Read Banggai YEHESKIEL 31 Bible Online

YEHESKIEL 31 - Banggai bible

YEHESKIEL 31

¹Doi tanggal komeengo bituwon kotoluno lalomo taun kosongulono meeng tempo kami nasinakukonan, TEMENENO bantil doi yaku,

²“He Banggapi moakiyo kotakoso, pelenggene Daku teteba nia doi tomundo Mesir tukon sasaibino kona bangsa: Tutuu hebat mubinabasalkon! Akiyo komoola teali lisikon!

³Ikoo buno cemara Libanon momanggangan badaang kolangano momolumbang tukon monondok. Kobatango moloyos tukon bulusan kotubono laate kobunom.

⁴Yana tubo sabab sukup kona paisu. Paisubatango doi buta lalomo beena kinaan, mbetokiyo saibino koanggolo, tukon mbetokiyo kobatang-batango bailon.

⁵Sabab paisuno aki nambeng, natubuan molubang, langano, babasal tukon moloas. Luwedoi sasaibino kokayung doi mosolot-mosolot yanamoo komo tatandak tuuno.

⁶Lupa-lupa kotomisi mokubai telea doi panga-pangano. Iyayon mbosolo mosuung doi nasoopan lalomo. Sasaibino kobangsa mobabasal doi posaapon kodunia, osulang soop taikon doi bilit.

⁷Batango doo monondok tuuk nakinite; kobatango moloyos, langano moloas. Koanggolo sumbot modoon domba bilit laate kopaisu naluwean doi buta lalomo.

⁸ Cemara batang-batango doi Eden, Mian Bisa Naasi, aki namoola pinokanakon tukon yana. Akiyo kocemara moola lisiyo, akiyo kobatango mobuno doiya kolangano namoloasan. Bisa doi Mian Bisa naasi akiyo kokayung batango mobuno yana namondokan.

⁹Yakumo mokubaiyo yana nggangan tukon langa-langano momoloas tukon masalimbung. Saibino kobatango doi Mian Bisa Naasi omiiyo kososumoi doi yana.

¹⁰Tobikon doiya, Yaku TEMENENO Moinakatandak Tuuno, popitoikene doi ikoo oila naikon moteali doi kayung kopusuko polong doi bunom doo. Sabab pololokon tatandak, pololokon babanggal yana.

¹¹Maka Yaku tolayo yana tukon naikon salakanggene doi balakuasa molulubaton, naikon molakukene yana pokakana tukon nakulokisan.

¹²Suludadu molulubaton moaki tingonio ko ampun naikon tapeo yana maka sodiikenemo. Kolaangano molotomo naikon pakatuwon doi sasaibino kobunggukon tukon pepelakon doi tano doo. Saibino kobangsa modungol doi bilit naikon taus tingalemo yana.

¹³Tomisi-tomisi naikon lubat tukon totol doi kayung molapamo tolubang doo, tukon iyayon-iyayon mbosolo naikon motudo-tudongiyo kolanggo-langgono.

¹⁴Sasaibino doo teali sulano tambun tempo nia, aki naikon daano koidan kokayung motubo motatandak doo; akiyono koidan kopusuko kayung molaate kobunom maukai nalaate kopaisu lobi-lobian. Saibino sio namate buno banggapi moakiyo kotakoso, tukon pototongi tukon mian-mian molapamo obulus doi mian mate nadunia.”

¹⁵Buno noiakai bantilan TEMENENO Moinakatandak Tuuno, “Kalu kai kayung doo obulus doi mian mate nadunia, Yaku mosumbolii paisu doi buta lalomo nalelang salaku paloasan poloong. Yaku naikon taane kopaisu batango kosolok tukon talimayo kopaisu batango napau-pau. Tobikon doiya kayung doo matemo. Yaku naikon molubaton kalipokan doi bunggukon-bunggukon Libanon tukon kubaiyo moloyu saibino kokayung doi bonggulung.

¹⁶Doi tempo kayung doo Kuobuluseno doi mian mate nadunia kona otuwongan lalo naikon mbombokon kobangsa-bangsa. Saibino kokayung doi Eden tukon kayung-kayung molilikan doi Libanon momaalat paisu molobi-lobian tukon molapamo obulus doi dunia modoi bilit tuuno naikon sanaang tukon naotuwongan kayung doo.

¹⁷Yanila naikon polainggene doi mian mate nadunia tukon pototongi tukon yanila molapamo otuwong loluuk. Tukon saibino mo loluuk osulang doi bilit kayung doo naikon pinolonggon doi antara bangsa-bangsa.

¹⁸Kayung doo andean tomundo Mesir tukon bangsa. Akiyo kai kokayung doi Eden mobunomo doiya kona katandak tukon mulia. Bai diabudoo, buno kayung-kayung doi Eden koidan, kayung doo kai naikon obulus doi mian mate nadunia tukon pototongi tukon yanila moaki tingonio Mian Bisa tukon yanila mate doi polobosian lalomo. Yaku TEMENENO Moinakatandak Tuuno lapamo basilingan.”