Read Banggai YEHESKIEL 29 Bible Online

YEHESKIEL 29 - Banggai bible

YEHESKIEL 29

¹ Doi tanggal songulolua bituwon kosongulono, doi taun kosongulo lalomo kami nasinakukonan tempono, TEMENENO bantil doi yaku,

²“He banggapi moakiyo kotakoso, nggimoliyo tomundo Mesir. Bantilemo doi yana baikon yana tukon saibino korayat Mesir naikon inukum.”

³TEMENENO Moinakatandak Tuuno sumboliyo yaku pelenggene teteba nia doi tomundo Mesir, “Yakunia mumusuh, he buwea babasal mogonggolonggon doi paisu batango tangano. Ikoo babanggaalkene baikon Nil Paisunobatango daanon koomu tukon baikon ikoomo mo kubaiyo.

⁴Yaku naikon pasange asambitano doi ademu tukon alambete koikan-ikan doi anano. Ikoo kukibute sumbut luwedoi Nil Paisunobatango tukon sasaibino koikan molambot doi anano doo.

⁵Lapadoiya ikoo tukon sasaibino koikan doo Kulambitene doi padang bone. Butomu naikon tapason doibuta tukon tokoolo idoo. Akio komeeng komian kai naikon kibule ikoo. Butomu naikon Kubeekene doi tomisi-tomisi tukon iyayon-iyayon bailon sulano nakinaan.

⁶ Maka toiyomokai saibino korayat doi Mesir baikon Yakumo ko TEMENENO.” TEMENENO bantil, “He bangsa Mesir! Israel mianno moinikene mutombonio, bai tokita ikoo tolongo buno tokong momiuk tolong.

⁷Salataa yanila sosinggalang doi koo, ikoo moloto tukon taduke yanila keleko tobikon yanila bulungo topios.

⁸Tobikon doiya Yaku, TEMENENO Moinakatandak Tuuno bantile doi ikoo, baikon Yaku naikon mokilim suludadu naikon molobosiyo ikoo tukon sabel tukon modungoliyo tukon muiyayon piniala.

⁹Mesir naikon teali buta mokiis. Maka komuyu toiyo baikon Yakumo TEMENENO.” TEMENENO bantil, “He tomundo Mesir! Sabab ikoo bantile baikon Nil Paisunobatango daanon koomu tukon baikon ikoomo mokubaiyo,

¹⁰maka Yaku teali mumusuh tukon Nil mu Paisunobatango namusuh. Posaapon ko Mesir naikon kutealikene buta mokiis tambun luwedoi kota Migdol tukon doi lembet polong doi kota Aswan taikon doi lalom, polong doi pokalatanan Sudan.

¹¹Akiyo kobanggapi kabai iyayon naikon mololoiyo. Sanggapolono kotaun akiyo naikon komian modungoliyo.

¹²Yaku naikon kubaiyo ko Mesir kiis tuuno tobikon doi antara tano-tano bailon mokiis, Mesir doo mokiis tuuno. Sanggap kolono kotaun kona kalumbit kota-kota doi Mesir naikon baino buno bakas-bakas modoon kona lobianan saibino luwedoi bakas-bakas kota doi yando koidan. Bangsa Mesir naikon Kutealikene mobiol-biol. Yanila naikon sasabukono doi sasaibino kotano doo tukon dungol doi bangsa bailon tanga-tangano.”

¹³TEMENENO Moinakatandak Tuuno bantile, “He bangsa Mesir, lapa sanggap polono kotaun doo, komuyu naikon kuabalinggene luwedoi tano-tano komuyu natampat tasabukonan.

¹⁴Komuyu naikon Kuabalinggene tukon Kusumboliyo dungol doi Mesir tukon doi lalong, mubuta luwean. Indaa komuyu naikon bentuke kobatomundoan moaki nakuat,

¹⁵moaki nabukuan tuuno doi posaapon kodunia. Yaku naikon kubaiyo komuyu aki nabukuan tuuno tobikon komuyu aki naikon namoola mamarentah bangsa-bangsa bailon kabai babanggakene kobutongo terhadap yanila.

¹⁶Israel akimo kai naikon namangakabi potombonii doikoo. Mutuboan he bangsa Mesir naikon ingotiikene ko Israel todulo komubinguan mobakanggikene ko Mesir, buno molapamo lakukanggene. Maka Israel toiyomo baikon Yakumo TEMENENO Moinakatandak Tuuno.”

¹⁷Doi tanggal komeengo doi bitiwon komeengo doi taun kolua kolono pitu lalomo tempo kai nasinakukonan, TEMENENO bantil doi yaku,

¹⁸“He banggapi moakiyo kotakoso, Tomundo Nebukadnezar luwedoi Babel lobosio banggadudul telhadap Tirus. Yana sumboliyo kona suludadu-suludadu natanggung barang-barang mobabalat tuuno, tobikon yanila oluno teali mandaluk tukon yanila bengeno tokupas, bai monondok tomundo mau nasuludadu aki namalaat hasil ailano tukon nabukuanan balibangan doo.

¹⁹Tobikon doiya, Yaku TEMENENO Moinakatandak Tuuno bantil: Mesir butano naikon Kubeekene doi Tomundo Nebukadnezar. Yana naikon pondikuk tukon lampase maka akute saibino Mesir nakaasan salaku tambo tuuk doi nasuludadu.

²⁰Mesir butano Kubeeke doiyana salaku posoboli najasa, sabab nasuludadu lapamo balimang tuuk doi Yaku. Yaku, TEMENENO Moinakatandak Tuuno lapamo basilingan.

²¹Kalukai langge doo tealimo, Yaku naikon tealikene bangsa Israel bangsa mobukuanan, tukon motolake ikoo Yeheskiel, basilingan tukon moloas tobikon saibino komian moola ndongolio ikoo. Maka yanila toiyo baikon Yakumo TEMENENO.”