Read Banggai YEHESKIEL 32 Bible Online

YEHESKIEL 32 - Banggai bible

YEHESKIEL 32

¹Doi tanggal komeengo bituwon kosongulono lua taun kosongulono lua tempo kami nasinakukonan, TEMENENO bantil doi yaku,

²“He banggapi moakiyo kotakoso, beenamo poingotii tuuno doi tomundo Mesir. Pelenggene Daku teteba nia doiyana, ‘Ikoo balenggang buno singa mongula doi antara bangsa-bangsa, bai ikoo lobian napokakanan buno buwea modaano doi paisu lalomo. Aimu kabuke tukon kodikitio saibino kopaisu batango.

³Doi tempo bangsa-bangsa pototongi, Yaku naikon lakoyo ikoo tukon Kubuani, tukon sodiikene kobangsa-bangsa doo babayo ikoo doi buta tina.

⁴Ikoo naikon Kupapasene doi buta tukon sasaibino kotomisi tukon iyayon luwedoi posaapon kodunia naikon Kusumboliyo mokaane ikoo.

⁵Maka bunggukon-bunggukon tukon pepelakon-pepelakon naikon Kudaanokene tukon mubajan moboano.

⁶Sauhmu naikon Kukundange sulano nambetokiyo kobunggul-bunggul tukon konoiyo kopaisu-paisu batango.

⁷ Doi tempo Yaku kulokisene ikoo timbu naikon Kututupio tukon bituwon-bituwon naikon Kusinggoulio. Oloyo matano naikon kusekene doibunom tonggulungo tukon bituwon akimo naikon nalaangan.

⁸Tutuu, saibino komadialang doi timbu naikon Kuposoiyo, tukon dunia naikon Kutealikene kalipokan. Yaku TEMENENO Moinakatandak Tuuno lapamo basilingan.

⁹Doi tempo Yaku sabukene bilita tentang musilakan doi tano-tano moakiyon ikoo tingoniiyo, badaang kobangsa naikon moteali manasal.

¹⁰Tutuu, Yaku naikon aakene Daku sabel tukon lungguiyo ikoo. Tomundo-tomundo tukon bangsa-bangsa naikon kitayo Daku tindakan doo doi ikoo. Doi tempodoo yanila naikon mombokon matakut tukon bubusak sabab matakut mate.’ ”

¹¹TEMENENO Moinakatandak Tuuno bantil doi tomundo Mesir, “Tomundo Babel nasabel naikon tudoikene doikoo.

¹²Suludadu-suludadu moluwe doi bangsa-bangsa monggolitton naikon Kusumboliyo yanila nabubute konasabel tukon bantayo sasaibino komurayat. Murayat tukon sasaibino ikoo mobabanggakene naikon manas.

¹³Muiyayon piniala naikon Yaku tembeliyo doi paisu-paisubatango bibilo yanila tampat monginuman. Mau banggapi maukai iyayon aki naikon nakodikitio paisu batango doo koidan.

¹⁴Maka paisu-paisu batanggo doi mutano naikon Kukolineo tukon Kutealikene mololong tukon tanang. Yaku, TEMENENO Moinakatandak Tuuno lapamo basilingan.

¹⁵Kalukai Mesir Kutealikene padang lalomo mokiis tukon Kuakabuse saibino modungol idoo, yanila naikon toiyo baikon Yakumo TEMENENO.

¹⁶Poingoti mo keras nia naikon teali namian poloonan. Boine moluwedoi bangsa-bangsa bailon naikon mananikene salaku paloosan palosano tuuk Mesir tukon sasaibino kona rayat. Yaku TEMENENO Moinakatandak Tuuno lapamo basilingan.”

¹⁷Doi tanggal songulo lima bituwon komeengo taun songulo lua lalomo tempo komuyu nasinakukonan, TEMENENO bantile doi yaku,

¹⁸“He banggapi moakiyo kotakoso, poloonggenemo tuuk rayat doi Mesir. Kilimeno yanila doi mian mate nadunia posinggat-posinggat tukon tano-tano mobukuan bailon.

¹⁹Botiikenemo doi yanila, ‘Muanggene komuyu noko komonondok tuuno? Komuyu naikon obulus doi mian mate nadunia, tukon kinoolo doi antara mian-mian natingonio ko Mian Bisa.’

²⁰Bangsa Mesir naikon mate posinggat tukon yanila momate doi polobosian lalomo. Meeng kosabel sadiamo tuuk akateo yanila sasaibino.

²¹Pojuang-juang motambongan barani tukon mian-mian mopolobosi taikon doi Mesir sambute tukon sanaang Mesir mianno nalubatan doi mian mate nadunia. Yanila wookon bunonaia, ‘Mian-mian moaki natingonio ko Mian Bisa doo matemo doi polobosian lalomo. Diabudodoo yanila lubat dosumai tukon gonggolonggon dimbaa!’

²²Asyur gonggolonggon indaa nasuludadu-suludadu kibulo potikunggon yanila saibino matemo doi polobosian lalomo. Yanila kibulo daanon taikon moatean tuuno doi mian mate nadunia. Salataa daano motubo, yanila osumbute komatakutan doi dunia.

²⁴Elam daano indaa tukon nasuludadu kibulo potikunggon: Aki nasinunat, yanila saibino mate doi polobosian lalomo, maka obulus doi mian mate nadunia. Salataa tubo, yanila lubatene komatakutan, bai diabudodoo yanila matemo naikon tukon sio ndatanggunge komaa posinggat komian-mian molapamo mate doi polobosian lalomo.

²⁶Mesekh tukon Tubal daano idoo, kona suludadu-suludadu kibulo potikunggon yanila. Akiyoon nasinunat, yanila saibino mate doi polobosian lalomo. Salataa tubo yanila lubatene komatakutan doi dunia.

²⁷Yanila aki namaalat bakibulan mosecara monondok buno pojuang doi tempo lolukoo moobulus doi mian mate nadunia tukon sandata mosukup. Pojuang-pojuang doo kinubulo tukon nasabel taikon doi oluno tukon natombide doi eopo bunggono. Tempo modaano motubo, pojuang-pojuang bisamo mobarani tobikon kubaiyo saibino komian matakut.

²⁸Bunomodoiya Mesir mianno naikon kinubul tukon kinoolo mian-mian tangano moaki natingoniyo ko Mian Bisa tukon mate doi polobosian lalomo.

²⁹Edom daano indaa tukon sasaibino kotomundo tukon napanguasa. Loluuk yanila suludadu-suludadu nabukuanan, bai diabudodoo yanila moola doi mian mate nadunia polaing tukon mian-mian mate bailon moaki tingonio Mian Bisa.

³⁰Saibino tomundo luwedoi lembet daano indaa, bunomo koidan mian-mian doi Sidon. Loluk yanila nakakuasaan lubatene komatakutan, bai diabudodoo yanila inokimaa tukon aki nasinunat obulus doi mian mate nadunia.

³¹Oila kotempono tomundo Mesir tukon nasuludadu-suludadu polong doi mian mate nadunia tukon kitayo saibino doo momatemo doi polobosian lalomo, yanila lasayo naikon tohibulo. Yaku TEMENENO Moinakatandak Tuuno lapamo basilingan.

³²Yakumo kubaiyo sabab tomundo Mesir lubatene komatakutan doi mian-mian motubo bai yana tukon nasuludadu mate naikon tukon kinoolo polaing saibino komian moaki natingoniyo ko Mian Bisa tukon mate doi polobosian. Yaku TEMENENO Moinakatandak Tuuno lapamo basilingan.”