Read Banggai YEHESKIEL 33 Bible Online

YEHESKIEL 33 - Banggai bible

YEHESKIEL 33

¹TEMENENO basilingan koidan doi yaku, Nabantile,

²“He banggapi moakiyo kotakoso bantilemo doi bangsa bailon kalukai Yaku lubatene polobosian doi meeng kotano, naiyamo naikon moteali. Modungoliyo doo tano doo naikon piliyo doi antara yanila meeng komian padagai.

³Kalu padagai doo kitayo komusuh lubat, yana batenge kotanda silakaan sulano saibino komian basadia.

⁴Indee komianno molongol tanda silakaan doo bai aki palatikanggene, tukon musuh lubat maka nakateo, maka yana mate sabab nasalah susungo. Kalukai yana palaatikanggene tanda silakaan doo tantu yana moola salamat.

⁶Bai kalu padagai doo kitano musuh molubat tukon yana aki takiyo kotanda silakaan, maka musuh mangakate mian-mian mobaladosa doo yanila namatean naikon Yaku tuntute luwedoi yana tanggung jawabpo.

⁷He banggapi moakiyo kotakoso ikoo Kuoduke teali padagai bangsa Israel. Pelenggene doi yanila napoingotii nia.

⁸Kalu Yaku popitoikene baikon meeng komian lokis naikon mate, bai ikoo aki muingotikene yana sulano yana boliyo kona kalakuan sulano yana salamat, maka yana naikon mate, danon meeng komian baladosa. Bai doi namatean naikon kutuntute tanggung jawab luwe doikoo.

⁹Kalu ikoo ingtikene komian lokis doo tukon yana aki nayase tade mokubaiyo kolokis, yana naikon mate salaku mian baladosa, bai ikoo susumu naikon salamat.”

¹⁰TEMENENO bantil doi yaku, “He banggapi moakiyo kotakoso, kuaikene doi mian Israel yanila nabantilan nia, ‘Kami susah sabab komai lalim tukon kulokisan. Bulaandokai komai malaatan tuboan?’

¹¹Bantile doi yanila baikon tolongo Yaku, Mian Bisa motubo, TEMENENO Moinakatandak Tuuno, Yaku aki nasanaang kalu mian lokis mate; kobaliko Yaku yase yana natinggale kona lalim-lalim sulano yana tataap tubo. He bangsa Israel, tademo mokubai lokis! Bulaando komuyu yase mate?

¹²Eh banggapi moakiyo kotakoso, bantikenemokai doi Israel mianno baikon kalukai mian monondok mokubai lalim, maka konamonondokan lolukoo aki moola tulungio yana. Kalu mian lokis tade mokubai lalim, yana aki naikon nainukum tukon kalu mian monondok mokubai lalim yana naikon aki sinalamaton.

¹³Moola kai teali Yaku paladandimo naikon mosalamatene mian monondok, bai kalu yana tambun mokubai lalim tukon moinikene baikon yana naikon sinalamaton sabab namonondokan doi lolukoo, yana bingun. Yaku naikon neneeke koidan monondokan mokinubai tukon yana naikon mate sabab nalalim-lalim.

¹⁴Yaku moola moingotikene mian lokis baikon yana naikon mate. Bai kalu yana tade mokubai lalim tukon tambun lakukene oila komo monondok tukon motalakana, umpamano yana abalinggene mian nabalang mogadeo, kabai balang moindukuk tukon taatio ko ukum-ukum mobabayo kotuboan, maka yana aki naikon mate.

¹⁶Yaku aki naikon neneeke koidan lalim-lalim molapamo lakukene, tukon yana naikon tubo sabab lakukene oila komo talakana tukon monondok.

¹⁷Bai bangsa doo bantile baikon Dakutindakan doo aki naadil! Banggokai yanila natindakan komo aki naadil.

¹⁸Idan koidan Kubantile baikon kalu mian monondok tambun lakukene molokis, yana naikon mate sabab doiya.

¹⁹Kalu mian molokis tade mokubai lalim, tukon tambun lakukene oila komo monondok tukon motalakana, yana naikon tubo sabab doiya.

²⁰Maukai bunodoiya bangsa israel bantile baikon daku tindakan aki naadil. Tutuu, Yaku naikon hakimio yanila suwe-suwele mololoi nakakabai.”

²¹ Doi tanggal lima bituwon kosongulono, taun kosongulono lua lalomo tempono kami nasinakukonan, meeng komian mololo luwedoi Yerusalem lubat tukon bontiikene doi yaku baikon kotadoo otuwongo.

²²Akiyon nalubat doi popokoo, yaku lasayomo ko TEMENENO nakuasa. Jadi salataa miandoo lubat doiyaku, yaku moolamo basilingan tukon akimo naponga koidan.

²³TEMENENO bantil doi yaku,

²⁴“He banggapi moakiyo kotakoso, mian-mian modungol doi kota-kota doo momanaso doi Israel butanodoo bantile, ‘Abraham laate saibino buta nia, banggokai yana tongo meeng komian butongo. Kita nia koaito badaang, jadi buta nia teali konggita.’ ”

²⁵Tobikon doiya TEMENENO Moinakatandak Tuuno sumboliyo yaku pelenggene Nateteba nia doi yanila, “Komuyu makaan sail modaano kosauhno: Komuyu sosubayo kopilogot tukon lakukene komangakatean. Barani tuuno komuyu mangaku buta nia salaku komuyumo.

²⁶Komuyu balanggene musabel. Mutindakan minisikiton. Komuyu saibino lakukene kopokeaan. Komuyu daanon barani mangaku butania salaku koomiyumo?

²⁷Tolongo Yaku, Mian Bisa motubo, TEMENENO Moinakatandak, mian-mian modungol doi bakas-bakas kota doo naikon mate inakate. Yanila modungol doi padang-padang naikon kinaan iyayon mobarani. Yanila mobasookon doi bunggul-bunggul tukon doi leng-leng naikon mate sabab panakit mobiol-biol.

²⁸Tano doo naikon Kutealikene padang lalomo mokiis, tukon yanila banggakene konakakuasaan naikon pupuso. Bunggul-bunggulkon doi Israel naikon teali kiis tuuno tobikon akio komeeng komian barani pintosio.

²⁹Doi tempo Yaku ukume bangsa doo sabab yanila nalalim-lalim tukon tealikene tano doo kiis tuuno, yanila toiyomo baikon Yakumo ko TEMENENO.”

³⁰TEMENENO bantil, “He banggapi moakiyo kotakoso, ikoo tealimo salita doi mian mosebangsamu tempo yanila pososung lolani kobeton-beton kota kabai doi bonua tataapono-tataapono salaano. Yanila bantil meeng komian doi bailonggon, ‘Ayo kita ndongolio oila TEMENENO Nateteba oloyo nia.’

³¹Yanila lubat potutundu tukon yanila salaku Kuumat osulang mondongoli mubantilan-bantilan bai oila Daku pinalentakon yanila aki natulutiyo. Yanila suungo bibilo sumbutene bantil-bantil lan bibian bai yanila noano tolongo pikikene kona kauntungan.

³²Ikoo inaanggon meeng komian momanani lagu-lagu bibian konalalo monondok tukon pandoi bakasapi. Bisa yanila molongol mubantilan-bantilan bai aki nataatio.

³³Saibino komubantilan doo naikon teali, tukon kalu kai tempodoo lubat, yanila naikon toiyo baikon daanomo komeeng konabi doi yanila tanga-tangano.”