantil, “Yaku naikon pototongikene ko Israel miano luwedoi tano-tano modoon doi yanila tampat lapamo Kupoalasene, tukon saibino kobangsa naikon toiyo baikon Yaku moliyous. Bangsa Israel naikon dungol koidan doi yanila tano susungo, tano molapamo Kubeekene doi Kupeleani Yakub.

²⁶Yanila naikon tubo tukon aman idoo tukon bangune kobonua-bonua tukon mokubai anggur asi-asino. Yaku naikon ukume saibino yanila napokolanian sulano Israel teali aman. Maka doiyamo yanila baikon Yakumo yanila Na TEMENENO Mian Bisa.”