Read Banggai YEHESKIEL 43 Bible Online

YEHESKIEL 43 - Banggai bible

YEHESKIEL 43

¹Lapa doiya mala-malane doo babayo yaku doi tataapon mosasalane kotolopot,

² tukon idoomo kai kukitayo lubat luwe taikon doi tolopot kolaango motontilan kopalosano Mian Bisa Israel nalubatan. Mian Bisa nalalo ilongol buno ndalangon nababokolanan, tukon dunia madialang tuuno sabab Mian Bisa nalubatan laango.

³Batokitan doo pokakana bunomo kukinita salataa Mian Bisa Lubat tuuk momanase ko Yerusalem, tukon bunomo kukinita doi Kebar Paisunobatango. Maka Yaku lubange kobutonggu tukon sosubaiyo.

⁴Laango momontontilan doo bagarak loloiyo tataapon babasal taikon tolopot maka usok doi TEMENENO Na Bonua lalomo.

⁵TEMENENO Na Roh bingkate yaku tukon babayo doi kintaloo lalomo idoo kukitayo TEMENENO Na Bonua potikunggon kolaango TEMENENO nalubatan.

⁶Salataa mala-malane doo daanon mokokondong doi bibilonggu, kulenggele TEMENENO bantil doi yaku luwedoi TEMENENO Na Bonua lalomo, yana bantile,

⁷“He banggapi moakiyo kotakoso, naiyamo Daku batomundoan. Dimbaamokai Daku dungolan doi tanga-tanga Israel mianno tukon maparentah doi yanila sidutu-posidutukon. Mau yanila maukai yanila natomundo-tomundo, akimokai koidan naikon mokodikitio Kosambunggu momolious tukon mososubaiyo kopilogot kai tukon mokibule yanila natomundo-tomundo bajano doi tampat nia.

⁸Loluk yanila natomundo-tomundo mokubai sudong-sudong tukon tataapon sudong-sudongo yanila nakamali doi sudong-sudong bibilo tukon Ku Bonua, tataapono sudong-sudong bibilo tukon tobikon tolongo meeng sanggalo modaano doi antarano. Yana lapamo kodikitio Kosambunggu momoliyous tukon yanila nakakabai mominisikiton. Tobikon doiya Kusilakaiyo yanila doi Kunggimalan lalomo.

⁹Bai tambun di diabudodoo yanila sio tade sosubaiyo kopilogot tukon biele kobajan yanila natomundo-tomundo. Lapa doiya, Yaku naikon dungol doi yanila tanga-tangano tuuk sidutu-posidutukon.”

¹⁰Maka TEMENENO bantil koidan “He banggapi moakiyo kotakoso, popitoikenekai doi Israel mianno tentang Ku Bonua nia, tukon sasaibino yanila telitio kona rancangan. Kubaiyokai yanila teali mamaa sabab yanila saibino nalalim.

¹¹Tukon sambuno lapa yanila makabai-kabai, jelaskanggenekai rancangan Ku Bonua nia doi yanila kona model, tataapon-tataapon usokan tukon nakaluaran, posusunian nabangunan, saibino doiya tuuk yanila koparaturan tukon naukum-ukum. Tulisemokai saibino doiya tuuk yanila sulano yanila monggita tukon palatikanggene kocara mangatur saibino tukon taatio saibino kona paraturan.

¹²Naiamokai kosepato mokusus luwedoi TEMENENO Na Bonua: Posaapon kolipu potikunggon doi bunggul doi bunggul bunggono daanon moliyous tuuno.”

¹³ Naiamokai ko ukuran balabang mololoi ukuran mopinake tuuk pongukur TEMENENO Na Bonua. Potikunggon kobalabang aino daanon komeeng kobuang kona buang naateanan sembeleng kometer tukon nakebelak koidan sembeleng kometer, tukon bibilo taikon tonggulung kona katandak sepelempat meter.

