Read Banggai YEHESKIEL 40 Bible Online

YEHESKIEL 40 - Banggai bible

YEHESKIEL 40

¹Tempodoo tanggal songulo bituwon komeengo, taun luakolono lima lalomo tempo kami nasinakukonan, songulo sangkap kotaun Yerusalem lapamo kinala, yaku komo lasakanggene ko TEMENENO nakuasa, maka Yana babayo yaku taus.

² Meeng ko Mian Bisa nabatokitaan lalomo babayo yaku doi buta Israel tukon abese yaku doi bunggul motatandak. Doi salaanggu yaku kitayo meeng kobangunan tambuno mo buno meeng kota.

³ Yana babayo yaku idoo, tukon yaku kitayo meeng komian mala-malane momontontilan buno tambaga mokokondong lolani kotataapon babasal. Yana matani alos pongukur luwedoi linen tukon kayu pongukur.

⁴Mala-malane doo bantil doi yaku, “He banggapi moakiyo kotakoso, ndongoliyo mono-monondok tukon palatikanggene sasaibino kolobo yaku mo okitaikene doikoo, tobikon doiya ikoo binaba dosumai. Popitoikene doi bangsa Israel saibino naikon ikoo kinita.”

⁵ Maka yaku kitayo TEMENENO Na Bonua mopotikunggon beton. Mala-malane doo tambun moukule kobeton tukon kayung pongukul mobulusan tolu kometer. Konabisaan betongoo tatandak tolu kometer.

⁶Doibundu yana taus doi Tataapon Babasal mosasalane ko talise. Yana liba doi tukaloo tukon napolongan doi bungkuk, yana ukule do tataapono, tolu kometer.

⁷Doi tataapon mobabasal tonggulungo daano koliasan tukon suwe-suwele bibilo talaat tolu kombiang badagaian. Saibinodoo kombiangoo pokakana kona babasal; kombintingo sangkap kopasuno, tukon kobulus samba kobibilo tolu kometer. Betong-betong pangatang samba kokombiang pokakana kona bondolongan, doi yamo lua kometer sembeleng. Liasano nakobulus tolu kometer koidan tukon nasinalaano doi kombiang babasal mo sasalane doi TEMENENO Na Bonua. Mala-malane doo ukure kombiang babasal doo tukon tokita kobelako sangkap kometer; natombinggakonan doi tataapondoo babasal bunduno, taikon doi lalomo, doiyamo mololani tuuno tukon TEMENENO Na Bonua. Betong-betong taikon mosasalane TEMENENO Na Bonua, kona bondolongan meeng kometer.

⁸

⁹

¹⁰

¹¹Doibundu mala-malane doo ukule kiasannoo nakebelak doi tataapono babasal; noom kometer maka senbeleng tukon koidan tataapono babasal nakebelak lima kometer.

¹²Doi kombiang-kombiang badagaian saalano kona ukulan tolu luunggon tolu kometer loo, kobetong pepende kona katandak sembeleng kometer, tukon kona bondolongan koidan sembeleng kometer.

¹³Maka mala-malane doo ukule kona antala luwedoi betong doi tonggulung meeng kombiang badagaian mbalisembeleng doiyamo songulolua sembeleng kometer.

¹⁴Yana koidan ukure kombiang babasaloo kona kobulus songulo kometer. Kombiang tataapono doo sasalane kobasalean TEMENENO Na Bonua tonggulungo.

¹⁵Kona kodoon luwedoi tataapon babasal taikon doi tonggulung polong doi betong kombiang baba sal taikon mosasalane TEMENENO Na Bonua daano lua kolono lima kometer.

¹⁶Doi betong taikon tonggulung tukon betong pangatang kombiang-kombiangoo daano kodendela-dendela popoisik. Betong-betong taikon doi loloon mo sasalaane koliasan, binubungai tukon mobinotik-botik palem batango.

¹⁷Doibundu mala-malane doo babayo yaku mololoi tataapon babasal doi basalean TEMENENO Na Bonua tonggulungo. Doi betong bibilo doi tonggulung potikunggon TEMENENO Na Bonua doo tolu kolono kombiang mokinubai. Doi kombing-kombiangoo saibino salaano daano kosoan batu

¹⁸moboilingio posaapon basalean doo. Balaseanoo tonggulungo pepende tuuno luwedoi basalean lalomo.

