Read Banggai YEHESKIEL 35 Bible Online

YEHESKIEL 35 - Banggai bible

YEHESKIEL 35

¹ TEMENENO bantil doiyaku,

²“He banggapi moakiyo kotakoso, batopikene kotano Edom.

³Pelenggene doi modungoliyo oila Yaku ko TEMENENO Moinakatandak Tuuno bantile doi yanila, ‘Yaku nia mumusuh, he modungoliyo ko Edom bunggulo! Mutano naikon Kutealikene kiis tuuno akiyo kopodungolino, tukon mukota-kota naikon teali bakas-bakas. Maka komuyu toiyo baikon Yakumo TEMENENO.

⁵Tambun doi lolukoo komuyu musuwo ko Israel tukon sodiikene yanila kinolot doi tempo yanila kanakon silakaan salaku ukuman doi bundu yanila doo nalalim.

⁶Tobikon doiya tolongo Yaku, Mian Bisa motubo, TEMENENO Moinakatandak Tuuno, matean daanon tetebano tukon komuyu aki potongosobii luwedoi yana. Komuyu salahmo sabab lakukene komangakatean, maka mangakatean doo naikon lolonggonggon.

⁷Mukota-kota doi Edom bunggulo naikon Kutealikene kiis samba komian mopintosio naikon Kuakateo.

⁸Bunggul-bunggul naikon Kututupio tukon mubajan-bajan, bungkuko tukon pepelakon naikon kukonoiyo tukon momate polobosian.

⁹Mutano naikon Kutealikene padang lalomo tuuk sidutu posidutukon tukon mukota-kota akimo naikon koidan mian nadungoliyo. Maka komuyu toiyo baikon Yakumo ko TEMENENO.

¹⁰Komuyu bantile baikon mau Yehuda maukai Israel tukon nabuta suwe-suwele daanon muhak, tukon baikon komuyu naikon kotumbuno maukai Yaku, TEMENENO, doiyamo yanila Mian Bisa.

¹¹Tobikon doiya, tolongo Yaku Mian Bisa motubo, TEMENENO Moinakatandak Tuuno, Yaku naikon balase kopomisikitan, sabab komuyu nggimal, misikit tukon sosiboliyo Daku umat. Yanila toiyo komuyu baikon Kuhukume sabab mukakabai doi yanila.

¹²Maka komuyu toiyo baikon Yaku, TEMENENO, lapamo molongol musosiboli tempo komuyu bantile: Israel bunggul-bunggulo tealimo kiis tuuno tukon sinalakanggon teali ndamusuh.

¹³He bangsa Edom, komuyu babasal kosumuyu tukon basilingan mobabanggaal doi Yaku. Yaku molongol saibinodoo.

¹⁴Yaku TEMENENO Moinakatandak Tuuno bantil: Posaapon kodunia naikon sanaang doi tempo sasaibino mutano Kutealikene padang mokiis tuuno,

¹⁵pokakana buno komuyu doo sanaang tempo kitayo Israel kongguna teali kiis tuuno. Maka saibino komian naikon toiyo baikon Yakumo TEMENENO.’ ”