Read Banggai YEHESKIEL 39 Bible Online

YEHESKIEL 39 - Banggai bible

YEHESKIEL 39

¹TEMENENO Moinakatandak Tuuno bantil, “He banggapi moakiyo kotakoso, ancamemo ko Gog, tomundo mobabasal luwedoi tano-tano Mesekh tukon Tubal, tukon bantilemo doi yana baikon Yaku nia namusuh.

²Yaku naikon liasene yana, tukon babayo yana sumbut doi lipu modoon taikon doi lembet, doi bunggul-bunggul Israel.

³Idoo naikon Kumbase kona pana batango sampe loliat doi limano bakalingano.

⁴Doi Israel bunggulo-bunggulo bunggono, Gog polaing sasaibino suludadu tukon napomeenggonan naikon gugur tukon yanila na bajan-bajan naikon Kubeekene doi saibino kotomisi tukon iyayon mobarani sulano nakinaan.

⁵Suludadu-suludadu doo naikon tuwong tukon matemo doi asi-asi Yaku, TEMENENO, Moinakatandak Tuuno lapamo basilingan.

⁶Yaku naikon usumbute mosuan doi tano Magog tukon doi pante-pante doi yaa kopodungoliano tubo tukon tanaang. Maka yanila toiyo saibino baikon Yakumo TEMENENO.

⁷Bai doi Israel mianno tanga-tanganonaikon kuokitaikene Kosambunggu momoliyous, tukon Kosambunggu doo akimo kai nainokoditii. Maka bangsa-bangsa toiyo baikon Yakumo TEMENENO, Mian Bisa momoliyous luwedoi Israel.”

⁸Yakumo TEMENENO Moinakatandak Tuuno bantil, “Tutuu oloyo mobinantil doo naikon lubato.

⁹Modungoliyo kota-kota Israel baikon sumbut potutuundu sulano napotototngikene ko sandata-sandata motininggalo, doiyamo tombide tukon sabel, pana batango tukon pana matano tukon tongkat pongumbas. Saibino doo yanila tealikene yanila kayung sinua, tukon doiya sukup tuuk pitu kotaun.

¹⁰Jadi yanila aki napalalu pototongikene kayung sinua doi asi kabai matape kayung doi bonggulung, sabab sandata-sandata motininggalo sukup badaang tuuk bahan mo sinua. Yanila naikon pondikuk tukon lampase komian-komian nabuat moindikukoo tukon lamapse yanila nabuat, Yakumo, TEMENENO Moinakatandak Tuuno lapamo basilingan.”

¹¹TEMENENO bantil, “Kalukai saibino doo teali, Yaku naikon beekene doi Gog buta bakubulan doi Israel, doi Pepelakon Pintosiano motangabostaikon talise luwedoi Tobun Mate. Idoomokai Gog saibino kona suludadu naikon nakinibulan, tukon pepelakon doo naikon sinumbuikon ‘Pepelakon Pasukan Gog’.

¹²Pitu ko bituwon nakalumbit mian-mian Israel naikon sibuk mokubule saibino kobajan sulano ko buta doo akimo namadikit koidan.

¹³Saibino modungoliyo tano doo naikon tombonio balimang bakubulan doo tukon sulano yanila doo naikon matalima mominoinikon Kumanangan oloyono. Yaku, TEMENENO Moinakatandak Tuuno lapamo basilingan.

¹⁴Sambuno liise pitu kobituwon doo, bubula komian naikon binee limang moompokonio tano doo tuuk mounggoli bajan-bajan modaanon, komo kibule sulano nabiliisi tano doo luwedoi momanggiliit.

¹⁵Ampakonan doo lalomo, samba kooloyo yanila naikon beena paloosan doi bibilo, sulano tukang-tukang kubuloo kitayo tukon kibule dobukudoo doi Pepelakon Pasukan Gog.

¹⁶Tukon cara koidan doiya buta doo binilisii luwedoi madikitan. (Doi oloyo doibundu pepelakonoo naikon daano kota kosambuno pokakana tukon Pasukan Gog.)”

¹⁷ TEMENENO Moinakatandak Tuuno bantil doi yaku, “He banggapi moakiyo kotakoso, uange saibino kotomisi tukon iyayon bailonggon, sulano lubat luwedoi yaa-yaa tuuk makaan sosubakon Kusinadiakon tuuk yanila. Yaku naikon makabai lamean babasal doi Israel bunggul-bunggulo, indaa yanila malaat makaan sail tukon monginum sauh.

¹⁸Yanila moola kaane kotalenga bajan-bajano, tukon inume saibino koponguasa dunia sauno. Saibino mo batalengakene tukon mokuasaiyo doo naikon inakate buno mbembe langgilo kabai mbembe napau-pau, kabai banteng-banteng momalanak.

¹⁹Lapa Yaku akateo do mian-miannoo buno sosubakon, tomisi-tomisi tukon iyayon-iyayon bailon naikon monginum sauh sampe malangu.

²⁰Doi Kumeda yanila moola okobosule kotiano tukon sasaibino koadalan, tukon molokitio tukon sasaibino komo baladuang. Yaku, TEMENENO Moinakatandak Tuuno lapamo basilingan.”

²¹TEMENENO bantil, “Yaku naikon palatikanggene Daku monondokan doi bangsa-bangsa. Yanila saibino naikon kitayo bulaandomo Yaku molakukenemo Daku kuasa tuuk mo jalanggene kokaputusan-kaputusan mo adil.

²²Tambuno tempo nia Israel mianno naikon toiyo baikon Yakumo yanila na TEMENENO Mian Bisa.

²³Tukon saibino kobangsa naikon sadar baikon Israel mianno kinapatu doi masakukonan sabab yanila baladosa doi Yaku. Yanila Yaku tinggalemo tukon Kusodiikene komusuh nalungguiyo tukon inakate doi polobosian lalomo.

²⁴Kukabaiyo yanila pokonoi tukon namadikitan tukon yanila nakulokisan, maka Yaku tinggalemo yanila.”

²⁵TEMENENO Moinakatandak Tuuno bantil, “Bai diabudodoo Yaku naikon seseange Israel mianno Yakub nakatulunan, tukon kabaiyo yanila abali sanaang. Tukon bunomo doiya Yaku dagaiyo Kosambunggu sulano tataap hinolomati.

²⁶Kalu yanila daanon modungol koidan tukon tanaang doi yanila natano susungo, tukon akiyo komeeng komian kai mo otokutio yanila, maka yanila naikon toliminggenemo bulaando yanila lapamo inokimaa sabab kulokisenemo Yaku.

²⁷Yaku naikon babayo yanila abali luwedoi yanila namusuh tano-tano, tukon Daku moliyousan naikon tokiya doi saibino kobangsa sabab Daku kakabai doo.

²⁸Maka Daku umat toiyo baikon Yakumo yanila na TEMENENO Mian Bisa. Sabab Yakumo komokilime yanila doi masakukonan, bai Yaku koidan mobabayo yanila mule doi yanila natano susuungo, aki namongtinggal mau meeng komian luwedoi yanila indaa.

²⁹Yaku naikon kundange Daku Roh doi bangsa Israel, tukon akimokai natinggale yanila koidan. Yaku, TEMENENO Moinakatandak Tuuno lapamo basilingan.”