Read Banggai YEHESKIEL 4 Bible Online

YEHESKIEL 4 - Banggai bible

YEHESKIEL 4

¹Ko Mian Bisa bantil, “He banggapi moakiyo kotakoso, mangala meeng kobatu bata, binggakene doi salaamu tukon galisemo doi kota Yerusalem gambalo bunggono.

²Maka gambale komeeng koboilingiano doi kota doo, tukon got-got, nainatambunan-natambunan kobuta, basandungan-basandungan tukon pakakas-pakakas momanase kona tembok potikunggon.

³Mangalamo paang besi kubaiyo doiya meeng kopasanggal besi; binggakenemo paang doo taikon doi koo tukon kota Yerusalem. Doibundu sasalaane doi kota doo naikon ikoomo komo boilingiyo. Doiya naikon teali lambang tuuk bangsa Israel.

⁴Maka ubanggon tombing doi bobo, tukon Yaku biolikene bangsa Israel nakasalahan doi komuyu. Ikoo naikon ubanggon 390 kooloyo konakalumbit buno doiya tukon mandarita sakisaa sabab yanila nakasalahan. Meeng kooloyo ubanggon bunodoiya kopalosano bangsa Israel inukum meeng kotaun.

⁶Lapa doiya, ubanggon tombingdoi bakalinga tukon lasayomo Yehuda nakasalahan inukum sangkapolono kooloyo kona kalumbit, meeng kooloyo kopalosano meeng kotaun yanila naukuman.

⁷Pokitayo Yerusalem nabinoilingian. Aakene komupopukul doi kota doo tukon pelenggene Daku teteba kaliangano ukuman tuuk yanila.

⁸Ikoo Kubaiyo naikon sulano aki nalaate mieke kobutongo luwedoi bobo doi bakalinga kai konabalikan polong bailingiano doo pupus.

⁹Diabudodoo, mangalamo gandum, jelai, kacang memela, kacang polong, sekoi tukon gandum alus. Pototongikenemo saibino doo tukon kubaiyomo roti. Doiyamo mukinaan 390 kooloyo kona kalumbit ikoo ubanggon tombing doi bobo doo.

¹⁰Roti doo sio ikoo abese buno doiya sulano samba kooloyo ikoo makaan tolongo 230 kogram. Lobian luwe doiya aki namoola.

¹¹Mupaisu ininum koidan daano kona batas, doiyamo lua kosanggir meeng kooloyo

¹²Makabaino aung tukon banggapi natai salaku nabahan sinua. Taaniyomo muroti doi aung bunggono doo tukon makaano roti doo doi sasaibino komian salaano.”

¹³TEMENENO bantil, “Bunomo doiya konacara Israel miano kalu makaan kinaan Musa naukum moilalanggon doi tempo Kusakukene yanila doi tano-tano modoon.”

¹⁴Bai yaku timbiliyo, “Adu TEMENENO Moinakatandak Tuuno! Tambo pau-pauan polong diabudodoo, akiyon idan yaku kodikitio kobutonggu tukon makaan iyayon mate kai iyayon barani nakinaan labino. Aki naidan yaku makaan kinaan moinanggon haraam.”

¹⁵Maka Mian Bisa bantil, “Monondoko, salaku posoboli banggapi natai, ikoo moola mapake saapi natai tuuk posua muroti.”

¹⁶Doibundu Yana bantil koidan, “He banggapi moakiyo kotakoso, Yaku naikon manase palasadiaan kinaan doi Yerusalem. Tukon matakut tukon molili mian daango naikon binatasimo makaan kinaan tukon yanila napaisu ininum.

¹⁷Yanila naikon akiyo kona minoinikon sabab kabuso koroti tukon paisu, tukon napupusan yanila mate sabab yanila nalalim-lalim.”