Read Banggai YEHESKIEL 30 Bible Online

YEHESKIEL 30 - Banggai bible

YEHESKIEL 30

¹TEMENENO basilingan koidan, bantile,

²“He banggapi moakiyo kotakoso, lamekene tukon pelenggene doi bangsa Mesir oila komo Yaku TEMENENO Moinakatandak Tuuno bantile doi yanila. Pobantilemo tukon mandaungan buno naiya: Adu! TEMENENO Naoloyo lolanimo! Yana mosobit naikon montidoki. Oloyo kalipookan tukon daano kobunom, tempo bangsa-bangsa matalima ukuman.

⁴Babasal kosilakaan naikon molupayo ko Sudan. Doi Mesir naikon daano kopolobosian. Kurban-kurban naikon pakatatuwong; posaa pon kotano irampok tukon teali mominanas.

⁵Polobosian doo lalomo naikon tangakate koidan suludadu motinambo luwedoi Sudan, Libia, Libia, Arab, Kub tukon kai moluwe doi bangsa susungu.”

⁶TEMENENO Moinakatandak Tuuno bantil, “Luwedoi Migdol taikon doi lembet polong doi Aswan taikon doi lalong, saibino komo pomeengon Mesir naikon kalah doi polobosian lalomo. Tukon kosuludadu Mesir mobabanggaal doo naikon sasabul manas. Yaku TEMENENO Moinakatandak Tuuno lapamo basilingan.

⁷Tano doo naikon teali tano mokiis tuuno doi antara tano-tano mokiis bailon, tukon nakota-kota naikon teali bakas-bakas.

⁸Kalukai Yaku suayo ko Mesir tukon akateo saibino kopomeengonan, yanila toiyomo baikon Yakumo ko TEMENENO.

⁹Kalukai oloyo doo lubat, tukon Mesir doo manaso, Yaku naikon kilime kobitokon-bobitokon tukon kapal-kapal sulano ko Sudan mian-mianno naheran tukon maoki nalaate doo, maka yanila naikon matakut. Tutuu oloyo doo naikon lubat!”

¹⁰TEMENENO Moinakatandak Tuuno bantile, “Yaku naikon pakeyo Tomundo Nebukadnezar luwedoi Babel sulano namanase sasaibino ko Mesir nakasaan.

¹¹Nebukadnezar polaing kona suludadu moaki natingonio kopongampuni naikon molubat tukon momanase buta doo. Yanila naikon lobosioyo ko Mesir tukon sabel, tukon kobajan-bajan naikon sasabul doi tano doo.

¹²Yaku naikon kotuule Nil Paisunobatango tukon salakanggene posaapon ko Mesir doi mian-mian molokis. Mian-mian lulubaton naikon Kusumbolio momanase posaapon tano doo. Yaku TEMENENO, lapamo basilingan.”

¹³TEMENENO Moinakatandak Tuuno bantile, “Yaku naikon manase kopilogot-pilogot tukon dewa-dewa doi Memfis. Akimo naikon daano koidan tomundo doi Mesir. Sasaibino kopodungolino naikon Kukabaiyo matakut.

¹⁴Posaapon Mesir taikon lalong naikon Kutealikene kiis tuuno tukon kota Soan taikon doi lembet naikon Kusuayo. Tebe kota basaldoo naikon Kuukume,

¹⁵tukon nakaasan naikon Kuakabuse. Yaku naikon sodiyomokai Daku nggimalan doi Pelusium, kota motabali benteng Mesir,

¹⁶tukon kota doo naikon mandarita tuuno. Tutuu, Yaku naikon suayo ko Mesir. Betong-betong kota Tebe naikon tuwong tukon kota doo naikon linupa eaba.

¹⁷Tabo-tabo kota Heliopolis tukon Babaslis naikon mate doi polobosian lalomo, tukon boi-boine naikon kinanggi.

¹⁸Doi tempodoo Yaku opusio kobangsa batomundoan Mesir tukon mangala nakuasa mobunodoiya kona binabanggakonan, Tahpanhes naikon tinutupi kalipookan tukon naboi-boine naikon kinanggi.

¹⁹Bunomodoiya Yaku naikon ukume ko Mesir maka yanila toiyo baikon Yakumo ko TEMENENO.”

²⁰Doi tanggal kopituno bituwon komeengo taun songulono meeng lalomo tempo kami nasinakukonan, TEMENENO bantil doiyaku,

²¹“He banggapi moakiyo kotakoso, Yaku lotoyomo tomundo Mesir limano, tukon akiyo komo bungusiyo kolimano doo kabai moaduwo sulano natangalin tukon teali bukuan tuuk mataani sabel koidan.

²²Yaku TEMENENO Moinakatandak Tuuno bantil: Yaku nia musuh tomundo Mesir, tukon kolimano koluano naikon kulotoyo, mau mudaanon bukuan maukai molapamo moloto. Maka sabel doo naikon otuwong luwedoi limano.

²³Yaku naikon poalasene Mesir mianno doi posaapon kodunia.

²⁴Maka tomundo Babel limano naikon Yaku kenggele, tukon Kuabase Daku sabel doi limano lalomo. Bai tomundo Mesir limano naikon Yaku lotoyo sulano yana nggimal tukon mate doi namusuh tomundo Babel saalaano.

²⁵Tutuu, tomundo Mesir naikon aki Kuteakikene bukuan, bai tomundo Babel naikon Yaku tealikene bukuan. Kalukai Yaku beene Daku sabel doi yana, tukon yana aakene taikon doi Mesir, yanila naikon toiyo baikon Yakumo ko TEMENENO.”

²⁶Ko Mesir miano Yaku naikon pobandakene posaapon kodunia. Maka yanila toiyo baikon Yakumo ko TEMENENO.