Read Banggai YEHESKIEL 36 Bible Online

YEHESKIEL 36 - Banggai bible

YEHESKIEL 36

¹TEMENENO bantil, “He banggapi moakiyo kotakoso, basilingonio ko bunggul-bunggul Israel tukon yanila sasaibino mondongolii TEMENENO Moinakatandak Tuuno nateteba,

²‘Salataa bangsa-bangsa potikunggon molobosi tukon molampeke komuyu, yanila lapamo totulaiyo sasaibino ko Israel. Tukon yanila tedes bantil baikon diabudodoo bunggul-bunggul lolukoo teali yanila kotumbuno. Tobikon doiya, he bunggukon-bunggukon tukon bunggul-bunggul paisu batango langano tukon pepelakon, he kota-kota motealimo bakas tukon motininggalo luwedoi modungoliyo tukon linampok tukon bangsa-bangsa sosiboliyo potikunggon, dungoliyo oila ko TEMENENO Moinakatandak Tuuno nabinantil doikoo: Doimunggimalan natoduapan lalomo Yaku nggimoliyo bangsa-bangsa doi mupotikunggonan tukon kusus Edom, sabab yanila mosenaang tukon konandodoong mototulai, lapamo alayo Daku buta tukon lampase kopadang-padang nalumput. Diabudodoo yang liit tukon nggimal sabab bangsa-bangsa doo totulaiyo tuuno tukon sosiboliyo komuyu.

⁷Yaku, TEMENENO Moinakatandak Tuuno batotopi baikon bangsa-bangsa doi mupotikunggonan doo naikon tinotulai koidan.

⁸Bai doi koo Kubantile he bunggul-bunggul Israel mukayung-kayung naikon sopii tukon saoh koidan sulano Daku umat Israel mosobit naikon mule.

⁹Yaku daanon taikon doikoo he Israel tukon Yaku tantukene baikon mubuta naikon binadung koidan tukon tiniposii kalibuang.

¹⁰Yaku naikon sungiyo konakadaang Daku umat Israel. Yanila naikon dungol doi kota-kota tukon mobangune koidan sasaibino kolabi-labino.

¹¹Modungoliyo tukon naiyayon piniala naikon Kusungiyo tobikon nateali badaang tuuno, lobian badaang luwedoi tumbeno, tukon yanila naikon mosuung pau tumbu badaang. Yanila naikon tubo indaa buno tumbeno tukon kutealikene sanaang, buno akiyon komuyu alamio. Maka yanila toiyo baikon Yakumo ko TEMENENO.

¹²Daku Umat Israel, naikon Kubabayo mule tuuk modungoliyo kona tano koidan. Buta doo naikon teali yanila susungo kotumbuno tukon naikon sidutu beena hasilo tobikon yanila napau-pau akimo koidan naikon namate.’

¹³Yaku, TEMENENO Moinakatandak Tuuno bantile: Bisamo mobisa buta nia binee totumaino pakaan banggapi tukon molampase kopau-pau bangsa modungoli.

¹⁴Bai tambun diabudodoo buta nia aki naikon makaan banggapi koidan kabai lampase yanila napau-pau. Yaku TEMENENO Moinakatandak Tuuno lapamo basilingan.

¹⁵Akimo napalaluu koidan nabuta nia mondongolii sosibolii bangsa-bangsa kabai tanggunge komian natotulai. Buta nia akimo koidan naikon lampase kobangsa modungoliyo. Yaku, TEMENENO Moinakatandak Tuuno lapamo basilingan.”

¹⁶TEMENENO bantil doi yaku,

¹⁷“He banggapi moakiyo kotakoso, salataa Israel mianno dungol doi yanila natano susungo, yanila lokis-lokisemo tukon yanila natindakan tukon nakalakuan. Yaku anggene yanila nakalakuan doo haram, buno boine modaanon bolokon.

¹⁸Kubiolikene Daku nggimalan doi yanila sabab yanila lakukenemo badaang komangakatean doi buta doo tukon kodikitio tukon yanila napilogot-pilogot.

¹⁹Yaku ukume yanila pokonoi tukon yanila nacara tuboan tukon nakalakuan, maka yanila Kupoalasene doi tano-tano moddoon.

²⁰Doi yaakai yanila taus, yanila sidutu kodikitio Kosambunggu momoliyous. Sabab mian-mian mobantile buno nia, ‘Bangsa nia daanon Mian Bisa na Umat, bai yanila sio tinggale Mian Bisa nabuta bineekon doi yanila.’

