Read Banggai YEHESKIEL 37 Bible Online

YEHESKIEL 37 - Banggai bible

YEHESKIEL 37

¹Yaku molasayo ko TEMENENO nakuasa, tukon Na Roh babayo yaku obulusiyo ko pepelokon momoono, tukon buku-buku.

²TEMENENO tuntute yaku moboilingi pepelakon doo, tukon kitayo baikon doi posaapon pepelakon doo sasabul kobuku-buku mobadaang tuuno tukon motuulo tuuno.

³TEMENENO bantil doi yaku, “He banggapi moakiyo kotakoso, molakai buku-buku nia abali tubo?” Yaku timbiliyo, “TEMENENO Moinakatandak Tuuno, tolongo Ikoo kai motoiyo.”

⁴Maka TEMENENO sumboliyo yaku pelenggene Nateteba doi buku-buku momotuul doo,

⁵“Yaku TEMENENO Moinakatandak Tuuno mosupaikene ansaan doi butomu lalomo sulano komuyu abali tubo.

⁶Kuobosio neet tukon sail doi koo tukon kubungusiyo komuyu tukon kulit. Komuyu naikon Kubeena ansan sulano tubo. Maka komuyu toiyo baikon Yakumo TEMENENO.”

⁷Maka yaku Yeheskiel basilingan doi buku-buku doo pokonoi tukon TEMENENO naparentah. Tukon daanon yaku basilingan doo, yaku lengele kolalo momengget-mengget, sabab buku-buku doo tambuno pokotimo meeng tukon bailonggon.

⁸Daanon yaku mopalaatinggakene, buku-buku doo tambun daanon koneeto tukon daanon kosailo, maka daano kolito koidan bai buta-buta doo akiyo daano konaansang.

⁹Mian Bisa bantil doi yaku, “He banggapi moakiyo kotakoso, basilingano doi mombuul. Bantilemo baikon Yaku TEMENENO Moinakatandak Tuuno maparentakene doiyana sulano lubat luwedoi saibino tujuiyo, tuuk puulekene koansaan doi momatedoo buto-butongo lalomo tobikon yanila abali tubo.”

¹⁰ Maka yaku basilingan pokonoi tukon TEMENENO naparentah tukon mombuul doo mopulkene ansan doi butong-butong doo lalomo maka yanila tubo tukon kokondong. Yanila nakadaang badaang tuuno, sukup sulano nabentuke kopomeengonan suludadu mobadaang.

¹¹Mian Bisa bantil doi yaku, “He banggapi moakiyo kotakoso, buku-buku nia labanggene bangsa Israel. Komuyu bebek baikon yanila motuul, akiyo komoinian tukon akiyo oloyo sinalaano.

¹²Tobikon doiya pikikenemo doi kuumat Israel doo baikon Yaku, TEMENENO Moinakatandak Tuuno naikon bukayo yanila kibulo. Yaku naikon kalualemo yanila luwe idoo tukon abalinggene yanila doi buta Israel.

¹³Sambuno lapa Yaku lakukene saibino doo, Daku umat naikon toiyo baikon Yakumo TEMENENO.

¹⁴Yaku naikon pulikene ansaan doi yanila butongo sulano otuboiyo yanila, maka yanila kumoolakene dungol doi natapa susungo. Maka yanila toiyo baikon Yakumo TEMENENO. Yaku TEMENENO lapamo basilingan tukon tantu naikon yana lakasanakene.”

¹⁵TEMENENO bantil koidan doi yaku,

¹⁶“He banggapi moakiyo kotakoso, alayomo meeng kotongkat tukon tulisemo bantilan-bantilan nia doiyana, ‘Batomundoan Yehuda’. Maka mangala meeng kotongkat bailon tukon tulise doi bunggono. ‘Batomundoan Israel’.

¹⁷Doi bundu taanio tongkatoo molua buno doiya sulano kobundu-bunduno pototngi tukon teali meeng ko tongkat.

¹⁸Kalu mubangsa masadaikene koalatino,

¹⁹bontiikene doi yanila baikon Yaku TEMENENO Moinakatandak Tuuno naikon mangala tokong mo sialunge Yehuda. Lua dotakongoo naikon Kutealikene meeng tukon Kutaanio doi limanggu lalomo.

²⁰Taaniomo tokong doo molua tukon tudoikene doi bangsa doo.

²¹Maka bantikene doi yanila baikon Yaku, TEMENENO Moinakatandak Tuuno naikon alayomo Daku bangsa sasaibino luwedoi tano-tano doi yaa yanila natausan. Yanila naikon Kupototongikene tukon Kubabayo abali doi yanila natano susuungo.

²²Yanila Kutealikene meeng kobangsa doi buta doo, doi Israel bunggulo. Yanila naikon meeng kotomundo mopalentayo, tukon akimo naikon nateali lua koidan bangsa kabai batomundoan.

²³Yanila aki naikon nakodikitio kobutongo koidan tukon mokubai lalim tukon sosubaiyo kopilogot-pilogot mo kodikitio. Yaku naikon ososdiiyo yanila luwedoi sasaibino kokakabai mokubaiyo yanila akimo namangangga Yaku. Yaku naikon koliouse yanila; yanila naikon teali Kuumat, tukon Yaku yanila na Mian Bisa.

²⁴ Yanila naikon pinotongikon doi meeng kotomundo buno tomundo Daud naikon momaparentah tuuk sidutu-posidutukon. Tukon yanila naikon satia loingio daku hukum-hukum. Tukon tuuk sidutu-posidutukon yanila tukon nakatulunan yanila naikon dungoliyo buta doo, Yaku mobeekene doi Yakub tukon yanila nambumbu mo dungoliyo.

²⁶Yaku naikon mokubai meeng koperjanjian tukon yanila dagaiyo kona kaamanan polong posiditukon. Yaku naikon balakaatio tukon sungio yanila nakadang. Doi yanila nabuta naikon Kukekendenge Daku Bonua motataap indaa tuuk sidutu-posidutukon.

²⁷ Yaku naikon podungoli yanila, Yaku naikon teali yanila na Mian Bisa tukon yanila Kuumat.

²⁸Kalu Daku Bonua daanomo doi yanila tanga-tangano tuuk sidutu-posidutukon maka bangsa-bangsa bailon toiyomo baikon Yaku, TEMENENO molilike Israel teali Kuumat susuunggu.”