Read Banggai YEHESKIEL 3 Bible Online

YEHESKIEL 3 - Banggai bible

YEHESKIEL 3

¹ Mian Bisa bantil, “He banggapi moakiyo kotakoso, kaane nakitabpia gulungan maka tauso tukon basalitakene doi Israel mianno doo.”

²Maka yaku bukayo kobabangu tukon Mian Bisa bekeene kitab moginulung doi yaku sulano kukaane.

³Yana bantile, “He banggapi moakiyo kotakoso, kaane! Totuiyo kotiamu tukon kitab nia gulungo.” Maka kukaane kitab doo tukon kotamise maamis buno dokot.

⁴Mian Bisa bantil koidan, “He banggapi moakiyo kotakoso potauso doi Israel miano tukon pelenggene saibino Daku teteba doi yanila.

⁵Doi yanilamo Daku bitokonano ikoo, tukon bolikon doi bangsa mosulit konabahasa, molulubaton tukon aki mumangalatikene. Kalukai Kubitekene ikoo doi bangsa mobuno doiya, maka yanila naikon ndongoliyo komu bantilan-bantilan.

⁷Bai bangsa Israel aki nayase mondongolii ikoo, baimokai Yaku yanila akimo napusinggene. Yanila saibino motikas konoano tukon yase malawan.

⁸Diabudodoo naikon Kukabaiyo ikoo motikas konoamu tukon kokobukuan buno yanila koidan.

⁹Ikoo naikon Kutealikene monggol batu nggalanggang tukon buno intan konamotikasan. Inaikai momatakut doi saibino komo banggabut doo.”

¹⁰Mian Bisa banggadudul bantil, “He banggapi moakiyo kotakoso, palaatikanggene monon-monondok tukon neneke naikon sasaibino Dakubantilan doi komuyu.

¹¹Potauso doi mubangsa modaano doi nasinakukonan doo, tukon pelenggene oila komo Yaku, TEMENENO Moinakatandak Tuuno bontiikene doi yanila, kai yanila yase mondongolii kai aki.”

¹²Maka Mian Bisa Na Roh bingkate yaku tukon doi tonggugu yaku lengele kolalo motimbukan mobantil, “Nggale ko TEMENENO Namonondokan doi surgaa!”

¹³Yaku lengele malaekat-malaekat doo mo susuele posinggil, tukon loda-loda doo nabulunganan mopokakana koleali nabulunganan.

¹⁴TEMENENO Nakakuasaan lubotiiyo hebat tuuno, tukon salataa yaku biningkat tukon Na Roh babayo, kuomiyo konoanggu mosopot tukon moonas.

¹⁵Maka yaku polongo doi tampat saibino mosinakukon nadungolan doi Tel-Abib Kebar Paisunobatango bibilo. Pitu kooloyo kona kalumbit yaku dungol idoo; Yaku tobolis-tobolisene saibino mosoodo sodo kulengele tukon kukitayo doo.

¹⁶Lapa pitu kooloyo, TEMENENO bantil doi yaku,

¹⁷“He banggapi moakiyo kotakoso, ikoo Yaku bingkate teali potooli bangsa Israel. Pelenggene kai doi yanila poingotii nia Yaku mo beekene doi yanila.

¹⁸Kalu Yaku popitoikene baikon meeng komian lokis naikon mate, bai ikoo aki muingotikene yana sulano yana boliyo kona kakabai polong yana salamat, maka yana naikon mate daanon mobuno meeng komian baladosa, tukon tanggung jawape kona matean naikon tinuntut luwedoi komuyu.

¹⁹Kalu ikoo ingotikene mian lokis doo tukon yana aki naiyase tade makabai lokis, yana naikon mate buno mian mobaladosa, bai ikoo susuumu naikon salamat.

²⁰Kalu meeng komian momonondok tambuno makabai lalim, tukon yana kuposalanggene kosilakaan, maka yana naikon mate kalu kai ikoo aki muingotikene. Yana naikon mate sabab nalalim-lalim, tukon nakakabai-kakabai momonondok akimo naikon Kuneneeke. Bai ulusano doi namatean doo naikon Kutuntute doi komuyu.

²¹Kalu mian monondok doo ikoo ingotikene sulano inai makabai lalim, tukon yana tuntute komu otinau maka yana naikon aki Kuukume tukon ikoo naikon salamat.”

²²Kuomiyo nabukuanan TEMENENO nadanoan tukon kulengele Yana bantile doi yaku, “Banguno tukon tauso doi pepelakon. Imbali Yaku naikon basilingan doi komuyu.”

²³Maka yaku tauso doi pepelakon tukon idoo kukitayo komadialang montotilan motudoikene TEMENENO nadaanoan buno molapamo kukitayo doi Kebar Paisunobatango bibilo. Maka yaku otuwong tanggalaup doi buta bunggono,

²⁴bai Mian Bisa Na Roh usokiyo tukon ekenggele yaku. TEMENENO bantil doi yaku, “Mulemo tukon bakulungo doi mubonua lalomo.

²⁵He banggapi moakiyo kotakoso, ikoo naikon kinoot tukon alos tobikon aki namoola sumbut tukon aki laate pososuung tukon mian.

²⁶Yaku kabaiyo naikon alepomu aki nabantil tobikon ikoo akimo laate ingotikene bangsa mobanggabut nia.

²⁷Totiili, kalu Yaku basilingan doi komuyu koidan tukon abalinggene komu moolaan tuuk bantilan-bantilan, ikoo sio mupelenggene oila mo Yaku, TEMENENO Moinakatandak Tuuno bantikene doi yanila. Sembeleng luwedoi yanila naikon ndongoliyo, bai sembeleng koidan aki, sabab yanila bisamo bangsa mobanggabut.”