¹⁴Luwedoi goot polong doi balabang mo doi bilit tuuno, nakatandak meeng kometer. Taikon doi tangano nakatadak lua ko meter, tukon sembeleng kometer lobian modipot luwedoi balabang modoibilit tuuno, nakatandak lua kometer. Taikon doi tangano nakatandak lua kometer tukon sembeleng kometer lobian madipot luwedoi balabang aino potikunggon. Obos kotoluno, doiyamo balabang aino bunggono, koidan sembeleng kometer lobian madipot luwedoi potikunggon tangano.

¹⁵Obos kotoluno nia doiyamo tampat mosuan sosubakon kona katandak lua kometer. Doi sangkap kopasuno daanon koobos motokita buno tanduk.

¹⁶Balabang bunggono doo kona bentuk sangkap kopasuno, samba kobunduno kona ukulan noom kometer.

¹⁷Obos tangano koidan sangkap kopasuno, samba kobunduno kona ukulan pitu kometer, tukon meeng kobibilo doi bibilo tonggulungo kona katandak sepelempat meter. (Kona goot nakebelak sembeleng, kometer). Dobunduno taikon doi oloyo nasumbutan daano kotukal momonuju doi balabang bunggono.

¹⁸ TEMENENO Moinakatandak Tuuno bantil doi yaku, “He banggapi moakiyo kotakoso, ndongoliyokai oila Kubinotikonno doi komuyu. Kalu balabang doo lapamo kinubai, ikoo sio mutabiskanggene tukon musuayo sosubakon doi bunggono tukon tiposiikene kosau sosubakon.

¹⁹Tolongo Imam katurunan Zadok luwedoi Lewi benseno momoola lubat doi Salanggu tuuk mokabaiyo kokaledaan. Yaku, TEMENENO Moinakatandak Tuuno mopalentayo langgedoo. Benamokai doi yanila meeng ko saapi langgilo mongula tuuk sosubakon moomponio kolalim.

²⁰Mangalamokai soi sik sauhno tukon soutikene doi tanduk-tandukoo doi sangkap kopasuno balabang doo bunggono, koidan doi pasu-pasuno taikon doi tangano tukon potikunggon balabang doo. Tukon doiyamo kona cara ikoo koliyousio balabang doo tukon kususkanggene doi yaku.

²¹Lapa doiya alayomokai saapi langgilo tuuk mohapuse kolalim doo, tukon suayomokai doi tampat molapamo tinantukon, doiyamo doi tonggulung lingkungan moliyous TEMENENO Na Bonua.

²²Namodoa ikoo sio mososubakon meeng kombembe langgilo moakiyo kona sasat tuuk sosubakon moompunio ko lalim. Ko liousiokai balabang doo tukon mbembe sauhno doo pokakana bunomo ikoo lakukene tukon saapi langgilo mongula doo.

²³Kalu lapamo ikoo lakukene, manggalamokai meeng kosaapi langgilo mongula tukon meeng kombe-mbembe langilo mongula, kokolua-luano moakiyoon daanon kosasato,

²⁴maka babayomokai doi Yaku. Saibino koimam sio natiposio garam doi lua koiyayon doo bunggono tukon suayo teali sosubakon tuuk Yaku.

²⁵Samba kooloyo nakalumbit pitu kooloyo, ikoo sio musosubakene meeng kombembe, saapi langgilo mongula, tukon mbembe langilo tuuk sosubakon moomponio kolalim. Iyayon-iyayon doo aki namoola daano kosasato.

²⁶Pitu kooloyo kona kalumbit saibino koimam sio nakubaiyo koupacara pentahbisan balabang doo tukon masadaikene tukon masadiamokai tuuk moola pinake.

²⁷Lapa pitu kooloyo doo pupus saibino koimam sio tambuno mososubakon doi balabang bunggono doo sosubakon mosinua tukon sosubakon paladamean tuuk umat. Maka Yaku naikon sanaang tukon komuyu saibino. Yaku, TEMENENO Moinakatandak Tuuno lapamo basilingan.”