¹⁹Idoo daano kotataapon babasal bailon kona tobinggakonan tatandak tuuno tukon sasaalane kobasalean lalomo. Mala-malane doo moukule kona kodoon antara tataapon noo babasal doo lua: lima kolono kometer.

²⁰Doibundu mala-malane doo ukule tataapon babasal taikon lenbet mosasalaane ko basalean lalomo.

²¹Doi tataapon babasal doo, tolu doo kombiang koidan doi suwe-suwele bibilo naliasan, betong-betong kopangatango tukon kombiang mobabasal, saibino pokakano kona ukulan tukon modaano doi tataapon babasal doi tolise sembeleng. Saibino doo liasan-liasan doo kona kobulus lua kolono lima kometer, tukon nakebelak songulo lua sembelnong kometer.

²²Koidan kombing nabasalan, nadendela-dendela, tukon napalem batango nabinotik-botikan pokakana tukon modaano doi tataapon babasal taikon talise. Pitu kotukal matano sasaalane kotataapon babasal doo, tukon doibundu nodaano kokombing babasal mosasalaane ko TEMENENO Na Bonua basaleano tonggulungo.

²³Posasalaan tukon tataapon babasal baikon lembet, daano tataapon babasal bailon mosasalaane kobasalean lalomo, pokakana buno modaano doi sembeleng tataapon babasal taikon talise. Mian doo ukule kona kodoon antara lua tataapon babasal doo; lima kolono kometer.

²⁴Banggadudul, mala-malane doo babayo yaku doi tataapon babasal taikon lalom yana tukon yana ukule. Tokita tataapon babasaloo pokakana tukon tataapon babasal-babasal bailon.

²⁵Dendela-dendela doi nakombing-kombing pokakana tukon modaano doi tataapon babasal-babasal bailonggon. Nakobulus tataapon babasal doo liasano lua kolono lima kometer.

²⁶Pitu kotangga matano sasaalane ko tataapon babasal doo tukon kombiang nakabasal koidan daanon doi bunduno, sasalaane ko TEMENENO Na Bonua basaleano koliasan, binubungai tukon palem batango mobinotik-botik.

²⁷Idoo daano koidan tataapon babasal mosasalaane kobasalean lalomo. Mala-malane doo ukule kona kodoon antara lua tataapon babasal doo: lima kolono kometer.

²⁸Banggadudul mala-malane doo babayo yaku loloiyo tataapon babasal taikon lalom usok doi basalean lalomo. Yana ukure tataapon babasal taikon lolom doo tukon naukulan pokakana kotataapon babasal-babasal taikon doi tonggulung.

²⁹Kombiang-kombiang batolian, babasal kona luangan, tukon beton-beton doi lalomo pokakana tukon modaano doi tataapon babasal-babasal bailon. Kombi-kombiang do doi tataapon babasal nia kai daano kodendela-dendela. Tataapon doo babasal liasano nakobulus lua kolono lima kometer tukon nakebelak songulo lua sembeleng kometer.

³⁰

³¹Bai luangan nakabasal sasalaane kobasalean tonggulungo. Beton-beton taikon lalom mosasalaane koliasan, koidan binubungai tukon palem batango mobinotik-botik. Alu kotukal kilolino doo sasalaane tataapon babasal doo.

³²Lapa doiya mala-malane doo babayo yaku mololoi tataapon babasal taikon talite usok doi basalean lalomo. Yana ukule tataapon babasal doo tukon nakulan pokakana tukon tataapon babasal-babasal bailon.

³³Kombiang-kombiang badagaian, beton-beton kolalomo tukon naluang nakabasal ukulano bunomo kai modaano doi tataapon-tataapon babasal bailon. Doi kombiang-kombiang doo tukon doi naluang babasal danno kona dendela-dendela. Tataapono babasal liasanno kona kobulus lua kolono lima kometer tukon nakebelak songulo lua sembeleng kometer.