²¹Yaku pikikene sabab Kosambunggu momolious Israel mianno lapamo kodikitio doi yaamokai yanila natausan.

²²Tobikon doiya, pelenggene oila Yaku, TEMENENO Moinakatandak Tuuno bantile doi bangsa Israel, ‘Oilamo naikon Daku kinubai kai bolikono sabab komuyu, he Israel mianno, baikai sabab Kosambunggu moliyous molapamo komuyu kodikitio doi yaandomo komuyu natausan.

²³Yaku naikon tudoikene Kosambunggu namoliusan mobabasal doo, sambu molapamo komuyu kodikitio doi bangsa-bangsa tangano, maka yanila toiyo baikon Yaku TEMENENO. Yaku, TEMENENO Moinakatandak Tuuno lapamo basilingan. Yaku naikon pakeyo komuyu tuuk mo okitakene doi bangsa-bangsa baikon Yaku nia molious. TEMENENO Mo Meeng Tuuno.

²⁴Luwedoi samba kobangsa tukon tano, komuyu naikon Kupototongikene tukon Kumulekene doi mubuta susuumu.

²⁵Lapa doiya komuyu naikon Kutiposio tukon paisu momolino sulano komuyu bilisii luwedoi saibino mupilogot tukon luwedoi sasaibino kolobo molapamo kodikitio komuyu.

²⁶ Maka Kubeena komuyu noa moboolu tukon pikilan moboolu. Noamu momotikas buno batu naikon Kusoboliyo tukon noa mo taat.

²⁷Daku Roh naikon Kutotuwo doi noamuyu naikon Kudagaiyo sulano tubo loingiyo Daku ukum-ukum tukon taatio sasaibino Daku parentah.

²⁸Maka komuyu naikon dungol doibuta lapamo Kubeekene doi mumbumbu. Komuyu naikon teali Kuumat tukon Yaku naikon teali mu Mian Bisa.

²⁹Komuyu naikon Kusodiiyomo luwedoi sasaibino komu madikitan. Yaku naikon beena parentah doi gandum sulano tubo tukon molumbang sulano komuyu akimo poilupa malalaan.

³⁰Yaku naikon sungiyo molumbang kobatango kosao-saono tukon muasi-asi hasilo tobikon komuyu akimo naikon motoupi tempo malalaan mokulokisene kosambuno doi antara bangsa-bangsa.

³¹Komuyu naikon neneeke komu kalakuan molokis tukon mutindakan moaki napantas, maka komuyu teali tolueh butomu susungo sabab lalim-lalim tukon mumisikitaan doo.

³²He Israel neneeke, baikon saibino doo Kulakukene bolikon sabab komuyu. Komuyu siokai pomamaa tukon totulai sabab mukalakuan. Yaku TEMENENO Moinakatandak Tuuno lapamo basilingan.’ ”

³³TEMENENO Moinakatandak Tuuno bantil, “Lapa komuyu Kukumesio luwedoi saibino komu lalim, komuyu naikon Kupataikene dungol doi mukota-kota koidan, tukon bangune koidan kona bakas-bakas.

³⁴Lokukoo mian-mian moampakon alo doi mupadang-padang mokita bulaa kona mootulan buta doo, bai Yaku naikon nggolakene komuyu limange doo buta doo koidan.

³⁵Maka saibino komian teali kelam, sabab buta mololuko tandus diabudodoo boliimo teali taman Eden, tukon kota-kota mololuko kiis, manas tukon teali bakas-bakas, diabudodoo teali kota-kota momonggol kona palataanan tukon moono modungoliyo.

³⁶Maka bangsa-bangsa mopokolani modaanon, naikon toiyo baikon Yaku, TEMENENO lapamo bangune koidan kota-kota molapamo manas, tukon kabaiyo koidan asi-asi motandus. Yaku, TEMENENO, lapamo basilingan tukon tantu naikon molaksanakanggene.”

³⁷TEMENENO Moinakatandak Tuuno bantil, “He Israel, komuyu Kupataikene koidan mangkabi tolong doi Yaku; Yaku naikon sungiyo mukadaang buno meeng kodomba tambuno.

³⁸Kota-kota diabudodoo momanas, naikon moono kopodungolino buno Yerusalem tempo aloyo-oloyo babasal doi lolukoo, moono tukon domba-domba mosinosubakon, maka komuyu toiyomo baikon Yakumo TEMENENO.”