Read Banggai YEHESKIEL 34 Bible Online

YEHESKIEL 34 - Banggai bible

YEHESKIEL 34

¹TEMENENO bantil doi yaku,

²“He banggapi moakiyo kotakoso, tomundo-tomundo Israel, tolonggimolon, tukon pelenggene oila mo Yaku, TEMENENO Moinakatandak bantil doi yanila, ‘Silakamo komuyu, he Israel napadagai-padagai. Komuyu tolongo pikikene komupalalu susumu, bolikon kai mu domba-domba napalalu.

³Kosusuno komuyu inume, kobullono-bullono komuyu kubaiyo pakean, tukon domba momalanak tuuno komuyu kelete tukon kaane. Komuyu aki nabiasa pouluse mudomba-domba.

⁴Domba-domba moaki nabukuan komuyu aki popialayo, momasakit aki pobeena pakuli, modedenggon komuyu aki pobungusiyo, mosasaat tukon lapus komuyu aki unggoliyo tukon babayo abali. Banggokai saibino mudomba doo komuyu palaluwo tukon nggimal.

⁵ Sabab akiyo kopadagai, domba-domba doo molapaso tukon tealimo iyayon mobarani nakanan.

⁶Maka daku domba-domba teali lausala doi bunggul-bunggul motatandak tukon doi bunggukon-bunggukon. Yanila tasabukon posaapon kodunia bunggono, akiyo komeeng komian kai mopalatikanggene kabai unggoliyo yanila.

⁷Eh padagai-padagai, ndongoliyo oila Yaku TEMENENO Moinakatandak Tuuno bantile doi komuyu:

⁸Tolongo Yaku, Mian Bisa motubo, palatikanggene! Daku domba-domba sinukumo tukon kinaano iyayon barani, sabab akiyo komodagaiyo yanila. Komuyu Daku padagai-padagai aki popalatikanggene domba-domba doo. Komuyu tolongo pikikene butomu susumu, bolikon nakapalaluan mudomba-domba.

⁹Jadi padagai-padagai ndongoliyo,

¹⁰Yaku, TEMENENO Moinakatandak bantile doi komuyu, baikon Yaku nia mumusuh. Daku domba-domba doo naikon Kuabali alayo luwedoi komuyu tukon aki koidan Kumangangga doi komuyu akimo Kupataikene mopikikene komu kapalaluan susumu. Daku domba-domba doo naikon Kusalamatene luwedoi komuyu tobikon yanila akimo nateali mukaane.’ ”

¹¹TEMENENO Moinakatandak bantil, “Yaku susunggu naikon unggoliyo daku domba-domba tukon pialayo yanila,

¹²buno meeng komian padagai unggoliyo tukon potongikene nadomba-domba mopoalaaso maka pialayo yanila. Yanila naikon kubabayo mule luwedoi yanila natampat saibino sasabukonan doi oloyo mokalipokan tukon naas doo.

¹³Yanila naikon Kukaluale luwedoi bangsa-bangsa tangano tukon tano-tano moddoon, maka Kupotongikene tukon Kubabayo doi natano susungo. Yanila naikon Kudagaiyo doi bunggul-bunggul tukon doi pepelakon-pepelakon Israel tukon yanila kubimbinge doi padang-padang limbut mosanaang.

¹⁴Tutuu, Yaku naikon masadaikene tuuk yanila padang-padang limbut momolumbang, doi bunggukon tukon doi pepelakon Israel butano. Indaa yanila naikon tade tukon makaan limbut tukon tanaang.

¹⁵Yaku susungu naikon teali padagai! Daku domba-domba tukon sadiayo kona tampat tadean tuuk yanila; Yaku, TEMENENO Moinakatandak Tuuno lapamo basilingan.

¹⁶Molapus naikon kuunggoliyo, mosasat naikon Kubabayo mule, modedenggon naikon Kubungusiyo, momasakit naikon Kupakuliyo; bai momalanak tukon bukuan naikon Kusilakayo sabab Yaku padagai molakukene oila komonondok.

¹⁷Ndongoliyo eh Daku domba-domba! Yaku, TEMENENO Moinakatandak Tuuno bantile doi komuyu baikon Yaku naikon akimiyo komuyu suwe-suwele tukon poalasene komo monondok luwedoi molokis, domba-domba luwedoi mbembe-mbembe.

¹⁸Doi antara komuyu daano moaki nabiai tolongo tukon akabuse limbut mo monondok tuuno, bai koidan motudo-tudongi limbut yanila moaki nakaane! Yanila monginum paisu mobilisih maka kaburemo paisu moaki yanila inume!

¹⁹Daku domba-domba bailon namakaan limbut sio molapamo tinundang-tinudang tukon monginum paisu molapamo kinabuk.

²⁰Tobikon doiya, Yaku TEMENENO Moinakatandak Tuuno bantile doi komuyu, he domba-domba momalanak, baikon Yaku naikon lubat teali hakim doi antara domba-domba mobukuan tukon domba moaki nabukuan.

²¹Komuyudesa-desake tukon tanduke domba momasakit tobikon yanila tosiika luwedoi domba tambuno.

²²Bai Yaku susungu naikon salamatene Daku domba-domba, sulano yanila akimokai nailakukanggon tukon nggimal. Yaku naikon hakimio Daku domba-domba meeng tukon meeng tukon alaase momondok luwedoi molokis.

²³ Yaku naikon angkate meeng komian tomundo mobuno Kubobitokon Daud tuuk teali komeeng-meengo padagai yanila, tukon yana naikon pialayo yanila.

²⁴ Yaku, TEMENENO naikon teali yanila na Mian Bisa, tukon tomundo mobuno Kubobitokon Daud doo naikon teali yanila napenguasa. Yaku TEMENENO lapamo basilingano.

²⁵Yaku naikon mokubai paladandian tukon yanila, mojamine nakaamanan. Yaku naikon siikayo saibino koiyayon barani luwedoi sasaibino kotano, tobikon Daku domba-domba moola dungol tukon tanang doi padang-padang tukon moola doi mosolot-mosolot.

²⁶Yaku naikon balakaatio yanila tukon pataikene yanila dungol doi bunggulo momolius potikunggon. Yanila naikon Kubeena udaan kalu yanila palaluwo.

²⁷Kayung-kayung batango naikon saoh, asi-asi naikon beena hasil, tukon saibino komian naikon dungol tukon sanaang doi buta susungo. Kalu laate poboi Daku umat Kuputuse tukon yanila Kusoobiyo luwedoi mian-mian makabaiyo ata yanila, yanila toiyomo baikon Yakumo ko TEMENENO.

²⁸Yanila naikon aki nailampok koidan doi bangsa-bangsa moaki natingonio Yaku kabai sinoku iyayon-iyayon mobarani. Yanila naikon tubo tukon monondok, tukon akiyo komeeng komian kai naikon mokubaiyo yanila matakut koidan.

²⁹Yaku naikon osubule yanila naasi-asi sulano naakiyo kotempo malalaan koidan doi tano doo. Yanila aki naikon tinotulai koidan doi bangsa-bangsa bailon.

³⁰Maka saibino toiyo baikon ko Israel mianno daanon Kuumat tukon baikon Yaku molindungiyo. Yaku, TEMENENO Moinakatandak Tuuno lapamo basilingan.

³¹Tutuu komuyuno daku domba tambuno kubeena kinaan. Komuyu daanon Kuumat tukon Yaku mu Mian Bisa. Yaku, TEMENENO Moinakatandak Tuuno lapamo basilingan.”