³⁴Nakabasal kona ruang sasalaane kobasalean doi tonggulong. Beton-beton taikon doi lalomo mosasalaane koliasan, binubungai tukon kopalem batango binotik-botik. Alu kotukal kilolino sasalaane kotataapon babasal doo.

³⁵Doibundu mala-malane doo babayo yaku doi tataapon babasal taikon lembet. Yana ukule kotataapon babasal doo tukon pokakana kona ukulan tukon tataapon-tataapon babasal bailon.

³⁶Koidan kombiang-kombiang nabadagaian beton-beton nakatean tukon lalomo nakabasal daano kona dendela-dendela. Nakobulus tataapon babasaloo liasano lua kolono lima kometer tukon nakebelak songulo lua sembeleng kometer.

³⁷Kona luangan doi salaano koidan sasalaane kobasalean tonggulungo. Beton-beton taikon lalomo mo sasalane koliasan, binubungai tukon palem batango binotik-botik. Doi tukalo pauno salano sasalaane kotataapon babasaloo.

³⁸Doi basalean tonggulungo daano komeeng kokombiang posungino doi tataapon babasal lalomo doi lembet sembeleng. Luwedoi kombiang posungino doo daano komeeng kotataapon mosasalaane kolalomo babasal. Idoomo nasinauan koiyayon-iyayon tuuk sosubakon mosinua.

³⁹Doi lalomo babasaloo, daano kosanggapo komeda, lua doi samba kobibilo. Doi meda-meda doo bunggono doiyamo konakinolotan iyayon tuuk sosubakon mo sinua, kabai sosubakon moakienggene kolalim kabai sosubakon posoboli rugi.

⁴⁰Doi lalomo babasal tonggulungo daanon koidan komeda sangkap, lua doi samba kotataapon babasal bibilo taikon doi lembet doo.

⁴¹Jadi, saibino daanon doi meda salaano tampat metembelano sosubakon: sangkap doi lalom, tukon sangkap doi basalean tonggulungo.

⁴²Sangkap komeda doi kombiang posungino mopinake tuuk mosinadiakon sosubakon mosinua mobinuang luwedoi batu. Meda doo kona katandak sembeleng kometer, bai taikon doi bunggono sangkap kopasuno nakobulus tukon nakebelak suwe-suwele tolu parampat meter. Doi meda-meda doo bunggono inabos kopakakas tuuk pokolot iyayon mosinosubakon.

⁴³Bai meda-medadoo danoon kobibilo kona kebelak 75 komili meter. Saibino kosail naikon mosinosubakon bininggakon doi meda-meda bunggono doo.

⁴⁴Lapa doya mala-malane doo babayo yaku doi dunggon lalomo. Idoo daano kolua kobangsal, komeeng doi tataapon babasal taikon doi lembet bibilo tukon sasalaane kolalom, bai komeeng koidan doi tataapon babasal taikon lalom tukon sasalaane kolembet.

⁴⁵Mala-malane doo bantil doi yaku baikon bangsal mosasalaane kolalom doo sinadiakon tuuk sasaibino koimam mobalimang doi TEMENENO Na Bonua,

⁴⁶baimo bangsal mosasalaane kolembet sinadiakon sulano saibino koimam-imam mobalimang doi balabango. Saibino ko Imam mobalimang doo sio naluwe doi nakatulunan Zadok. Sabab luwedoi Lewi benseno tolongo Zadok nakatulan momoola manghadap doi TEMENENO sulano leleaniyo Yana doi kaledaan lalomo.

⁴⁷Mala-malane doo ukure kintoloo lolomo. Kona beton sangkap kopasuno, kona ko bulus tukon kobintingo suwe-suwele 50 meter. TEMENENO Na Bonua doo daano taikon doi talise, tukon doi saalano daano komeeng kobalabaang.

⁴⁸Doi bundu yana babayo yaku doi TEMENENO Na Bonua kombiang doi muka tukon togolio bubula kotukal kilonino. Yana ukure kokombiang usokan; kona luas pitu lipat lua maka sembeleng kometer, tukon tanggal-tanggal doi bibilo molua bondolong meeng maka sembeleng kometer. Doi bobo bakalingano daano komeeng kometer. Kombiang muka doo susungo kona kobulus songulo kometer tukon kona lebar nom kometer.