Read Banggai YEHESKIEL 38 Bible Online

YEHESKIEL 38 - Banggai bible

YEHESKIEL 38

¹TEMENENO bantil doi yaku,

² “He banggapi moakiyo kotakoso, batotopikenemokai Gog tomundo mokinabasal luwedoi tano-tano Mesekh tukon Tubal doi buta Magog.

³Popitoikenemokai doiyana baikon Yaku, TEMENENO Moinakatandak Tuuno, daanon namusuh.

⁴Yaku naikon belokkene yana, mopaase kopeka doi ngaloko, tukon kibute yana sumbut tukon sasaibino konapasukan. Badaang tuuno kona pasukan mololo adalan mobapakean pokakana. Samba kosuludadu mababa tombide tukon sabel.

⁵Tomundo inantokon sulaudadu-suludadu luwedoi Persia, Sudan tukon Libia, suwe-suwele mababa sabel tukon songgo tambaga.

⁶Suludadu saibino luwedoi tano-tano Gomer tukon Bet-Togarma taikon doi lembet, matailukon polalaing yana, tukon badaang bangsa bailon malaing koidan.

⁷Sumboliyo yana namasa-masadai tukon palentayomo sasaibino kosuludadu napototongi tukon yana sulano nabasadiamo loingio naparentah.

⁸Bubula kotaun koidan yana naikon Kupalentayo sulano lobosio meeng kotano tukon nadungoliyo lapamo pinotongikon koidan luwedoi antara bangsa badaang tukon modoibundu dungol doi tano doo tukon aman. Gog naikon dungoliyomo ko Israel bunggulo momalumbito kona kiisan tukon moono bakas-bakas bai dia budodoo modungoliyo rayat motubo tukon dame.

⁹Yana tukon nasuludadu tukon badaang kobangsa mo yase naikon lubat molobosi buno mombul makasang tukon bunom mosinggouliomo posaapon posaapon tano doo.”

¹⁰TEMENENO Moinakatandak Tuuno bantil doi Gog, “Doi tempodoo ikoo naikon mokubai tetel molokis.

¹¹Ikoo putusiyo sulano kotano moakiyo kobentengo doo, doiyaa komodungoliyo tubo tukon aman tukon sanaang doi kota-kota moakiyo nabenteng tukon akiyo kona alat-alat palataanan.

¹²Ikoo naikon pondikuk tukon lampase modungoliyo bakas-bakas kota doo nabarang-barang. Komo dungoliyo pinotongikon luwedoi bubula kobangsa, diabudodoo badaango konabuat tukon naiyayon piniala tukon yanila dungol doi dunia tangano.

¹³Modungoliyo ko Syeba tukon Dedan tukon saibino kopadagang doi kota-kota tano Spanyol naikon masadai doikoo buno naiya, ‘Oilamo ikoo akikene musuludadu tolongo tuuk momalampas tukon malampok mosoni, salaka, iyayon piniala tukon buat tukon akute saibino doo?’ ”

¹⁴Tobikon doiya TEMENENO Moinakatandak Tuuno bitekene yaku tuuk pelenggene doi Gog teteba nia, “Tobikon doiya tempo Daku umat Israel tubo tukon aman tukon tanaang, ikoo lubat molobosi.

¹⁵Ikoo lengget luwedoi tampat mudungolan, moddoon taikon doi lembet, inatokon suludadu mopolobosi tuuno, saibino kopasukan molokiti adalan luwedoi sasaibino kobangsa.

¹⁶Maka ikoo lobosio Daku umat Israel buno sokoi makasang molupayo kodunia. Kalukai tempono lubat, ikoo naikon Yaku sumboliyo nadungoliyo Dakubuta. Tukon Daku tindakan lolo doikoo, he Gog bangsa-bangsa naikon toiyo indee Yaku, doiyamo Mian Bisa Mo Moliyous.

¹⁷Bolikono tentang ikoo Yaku lolukoo basilingan lolo sasaibino Daku ata-ata nabi Israel? Yanila lapamo tantukene baikon doi tempo naikon molubat Yaku naikon sumboliyo meeng komian sulano lobosio Israel. Yaku TEMENENO Moinakatandak Tuuno basilingano.”

¹⁸TEMENENO Moinakatandak Tuuno bantil, “Bai sabuno lapa Gog mosobit lobosio Israel, Yaku naikon banggabut.

¹⁹Tukon Yaku nggimal tuuno naikon ancame baikon doi oloyo doo daano koleali mobabasal doi tano Israel.

²⁰Saibino ko ikan tukon tomisi saibino koiyayon babasal tukon mopau-pauno, tukon saibino komian doidunia nia bunggono naikon mbombokon matakut salaane Yaku. Bunggukon-bunggukon naikon manas, motombing-motombing naikon manas tukon saibino kobeton naikon tolubang.

²¹Maka Gog naikon kuotokutio tukon saibino kosusaan lupano. Yaku, TEMENENO Moinakatandak Tuuno basilingano. Kona suludadu naikon poisoboli molobosi tukon yanila nasabel.

²²Yana naikon Kuukume tukon panakit mobiol tukon sauh natokundangan. Udan babasal tukon udan es, aung tukon belerang naikon Kukundange, doiyana tukon nasuludadu tukon nabadaangan kobangsa-bangsa mo lapamo pototongi tukon yana.

²³Tukon cara doo naikon Kutudoikene doi sasaibino kobangsa baikon Yaku nia hinolomati tukon moliyous. Maka yanila toiyo baikon Yakumokai TEMENENO.”